ملک دشمنوں کی سازشیں ملکر ناکام بنائیں گے : قومی استحکام پاکستان کانفرنس
لاہور(سٹاف رپورٹر)مجلس علما پاکستان کے زیر اہتمام لاہور کے نجی ہوٹل میں قومی استحکام پاکستان کانفرنس کا انعقاد کیا گیا، جس میں جشن آزادی اور معرکہ حق آپریشن بنیان مرصوص میں پاکستان کی عظیم فتح پر خوشی اور اپنی بہادر مسلح افواج کی قربانیوں اور شہدا پاکستان کو سلام و خراج تحسین پیش کیا گیا۔
کانفرنس کی میزبانی و قیادت چیئرمین مرکزی رؤیت ہلال کمیٹی پاکستان /خطیب وامام بادشاہی مسجد لاہور مولانا سید محمد عبدالخبیرآزاد نے کی جبکہ مہمانان خصوصی صوبائی وزیر صحت پنجاب خواجہ سلمان رفیق، وزیر انسانی حقوق پنجاب سردار رمیش سنگھ اروڑہ تھے ،دیگر مہمانوں میں سیکرٹری و چیف ایڈمنسٹریٹر مذہبی امور اوقاف پنجاب ڈاکٹر سید طاہر رضا بخاری،سیکرٹری انسانی حقوق پنجاب فرید تارڑ،معروف سینئرصحافی مجیب الرحمن شامی تھے ،کانفرنس میں تمام مکاتب فکر کے جید علماء کرام و مشائخ عظام اور دیگر مذاہب کے راہنمابھی شریک ہوئے ۔شرکا میں بشپ ندیم کامران،علامہ زبیراحمد ظہیر،علامہ سبطین اکبر،مفتی رمضان سیالوی،حافظ اسد عبید،مفتی فتح محمد راشدی،علامہ عبدالوہاب روپڑی،قاضی عبدالغفار قادری،حافظ کاظم رضا نقوی،مفتی عاشق حسین شاہ،مولانا احسان اللہ تبسم،علامہ نعیم بادشاہ،پیرولی اللہ شاہ ،ڈاکٹر مختیار احمد ،مولانا ایوب ثاقب،حافظ خالد حسن،مولانا عزیز الرحمن ثانی،پیر رضوان نفیس،مولانا ڈاکٹر سرفراز اعوان،پروفیسر ظفراللہ شفیق،علامہ شکیل الرحمن ،میرآصف اکبر ،شیخ ابوہریرہ اجمل ،انجینئرحارث ڈار،مولانا اسحاق ساقی،مولانا غلام مصطفی ثاقب،مفتی شفیق اعوان،مولانا اسد اللہ ،حافظ نعمان حامد،قاری وسیم اللہ ،قاری عبداللہ مدنی،پنڈت بھگت لعل کھوکھر،پنڈت راون جی،صاحبزادہ عبدالقدیرآزاد،صاحبزدہ عبدالبصیرآزاد،پروفیسر ظفراللہ جان و دیگر شامل تھے ۔خواجہ سلمان رفیق نے خطاب کرتے ہوئے کہا کہ میں مولانا سید محمد عبدالخبیرآزاد کو قومی استحکام پاکستان کانفرنس کے کامیاب انعقاد پر دل کی اتھاہ گہرائیوں سے مبارکباد پیش کرتا ہوں، وطن عزیز کو اتحاد ووحدت،مذہبی ہم آہنگی ،بھائی چارے ،استحکام اور قومی یکجہتی کی اشد ضرورت ہے ،ہم ملک دشمن طاقتوں کی تمام سازشوں کو ملکر ناکام بنائیں گے ۔
مولانا سید محمد عبدالخبیرآزاد نے خطاب میں کہا کہ پاکستان کی سلامتی،ترقی وخوشحالی اور حفاظت کیلئے من حیث القوم ہم سب کی ذمہ دار ی ہے ،پاکستان کو بنانے میں لاکھوں انسانوں نے جانوں کے نذرانے پیش کئے ،آج پاکستان کو بچانے کیلئے ہمیں بیدار رہنا ہوگا،ہمارا ازلی دشمن ہمسایہ ملک بھارت پاکستان میں دہشت گردی،بدامنی اور فرقہ واریت کو ہوادے کر لسانیت کے نام پر ہمیں آپس میں لڑانا چاہتا ہے ۔انہوں نے مزید کہا کہ معرکہ حق نے آزادی اور اس کے جشن کی اہمیت کو بڑھا دیا ، سپہ سالار فیلڈ مارشل حافظ سید عاصم منیر نے دشمن کو گھٹنے ٹیکنے پر مجبور کردیا، پاکستان عالم اسلام کا قلعہ ہے ۔سردار رمیش سنگھ اروڑہ نے کہا کہ پاکستان کی سلامتی و تحفظ کیلئے ہم سب ایک ہیں،انڈین حکومت ہمیشہ اقلیتوں کو نقصان پہنچانے اور پاکستان کے خلاف سازشوں میں ملوث رہتی ہے ،مودی کا ناپاک ایجنڈا پاکستان میں نہیں چلنے دیں گے ،ہم افواج پاکستان کے ساتھ ملکر بھارت مودی کو منہ توڑ جواب دیں گے ۔ڈاکٹر سید طاہر رضا بخاری و دیگرمقررین نے کہا کہ جشن آزادی اورفتح معرکہ حق کا جشن پورے ملک میں اور تمام مدارس و مساجد و دیگر عبادت گاہوں میں جوش و خروش سے منایاجارہاہے ،تمام علماء کرام اور پوری قوم افواج پاکستان اور قومی سلامتی کے اداروں کے شانہ بشانہ کھڑی ہے ،پوری قوم شہداء پاکستان اور معرکہ حق بنیان مرصوص کی فتح عظیم پر افواج پاکستان کی لازوال قربانیوں کو سلام و خراج تحسین پیش کرتی ہے ،آخر میں تمام مکاتب فکرکے علماء کرام اور دیگر مذاہب کے رہنماؤں نے ہاتھوں میں ہاتھ ڈال کر یکجہتی کا اظہار کیا اور پاکستان زندہ باد،پاک فوج پائندہ باد کے فلک شگاف نعرے لگائے ۔ کانفرنس کے اختتام پرعالم اسلام کے اتحاد،حرمین شریفین کے تحفظ،ملکی سلامتی و ترقی اوراستحکام پاکستان،مقبوضہ کشمیر اور غزہ و فلسطین کے مظلوم مسلمانوں کیلئے خصوصی دعا کی گئی۔
