ریاست کو چند شرپسند عناصر سرنگوں نہیں کر سکتے :عظمیٰ
لاہور (صباح نیوز)وزیر اطلاعات و ثقافت پنجاب عظمٰی بخاری نے کہا ہے کہ 5 اگست کا دن ہر پاکستانی کیلئے اتنا ہی تکلیف دہ ہے جتنا کسی کشمیری کیلئے ہے ، یہ دن بھارتی ظلم، بربریت اور مودی سرکار کی فاشسٹ سوچ کا ثبوت ہے۔
کشمیریوں کی قربانیاں ضرور رنگ لائیں گی،اب بھارتی ظلم کے مٹنے کا وقت آ چکا،جب قوم یومِ استحصال کشمیر منا رہی ہے تو ایک مخصوص گروہ پاکستان کے خلاف سازشوں میں مصروف ہے ،ریاست پاکستان اتنی طاقتور ہے کہ چند گھنٹوں میں اپنے سے چھ گنا بڑے دشمن کو پسپا کر سکتی ہے ،ریاست کو چند شرپسند عناصر سرنگوں نہیں کر سکتے ، قوم متحد ہے ۔ ان خیالات کا اظہار انہوں نے الحمرا آرٹس کونسل میں منعقدہ یومِ استحصال کشمیر کی تقریب سے خطاب کرتے ہوئے کیا۔وزیر اطلاعات و ثقافت پنجاب نے مزید کہا ہے کہ 7 مئی کو بھارت نے ناپاک جسارت کی لیکن ہم نے چند گھنٹوں میں دشمن کو منہ کی کھانے پر مجبور کر دیا،بھارت اس وقت دنیا میں سفارتی تنہائی کا شکار ہو چکا ، ڈونلڈ ٹرمپ بھی یہ ماننے پر مجبور ہوا کہ کشمیر متنازع علاقہ ہے اوراس کا حل ضروری ہے ۔ انہوں نے عوام سے اپیل کی کہ اپنے بچوں کو فتنہ اور شرپسند سیاست سے دور رکھیں، آج کشمیریوں کے ساتھ یکجہتی کا دن ہے ، اسے سیاست کی نذر نہ کریں۔آخر میں انہوں نے کشمیری خواتین کی قربانیوں کو سلام پیش کرتے ہوئے کہا کہ برہان وانی جیسے شہداء کو کوئی نہیں بھلا سکتا، کشمیری اپنی منزل کی طرف گامزن ہیں اور پاکستان ان کے ساتھ چٹان کی طرح کھڑا ہے ۔
