وزیر خارجہ کی پاکستانی مشنز میں ویزا اجرا کا عمل تیز کرنیکی ہدایت
اسلام آباد(نیوز ایجنسیاں)نائب وزیراعظم و وزیر خارجہ اسحاق ڈار نے پاکستانی مشنز میں ویزا اجرا کا عمل تیز کرنے کی ہدایت کی ہے ۔دفتر خارجہ سے جاری بیان کے مطابق اسحاق ڈار نے اہم اجلاس کی صدارت کی جس میں 2024 کے دوران غیر ملکی مشنز میں ویزا عمل سے متعلق متعارف کرائی گئی اصلاحات ، وزارت خارجہ کے اقدامات پر پیشرفت کا جائزہ لیا گیا۔
وزیر خارجہ نے ہدایت کی کہ ویزا کا طریقہ کار مزید موثر اور شفاف بنایا جائے ، کارکردگی میں بہتری لائی جائے اور ویزا کے اجرا کا عمل تیز تر کیا جائے ، بالخصوص بیرون ملک مقیم پاکستانیوں، سرمایہ کاروں اور کاروباری برادری کیلئے سہولیات کی فراہمی ممکن بنائی جائے ۔ نائب وزیراعظم و وزیر خارجہ اسحاق ڈار آئندہ ہفتے کے اختتام پر برطانیہ کا دورہ کریں گے ۔ سفارتی ذرائع کے مطابق اسحاق ڈار کی برطانوی ہم منصب اور وزیر مملکت برائے جنوبی ایشیا سے ملاقاتیں ہوں گی جن میں پاک برطانیہ تعلقات، خطے کی صورتحال اور دیگر امور پر گفتگو ہو گی۔ اسحاق ڈار 17اگست کو پاکستانی کمیونٹی کی تقریب میں بھی شریک ہوں گے ۔
