سیلاب سے معاشی ترقی میں کمی ،مہنگائی بڑھنے کا خدشہ:عالمی بینک
زرعی پیداوار میں 10فیصد کمی، چاول، گنا، کپاس، گندم اور مکئی کی فصل متاثر مہنگائی 7 فیصد سے تجاوز کر سکتی ،غربت میں ایک فیصد کمی کا امکان:رپورٹ
اسلام آباد(مانیٹرنگ ڈیسک)عالمی بینک کا کہنا ہے کہ پاکستان میں حالیہ سیلاب کے بعد معاشی بحالی میں سست روی اور مہنگائی بڑھنے کا خدشہ ہے ۔عالمی بینک کی رپورٹ کے مطابق سیلابی نقصانات کے باعث رواں مالی سال پاکستان کی معاشی شرحِ نمو 2اعشاریہ 6 فیصد تک محدود رہنے کا تخمینہ ہے جبکہ حکومت نے رواں مالی سال معاشی ترقی کا ہدف 4عشاریہ 2فیصد مقرر کر رکھا ہے ۔ اگلے مالی سال پاکستان 3عشاریہ 6فیصد کی شرح سے ترقی کرے گا۔
پاکستان میں رواں مالی سال مہنگائی 7 فیصد سے تجاوز کر سکتی ہے ۔پنجاب میں زرعی پیداوار میں 10 فیصد کمی، چاول، گنا، کپاس، گندم اور مکئی کی فصل متاثر ہوئی۔ خوراک کی ترسیل متاثر ہونے سے مالیاتی خسارہ ساڑھے پانچ فیصد تک بڑھنے کا خدشہ ہے ، معاشی ترقی کا انحصار زرعی شعبے کی بحالی پر ہوگا۔پاکستان میں غربت کی شرح میں اگلے سال ایک فیصد کمی کا امکان ہے ، رواں مالی سال غربت کی شرح 44 فیصد اور اگلے مالی سال میں 43 فیصد رہنے کا امکان ہے ۔ محصولات میں اضافے ، اخراجات میں کمی اور زرعی بحالی سے معاشی بہتری ممکن ہے ، 5 سالہ اصلاحاتی منصوبے کے تحت ٹیرف میں کمی سے برآمدات میں اضافہ متوقع ہے ۔ سیلاب سے برآمدات میں کمی مگر ترسیلات زر اور تیل کی کم قیمتوں سے توازن ممکن ہوگا۔
