پی ٹی آئی نے جتنی سختی برداشت کرنی تھی کر لی:مصطفیٰ کھوکھر
گرفتاریاں ان کیلئے معمول اور کیا کریں گے ؟نیشنل ڈائیلاگ کے سوا کوئی راستہ نہیں رانا ثنااللہ باشعور سیاست دان، ہمیں ایک دوسرے کیساتھ بیٹھنا پڑیگا:ٹی وی گفتگو
کراچی (مانیٹرنگ ڈیسک)سابق سینیٹر مصطفیٰ نواز کھوکھر نے کہا ہے کہ پی ٹی آئی نے جتنی سختی برداشت کرنی تھی کر لی۔ ٹی وی پروگرام میں گفتگو کے دوران مصطفیٰ نواز کھوکھر نے کہا کہ مخالف جماعتیں ہمیشہ یہی کہتی ہیں کہ جلسہ صحیح نہیں ہوا۔انہوں نے کہا سیاسی تقسیم اس حد تک بڑھ چکی ہے کہ نیشنل ڈائیلاگ کے سوا کوئی راستہ نہیں بچا، سیاست میں راستہ ہمیشہ ڈائیلاگ کے ذریعے نکلتا ہے ، سب مل کر بیٹھیں، ملک میں پولرائزیشن کو ختم کرنے کے لیے نیشنل ڈائیلاگ کی ضرورت ہے ۔ان کا کہنا تھا رانا ثنااللہ باشعور سیاست دان ہیں، ہمیں ایک دوسرے کے ساتھ بیٹھنا پڑے گا، ہم چاہتے ہیں پاکستان میں ترقی ہو۔پی ٹی آئی میں گرفتاریاں معمول ہیں، ان کے ساتھ اور کیا کریں گے ؟۔ بانی پی ٹی آئی سے سیاستدانوں کی ملاقات کا سلسلہ بحال کیا جائے تو ڈائیلاگ کا سلسلہ شروع ہو سکتا ہے ، پاکستان کی سیاست سے کسی کو مائنس کرنا عوام کا اختیار ہے ۔سابق سینیٹر نے کہا جب آپ کسی کو وقت سے پہلے فارغ کر دیتے ہیں تو عوام ان کے ساتھ کھڑے ہو جاتے ہیں، یہی نواز شریف کے ساتھ ہوا تو ووٹ کو عزت دو کا نعرہ سامنے آیا۔
