عمران کیخلاف غداری کے مقدمے کے امکان کو رد نہیں کیا جاسکتا:رانا ثنا
لاہور(مانیٹرنگ ڈٰیسک)وزیراعظم کے مشیر رانا ثنا اللہ نے کہا ہے کہ بانی پی ٹی آئی عمران خان کیخلاف غداری کے مقدمے کے امکان کو رد نہیں کیا جاسکتا۔
رانا ثنا اللہ نے کہا کہ ڈی جی آئی ایس پی آر نے پریس کانفرنس میں بڑا دو ٹوک پیغام دیا ہے ۔ پی ٹی آئی کو واضح پیغام دیا گیا، اس کومذاق سمجھیں گے تو نقصان اٹھائیں گے ، حکومت نے ڈی جی آئی ایس پی آر کے بیان کی تائید کی ہے ۔رانا ثنا اللہ کا کہنا تھا کہ بانی پی ٹی آئی کی اپنی بہن سے ملاقات کے بعد جو ٹویٹ آیا اور جو الفاظ استعمال ہوئے اس کے بعد فیصلہ ہوگیا۔رانا ثنا اللہ کا کہنا تھا کہ جلسے میں جو باتیں کی گئیں ان کو پیغام مل جائے گا اور بڑی قوت سے ملے گا، یہ لوگ اس قسم کی حرکتیں کر کے اپنے انجام کو پہنچ رہے ہیں، ان کا انجام ایم کیوایم اور بانی ایم کیوایم سے مختلف نہیں ہوگا۔آج ایم کیو ایم لندن اوربانی ایم کیوایم کدھر ہیں۔ ایک پی ٹی آئی اڈیالہ اور ایک پی ٹی آئی پاکستان بننے جارہی ہے ۔انہوں نے کہا کہ عنقریب تحریک انصاف اور اڈیالہ تحریک انصاف ہونے والا معاملہ نظر آرہا ہے ، رانا ثنا اللہ نے کہا عمران خان سے بات چیت کا دروازہ کبھی کھلا ہی نہیں تھا، وہ پاکستان کی سیاست میں کبھی تھے ہی نہیں، تحریک انصاف بہت تیزی سے اپنے انجام کی طرف بڑھ رہی ہے۔
