بسنت آرڈیننس :ہائیکورٹ نے سیفٹی سے متعلق پلان طلب کرلیا
ایڈیشنل سیکرٹری جوڈیشل کو آئی جی سے ہدایت لیکر رپورٹ پیش کرنے کی ہدایت عدالت کائٹ فلائنگ آرڈیننس ، پتنگ بازی کی اجازت کالعدم قرار دے :درخواستگزار
لاہور (کورٹ رپورٹر)لاہور ہائیکورٹ میں کائٹ فلائنگ آرڈیننس اور بسنت کی اجازت کے نوٹیفکیشن کے خلاف متفرق درخواست کی سماعت ہوئی، عدالت نے ایڈیشنل سیکرٹری جوڈیشل کو آئی جی پنجاب اور سی سی پی او سے ہدایت لیکر رپورٹ پیش کرنے کی ہدایت کرتے ہوئے حکم دیا کہ آئی جی اور سی سی پی او سیفٹی سے متعلق پورا پلان پیش کریں ۔عدالت نے مزید کارروائی 16 جنوری تک ملتوی کردی ۔لاہور ہائیکورٹ کے جسٹس ملک اویس خالد نے جوڈیشل ایکٹوازم پینل کی آئینی درخواست پر سماعت کی ۔
درخواست گزار کے وکیل اظہر صدیق نے موقف اختیار کیاکہ آئین ہر شہری کے جان و مال کے تحفظ کی ضمانت دیتا ہے ،عدالت کائٹ فلائنگ آرڈیننس اور پتنگ بازی کی اجازت سے متعلق نوٹیفکیشن کالعدم قرار دے ۔عدالت نے ایڈیشنل سیکرٹری جوڈیشل سے استفسار کیا کہ آپ ہمیں بتائیں کہ آپ سیفٹی کو یقینی کیسے بنائیں گے ؟شہریوں کے تحفظ کیلئے کیا اقدامات کئے گئے ہیں، درخواست گزار نے متفرق درخواست میں کچھ تصاویر لگائی ہیں۔ عدالت نے کہاکہ تصاویر میں ایک بچے کا گلا کٹا دیکھا جاسکتا ہے ، آپ سی سی پی او اور آئی جی پنجاب سے رپورٹ لیکر بتائیں کہ حفاظتی اقدامات کو ریگولیٹ کیسے کریں گے ۔ دوران سماعت اسسٹنٹ ایڈووکیٹ جنرل انوار حسین نے درخواست کے قابل سماعت ہونے پر اعتراض اٹھایا کہ آرڈیننس ایکٹ بن چکا ہے لہذا درخواست قابل سماعت نہیں ۔ عدالت نے کہاکہ ایکٹ کو بعد میں دیکھ لیں گے ، متفرق درخواست میں لوگوں کی جانوں کے تحفظ کے حوالے سے استدعا کی گئی ہے ، عدالت نے درخواستوں پر مزید کارروائی 16 جنوری تک ملتوی کردی۔
