پی ٹی وی میں زیرو ٹا لر نس پالیسی پر عمل کیا جا رہا : عطا تارڑ
ملازمین کو تنخواہوں ، پنشن کے واجبات ادا کئے جاچکے ہیں، وزیراطلاعات اطلاعات ذیلی کمیٹی کا اجلاس ، پی ٹی وی کے مالی و انتظامی امور پر بریفنگ
اسلام آباد(نامہ نگار ،مانیٹرنگ ڈیسک)وفاقی وزیر اطلاعات و نشریات عطا اللہ تارڑ نے کہا کہ پی ٹی وی میں تمام اینکرز میرٹ پر تعینات ہوئے کوئی سفارشی نہیں ۔قومی اسمبلی کی قائمہ کمیٹی برائے اطلاعات و نشریات کی ذیلی کمیٹی کا اجلاس کنوینر ندیم عباس کی زیر صدارت ہوا جس میں وزیر اطلاعات نے خصوصی شرکت کی۔اجلاس میں پی ٹی وی کی مالی و انتظامی صورتحال، انسانی وسائل اور ادارہ جاتی اصلاحات پر تفصیلی بریفنگ دی گئی۔
وزیر اطلاعات نے کہا کہ پی ٹی وی کے تمام ملازمین کو تنخواہوں اور پنشن کے واجبات ادا کئے جاچکے ہیں،اس وقت ادارے پر کسی قسم کی کوئی واجب الادا رقم نہیں، بجلی کے بلوں سے پی ٹی وی فیس کے خاتمے کے بعد مختلف سوالات اٹھائے گئے ، یہ تاثر درست نہیں کہ پی ٹی وی فیس کے خاتمے کے بعد ادارہ نہیں چل سکے گا، وزارت کے پاس فنڈز موجود ہیں، پی ٹی وی میں تنخواہوں کی عدم ادائیگی سے متعلق افواہیں بے بنیاد ہیں۔
وزیر اطلاعات نے کہا کہ اینکرز کی بھرتیوں کے حوالے سے دوٹوک موقف ہے ، موجودہ دور میں جن اینکرز کو رکھا گیا وہ مکمل طور پر میرٹ پر تعینات کئے گئے ، اینکرز کی بھرتی میں کسی قسم کی سفارش نہیں تھی اس بارے میں زیرو ٹالر نس پالیسی پر عمل کیا جا رہا ہے ، اس وقت سکرین پر موجود تمام اینکرز کی تقرری میرٹ پر ہوئی ہے ، اگر کسی اینکر کو لایا گیا ہے تو اس کے لیے مسابقتی تنخواہ دی جاتی ہے ، اینکرز کے معاملات میں میرٹ پر کوئی سمجھو تا نہیں کیا جائے گا۔عطا تارڑ نے کہا کہ پی ٹی وی سپورٹس چینل بہتر انداز میں چل رہا ہے ، عالیہ رشید کو پی ٹی وی سپورٹس کا سربراہ کو لایا گیا ہے جن کا سپورٹس جرنلزم میں ایک معتبر نام ہے ۔وزیر اطلاعات نے کہا کہ تاریخ میں پہلی بار پی ٹی وی میں ڈائریکٹر ہیومن ریسورس تعینات کیا گیا ہے ۔دریں اثنا قائمہ کمیٹی برائے اطلاعات کی ذیلی کمیٹی نے ادارہ جاتی اصلاحات کے عمل کو جاری رکھنے کی ضرورت پر زور دیا۔
