پی ٹی آئی دہشتگردوں کی سہولت کاری کر رہی ہے ، عباداللہ
پختونخوا کو 800ارب ملے ، سی ٹی ڈی ہے نہ فارنزک لیب اور نہ ہی سیف سٹی صوبائی حکومت بڑھکیں مار رہی،آپریشن کے پیسے بھی خود دے رہی ، اپوزیشن لیڈر
پشاور (دنیا نیوز)خیبرپختونخوا اسمبلی میں قائد حزب اختلاف ڈاکٹر عباد اللہ نے کہا ہے کہ پی ٹی آئی دہشت گردوں کی سہولت کاری کر رہی ہے ، صوبائی حکومت صوبے میں اپنی کارکردگی پر توجہ دے ۔پریس کانفرنس کرتے ہوئے ڈاکٹر عباد اللہ نے کہا کہ دہشت گردی کے خلاف جنگ کیلئے پختونخوا کو 800ارب روپے ملے ، لیکن اب بھی صوبے میں نہ سی ٹی ڈی ہے ، نہ فارنزک لیب اور نہ ہی سیف سٹی۔ یہ پیسے کہاں گئے ؟ صوبے میں حالات خراب ہوتے جارہے ہیں، سردیوں میں آپریشن مشکل ہے لیکن اس کے علاوہ راستہ کیا ہے ۔ڈاکٹر عباد نے کہا کہ سردی میں آپریشن کی وجہ سے گھروں کو چھوڑنا مشکل ہے لیکن اس کے علاوہ راستہ کیا ہے ؟ صوبائی حکومت بڑھکیں مار رہی ہے کہ ہم آپریشن کے خلاف ہیں لیکن آپریشن کے پیسے خود دے رہی ہے ، ایپکس کمیٹی کی میٹنگ میں فیصلہ ہوا تھا، اُدھر جا کر کچھ اور کہتے ہیں باہر جاکر کچھ اور۔انہوں نے کہا کہ یہ 8فروری کو سٹریٹ مارچ کررہے ہیں، باقی صوبے آگے جارہے ہیں خیبرپختونخوا نے ریورس گیئر لگایا ہوا ہے ۔ طالبان کو پاکستان لانے والے سہولت کار بھی یہی ہیں اور دہشتگروں کو بھتہ بھی دیتے ہیں۔اس موقع پر مرتضیٰ جاوید عباسی نے کہا کہ صوبائی حکومت تمام وسائل وفاق کے خلاف استعمال کررہی ہے ، خیبرپختونخوا میں دہشتگردی کے خلاف کوئی سیریس ایفرٹ نظر نہیں آرہی، وزیراعلیٰ سہیل آفریدی صوبے کے امن پر فوکس کریں، اس وقت پوری قوم کو متحد اوریکجا ہونا چاہئے ۔
