حسن ابدال:خاتون ٹک ٹاکرکی ہیڈ کانسٹیبل پر مبینہ فائرنگ ،مقدمہ درج
حسن ابدال (نمائندہ دنیا)حسن ابدال میں پولیس چوکی برہان میں مبینہ طور پر فائرنگ کے واقعہ میں ہیڈ کانسٹیبل بال بال بچ گئے ۔۔۔
، پولیس نے مشہور ٹک ٹاکر لائبہ طارق عرف گجراتن کے خلاف اقدام قتل کا مقدمہ درج کر لیا،تھانہ صدر حسن ابدال کی پولیس چوکی برہان میں تعینات ہیڈ کانسٹیبل حسیب الحسن نے پولیس کو دی گئی درخواست میں مؤقف اختیار کیا کہ وہ چوکی میں اپنے فرائض انجام دے رہے تھے کہ مبینہ طور پر لائبہ طارق عرف گجراتن چوکی میں آئیں اور ان سے مختلف معاملات پر بات کی۔ درخواست گزار کے مطابق بات چیت کے دوران تلخی پیدا ہوئی اور شور سن کر دیگر اہلکار بھی موقع پر پہنچ گئے ۔ایف آئی آر کے متن کے مطابق مبینہ طور پر لائبہ طارق نے اپنے پرس سے 30 بور پستول نکالا اور ہیڈ کانسٹیبل حسیب الحسن پر فائر کردیا۔ درخواست گزار کے مطابق گولی قمیض کی بائیں جانب جیب سے قدرے نیچے لگی اور جیب میں موجود پرس کو چھیدتی ہوئی گزر گئی، جس کے باعث وہ محفوظ رہے ۔پولیس کے مطابق واقعہ کے وقت چوکی میں روشنی نہ ہونے کا فائدہ اٹھاتے ہوئے ملزمہ مبینہ طور پر موقع سے فرار ہوگئی،پولیس رپورٹ میں بتایا گیا ہے کہ لائبہ طارق اور درخواست گزار کے درمیان سابقہ شناسائی تھی۔
Comments / رائے دیں
Share your thoughts. Comments are reviewed before they appear publicly.
Approved Comments