تاریخ،مقاصد اور اہمیت مصروف اور تیز رفتار دورِ حاضر میں جہاں سہولیات میں بے پناہ اضافہ ہوا ہے، وہیں انسانی صحت کو درپیش مسائل بھی بڑھتے جا رہے ہیں۔ غیر متوازن غذا، جسمانی سرگرمی کی کمی اور ذہنی دباؤ نے انسان کو مختلف بیماریوں نے لپیٹ میں لے لیا ہے۔ ایسے حالات میں صحت مند زندگی گزارنا نہ صرف ایک ضرورت بلکہ ایک چیلنج بن چکا ہے۔ صحت دراصل اللہ تعالیٰ کی ایک انمول نعمت ہے جس کی قدر انسان کو اکثر اس وقت ہوتی ہے جب وہ اس سے محروم ہونے لگتا ہے۔ہر سال 7 اپریل کو دنیا بھر میں عالمی یومِ صحت منایا جاتا ہے۔ یہ دن صحت کے عالمی مسائل پر توجہ مرکوز کرنے، عوام میں آگاہی پیدا کرنے اور صحت کے شعبے میں بہتری کیلئے مشترکہ اقدامات کو فروغ دینے کا ایک اہم موقع فراہم کرتا ہے۔ اس دن کی مناسبت سے مختلف ممالک میں سیمینارز، واکس، آگاہی مہمات اور طبی کیمپس کا انعقاد کیا جاتا ہے تاکہ لوگوں کو صحت مند زندگی گزارنے کی ترغیب دی جا سکے۔عالمی یومِ صحت منانے کی بنیاد عالمی ادارہ صحت(WHO) کے قیام سے جڑی ہوئی ہے۔ دراصل 7 اپریل 1948ء کو عالمی ادارہ صحت کا باضابطہ قیام عمل میں آیا، جس کا مقصد دنیا بھر میں صحت کے معیار کو بہتر بنانا اور بیماریوں کے خلاف عالمی سطح پر اقدامات کرنا تھا۔ اسی مناسبت سے 1950ء سے ہر سال 7 اپریل کو عالمی یومِ صحت کے طور پر منایا جانے لگا۔ہر سال اس دن کیلئے ایک مخصوص تھیم مقرر کیا جاتا ہے جو کسی اہم صحت کے مسئلے کو اجاگر کرتا ہے۔ مثال کے طور پر مختلف برسوں میں ذہنی صحت، ماں اور بچے کی صحت، متعدی بیماریوں، ماحولیاتی آلودگی اور یونیورسل ہیلتھ کوریج جیسے موضوعات کو مرکزی حیثیت دی گئی۔2026ء کا تھیم ''Together for health Stand with science‘‘ ہے یعنی ''صحت کیلئے اکٹھے سائنس کے ساتھ کھڑے ہوں‘‘۔ ان تھیمز کا مقصد عالمی سطح پر پالیسی سازوں، طبی ماہرین اور عوام کو ایک مشترکہ مقصد کیلئے متحرک کرنا ہوتا ہے۔عالمی یومِ صحت صرف ایک رسمی دن نہیں بلکہ یہ دنیا کو درپیش صحت کے چیلنجز پر غور و فکر کرنے کا موقع بھی فراہم کرتا ہے۔ آج کے دور میں جہاں ایک طرف جدید طبی سہولیات میسر ہیں وہیں نئی بیماریاں اور وبائیں بھی سامنے آ رہی ہیں۔ COVID19 جیسی عالمی وبا نے صحت کے نظام کی کمزوریوں کو بے نقاب کیا اور یہ ثابت کیا کہ صحت صرف ایک ملک کا نہیں بلکہ پوری دنیا کا مشترکہ مسئلہ ہے۔ اس دن کے ذریعے حکومتوں کو یاد دلایا جاتا ہے کہ صحت کے شعبے میں سرمایہ کاری ناگزیر ہے۔ صاف پانی، متوازن غذا، ویکسینیشن اور بنیادی طبی سہولیات تک رسائی ہر انسان کا بنیادی حق ہے۔ عالمی یومِ صحت اس بات پر زور دیتا ہے کہ صحت مند معاشرہ ہی ترقی یافتہ معاشرہ ہوتا ہے۔پاکستان کے تناظر میں اہمیتپاکستان جیسے ترقی پذیر ملک کیلئے عالمی یومِ صحت کی اہمیت دوچند ہے۔ یہاں صحت کے شعبے کو کئی چیلنجز کا سامنا ہے، جن میں وسائل کی کمی، طبی سہولیات کی غیر مساوی تقسیم اور بڑھتی ہوئی آبادی شامل ہے۔ دیہی علاقوں میں بنیادی صحت کی سہولیات کا فقدان ایک بڑا مسئلہ ہے جہاں لوگ معمولی بیماریوں کے علاج سے بھی محروم رہتے ہیں۔ پاکستان میں متعدی بیماریوں جیسے ہیپاٹائٹس، ٹی بی اور ڈینگی کے علاوہ غیر متعدی بیماریوں جیسے ذیابیطس اور دل کے امراض کی شرح بھی بڑھ رہی ہے۔ڈینگی بخار کے پھیلاؤ نے شہری علاقوں میں صحت کے نظام پر دباؤ بڑھا دیا ہے، جبکہ ہیپا ٹائٹس ایک خاموش وبا کی صورت اختیار کر چکی ہے۔اس کے علاوہ ماں اور بچے کی صحت بھی ایک اہم مسئلہ ہے۔ عالمی یومِ صحت کے موقع پر ان مسائل کو اجاگر کرنا اور ان کے حل کیلئے اقدامات کرنا نہایت ضروری ہے۔ اقدامات اور چیلنجز حکومت نے صحت کے شعبے میں بہتری کیلئے مختلف اقدامات کیے ہیں جیسے بنیادی صحت مراکز کا قیام، ویکسینیشن پروگرامز وغیرہ مگر ان اقدامات کے باوجود بہت سے مسائل اب بھی حل طلب ہیں۔ صحت کے بجٹ میں کمی اور عملے کی کمی جیسے مسائل نظام کی کارکردگی کو متاثر کرتے ہیں۔عالمی یومِ صحت اس بات کا تقاضا کرتا ہے کہ حکومت صحت کے شعبے کو اوّلین ترجیح دے اور بجٹ میں اضافہ کرے۔ اس کے ساتھ ساتھ نجی شعبے کو بھی صحت کے میدان میں سرمایہ کاری کیلئے راغب کرنا ضروری ہے۔عوامی شعور کی ضرورتصحت کے مسائل کا حل صرف حکومتی اقدامات سے ممکن نہیں بلکہ اس کیلئے عوامی شعور بھی ضروری ہے۔ صاف ستھرا ماحول، متوازن غذا، ورزش اور باقاعدہ طبی معائنہ صحت مند زندگی کے بنیادی عناصر ہیں۔ چہل قدمی جیسی سادہ عادت بھی انسان کو کئی بیماریوں سے بچا سکتی ہے۔آگاہی کے ذریعے لوگوں کو صحت کے اصولوں سے روشناس کرانا وقت کی اہم ضرورت ہے۔ میڈیا، تعلیمی ادارے اور سماجی تنظیمیں اس حوالے سے اہم کردار ادا کر سکتی ہیں۔عالمی یومِ صحت ہمیں یہ یاد دلاتا ہے کہ صحت ایک بنیادی انسانی حق ہے اور اس کے حصول کیلئے مشترکہ کوششیں ناگزیر ہیں۔ ضرورت اس امر کی ہے کہ حکومت، نجی شعبہ اور عوام سب مل کر ایک صحت مند معاشرے کی تشکیل کیلئے اپنا کردار ادا کریں۔اگر ہم آج صحت کے شعبے پر توجہ دیں گے تو کل ایک مضبوط، خوشحال اور ترقی یافتہ پاکستان کی بنیاد رکھ سکیں گے۔
