چٹوگرام ٹیسٹ:جنوبی افریقہ اننگز اور 273 رنز سے کامیاب
چٹوگرام (سپورٹس ڈیسک )جنوبی افریقہ نے بنگلہ دیش کو چٹوگرام ٹیسٹ میں اننگز اور 273 رنز کے ریکارڈ مارجن سے ہرادیا۔ اس فتح کے سبب اُس کے ورلڈ ٹیسٹ چیمپئن شپ کے فائنل میں پہنچنے کی اُمیدیں برقرار ہیں۔
چٹوگرام ٹیسٹ جنوبی افریقہ نے صرف تین دن میں جیت لیا۔ کھیل کے تیسرے دن بنگلہ دیش نے پہلی اننگز 38 رنز 4 کھلاڑی آؤٹ سے شروع کی اور پوری ٹیم صرف 159 کے مجموعے پر پویلین لوٹ گئی۔جنوبی افریقہ کے کگیسو ربادا نے 5 کھلاڑیوں کو آؤٹ کیا۔فالو آن کے بعد بنگلہ دیش کی ٹیم دوسری اننگز میں بھی 143 رنز پر ڈھیر ہوگئی۔ حسن محمود نے 38 اور کپتان نجم الحسن نے 36 رنز بنائے ۔دوسری اننگز میں کیشو مہاراج نے شاندار بولنگ کرتے ہوئے 5 شکار کیے ۔ سینورن موتوسامی نے 4 وکٹیں حاصل کیں۔میچ میں اننگز اور 273 رنز کے ساتھ یہ جنوبی افریقہ کی کسی بھی ٹیسٹ ٹیم کے خلاف اننگز کے اعتبار سے سب سے بڑی فتح ہے ۔ اس سے قبل جنوبی افریقہ کی سب سے بڑی فتح اننگز اور 254 رنز تھی اور یہ کامیابی بھی اس نے بنگلادیش کے خلاف سمیٹی تھی۔
