پریمیئر سپر لیگ:ایف بی آر ، سروسز ،اٹلس ہونڈا ،ڈیسکون کی کامیابی
لاہور(سپورٹس ڈیسک ) پریمیئر سپر کرکٹ لیگ کے گروپ میچز میں ایف بی آر ، سروسز انڈسٹریز ،اٹلس ہونڈا اور ڈیسکون کی ٹیموں نے اپنے میچز جیت لئے ۔
ریس کورس کرکٹ گراؤنڈ میں کھیلے گئے پہلے میچ میں سروسز انڈسٹریز نے دفاعی چیمپئن نیٹ سول کو 51رنز کے سے شکست دیدی ۔سروسز نے پہلے کھیلتے ہوئے 136رنز بنائے ، ہدف کے تعاقب میں نیٹ سول کی ٹیم صرف87رنز بنا سکی۔اسی گراؤنڈ میں دوسرے میچ میں ڈیسکون نے پاکستان ایئر پورٹ اتھارٹی کی ٹیم کو 2رنز سے پچھاڑ دیا ۔ڈیسکو ن کے 84رنز کے جواب میں پاکستان ائیر پورٹ اتھارٹی کی ٹیم 82رنز پر ہمت ہار گئی ۔ویلنشیاء کرکٹ گراؤنڈ میں یوبی سپورٹس نے حریف ٹیموں کے خلاف دو میچز کھیلے اور اسے دونوں میچوں میں شکست کا سامنا رہا ۔پہلے میچ میں اٹلس ہونڈا نے اسے 10وکٹوں سے شکست دی ۔ اٹلس ہونڈا نے یو بی سپورٹس کا 104رنز کا ہدف بغیر کسی نقصان کے حاصل کر لیا ۔دوسرے میچ میں ایف بی آر نے 153رنز کا ہندسہ جوڑا جس کے جواب میں یو بی سپورٹس کی ٹیم130رنز بنا سکی اور23رنز کے مارجن سے شکست سے دوچار ہوئی ۔
