انگلش کرکٹرزکے PSLکھیلنے پرپابندی ،IPL کیلئے چھوٹ
لندن(سپورٹس ڈیسک )انگلینڈ کرکٹ بورڈ (ای سی بی) نے اپنے کھلاڑیوں پر پاکستان سپر لیگ (پی ایس ایل) سمیت دیگر فرنچائز لیگز میں شرکت کرنے پر پابندی لگادی۔
دی ٹیلی گراف نے اپنی رپورٹ میں انکشاف کیا کہ انگلینڈ کرکٹ بورڈ نے ڈومیسٹک سیزن کے باعث اپنے کھلاڑیوں کو پاکستان سپر لیگ سمیت دیگر فرنچائز لیگ میں شرکت پر پابندی عائد کردی ہے تاہم انڈین پریمیئر لیگ (آئی پی ایل) اس سے مستثنٰی ہے ۔انگلش بورڈ کو پلیئرز پر پابندی لگانے کی وجہ سے ایک بحران کا سامنا کرنا پڑسکتا ہے کیونکہ کچھ کھلاڑی فرنچائز لیگ کے لیے ممکنہ طور پر اپنے ریڈ بال کیرئیر کو بریک لگاسکتے ہیں۔گزشتہ دنوں ای سی بی نے اپنے کھلاڑیوں کو ڈومیسٹک کرکٹ ونڈو کے دوران ہونے والی فرنچائز لیگز کے لیے کھلاڑیوں کو این او سی جاری نہ کرنے کا منصوبہ بنایا تھا۔ بورڈ دی ہنڈریڈ لیگ اور ٹی 20 بلاسٹ کے درمیان ہونے والی لیگز میں بھی کھلاڑیوں کو شرکت کی اجازت نہیں دے گا۔دوسری جانب پی سی بی نے اپنی لیگ کے لیے انگلش کرکٹ بورڈ کو منانے کی تیاریاں بھی شروع کردی ہیں تاکہ انگلش پلیئرز کی لیگ میں شرکت کو ممکن بنایا جاسکے ۔
