علی ظفر پھر پی ایس ایل کا ترانہ گائیں گے ،علی ترین کی تنقید
لاہور(سپورٹس ڈیسک )پاکستان کرکٹ بورڈ کی جانب سے پی ایس ایل 10 کا ترانہ ہر دلعزیز گلوکار علی ظفر کی آواز میں جلد جاری کیا جائے گا ۔۔
جس پر ملتان سلطانز کے مالک علی ترین نے مایوسی کا اظہار کر دیا۔ انسٹاگرام پر علی ترین نے پی ایس ایل کو تنقید کا نشانہ بناتے ہوئے سوال کیا کہ پی ایس ایل نئے ٹیلنٹ کو سامنے لانے کے بجائے ایک ہی فنکار پر انحصار کیوں کرتا ہے ؟، پاکستان کے پاس بہت سارے حیرت انگیز فنکار ہیں، پھر بھی تقریباً آدھے سے زیادہ ترانے ایک ہی درمیانی عمر کے گلوکار کو دے دیے گئے ، اس کے باوجود کہ فرنچائزز کو فنکار کے حوالے سے خدشات ہیں۔ وہ اسے اب تک کا سب سے بڑا پی ایس ایل قرار دے رہے ہیں لیکن پھر بھی انہی آوازوں کو ری سائیکل کر کے پیش کر رہے ہیں۔خیال رہے کہ پی سی بی نے پی ایس ایل 10 کے آفیشل ترانے کے گلوکار کا اعلان ایک پوسٹر شیئر کر کے کیا ہے ، جس کے مطابق اس سال بھی نوجوانوں کے پسندیدہ گلوکار علی ظفر پی ایس ایل کے گانے میں آواز کا جادو جگائیں گے ۔گزشتہ سیزن میں بھی پی ایس ایل اینتھم ‘کُھل کے کھیل’ میں انہوں نے ہی اپنی آواز کا جادو جگایا تھا۔
