اسلام آباد یونائیٹڈ نے پشاور زلمی کو 102 رنز سے شکست دیدی
راولپنڈی (سپورٹس رپورٹر)ایچ بی ایل پاکستان سپر لیگ 10 میں اسلام آباد یونائیٹڈ نے دوسرے میچ میں بھی پشاور زلمی کو 102 رنز سے شکست دے دی۔
راولپنڈی سٹیڈیم میں کھیلے گئے ایونٹ کے پانچویں میچ میں پشاور زلمی کی ٹیم 19 ویں اوور میں 141 رنز بنا کر آؤٹ ہوگئی۔زلمی کی جانب سے محمد حارث 87 رنز بنا کر نمایاں رہے ۔ حسین طلعت 13، مچل اوون 10، ٹام کوہلر-کیڈمور 8، صائم ایوب 6، محمد علی 3، الزاری جوزف 2، کپتان بابر اعظم 1، سفیان مقیم 1 اور جارج لِنڈے 0 رن بنا کر آؤٹ ہوئے ۔اسلام آباد یونائیٹڈ کی جانب سے عماد وسیم نے 3، شاداب خان اور بین ڈوارسہس نے 2، 2 جبکہ نسیم شاہ، سعد مسعود اور جیسن ہولڈر نے 1، 1 وکٹ حاصل کی۔اس سے قبل ٹاس جیت کر پہلے بیٹنگ کرتے ہوئے اسلام آباد یونائیٹد نے صاحبزادہ فرحان کی دھواں دار سنچری کی بدولت مقررہ 20 اوورز میں 5 وکٹوں کے نقصان پر 243 رنز سکور کیے ۔یونائیٹڈ کی جانب سے صاحبزادہ فرحان 52 گیندوں میں 106 رنز جارحانہ اننگز کھیل کر نمایاں رہے ۔ پشاور زلمی کے تمام بائولرز صاحبزادہ فرحان کے سامنے بے بس نظر آئے، کولن منرو 40، سلمان آغا 30، اعظم خان 16 رنز بنا کر آؤٹ ہوئے ۔جیسن ہولڈر 20 اور بین ڈوارسہس 18 رنز بنا کر ناٹ آؤٹ پویلین لوٹے ۔پشاور زلمی کی جانب سے الزاری جوزف اور حسین طلعت نے 2، 2 کھلاڑیوں کو آؤٹ کیا،صاحبزادہ فرحان کومین آف دی میچ قراردیاگیا۔
