ویسٹ انڈیز کو شکست ، ٹی ٹونٹی سیریز پاکستان کے نام
لا ڈر ہل(سپورٹس ڈیسک)پاکستان نے تیسرے ٹی ٹونٹی میچ میں ویسٹ انڈیز کو شکست دے کر سیریز اپنے نام کر لی۔امریکی ریاست فلوریڈا کے شہر لا ڈر ہل میں کھیلے گئے۔۔۔
میچ میں 190 رنز کے ہدف کے جواب میں ویسٹ انڈیز کی ٹیم 6 وکٹوں کے نقصان پر 176 رنز بنا سکی اور یوں پاکستان نے میچ 13 رنز سے جیت لیا۔پاکستان کی جانب سے حسن علی، حارث رؤف، صائم ایوب، سفیان مقیم اور محمد نواز نے ایک ایک وکٹ حاصل کی۔قومی ٹیم نے صائم ایوب اور صاحبزادہ فرحان کی شاندار نصف سنچریوں کی بدولت مقررہ 20 اوورز میں 4 وکٹوں کے نقصان پر 189 رنز سکور کیے ۔صاحبزادہ فرحان 74 اور صائم ایوب 66 رنز بنا کر نمایاں رہے جبکہ حسن نواز 15 اور محمد حارث 2 رنز بناکر آؤٹ ہوئے ۔ خوشدل شاہ 11 اور فہیم اشرف 10 رنز کے ساتھ ناقابل شکست رہے ۔ویسٹ انڈیز کی جانب سے جیسن ہولڈر، روسٹن چیز اور شمار جوزف نے ایک ایک وکٹ لی۔پاکستانی سپنرز نے ایک بار پھر اپنی مہارت کا ثبوت دیا اور اہم مواقع پر وکٹیں حاصل کر کے میچ کا پانسہ پلٹ دیا۔وزیراعظم پاکستان شہباز شریف، چیئرمین پی سی بی محسن نقوی اور چیئرمین پیپلز پارٹی بلاول بھٹو زرداری نے قومی کرکٹ ٹیم کو ویسٹ انڈیز کے خلاف T20 سیریز جیتنے پر مبارک باد دی ہے ۔ شہباز شریف نے کہا کہ ٹیم ورک اور محنت ہی کامیابی کی کنجی ہے ،محسن نقوی نے کہا کہ ‘زبردست ٹیم ورک، عزم اور جذبے کا مظاہرہ کیا گیا۔بین الاقوامی سرزمین پر قوم کا سر فخر سے بلند کرنے پر اپنے لڑکوں پر فخر ہے ، کامیابیوں کا سلسلہ جاری رکھیں۔
