گواسکر نے ورک لوڈ مینجمنٹ کی کھل کر مخالفت کردی
ممبئی (سپورٹس ڈیسک)بھارتی ٹیم کے سابق کپتان سنیل گواسکر کھلاڑیوں کے ورک لوڈ مینجمنٹ کی مخالفت میں بول پڑے۔
بھارتی میڈیا رپورٹس کے مطابق سنیل گواسکر نے کہا ہے کہ محمدسراج انگلینڈ کیخلاف سیریز میں پانچوں ٹیسٹ کھیلنے والے واحد اور سب سے زیادہ اوورز کروانے والے بولر ہیں، کپتان کی ضرورت اور ملک کی توقعات کی وجہ سے سراج نے 5 میچز کی سیریز میں نان سٹاپ 7 سے 8 اوورز کے سپیل کرائے ، سراج نے انگلینڈ کیخلاف سیریز میں سب سے زیادہ 185.3 اوورز کروائے ۔ انہوں نے کہا کہ محمد سراج نے ورک لوڈ کے تحت آخری ٹیسٹ میں آرا م کرنے کی آفرٹھکرا دی تھی جب کہ بھارت کے جسپریت بمرا نے ورک لوڈ مینجمنٹ کے تحت صرف 3 ٹیسٹ کھیلنے کا فیصلہ کیا تھا، مجھے امید ہے کہ ورک لوڈ کا لفظ بھارتی کرکٹ کی ڈکشنری سے نکال دیاجائیگا۔سنیل گواسکر کا کہنا تھا کہ ورک لوڈ جسمانی نہیں بلکہ ایک دماغی چیز ہے ، اگر ورک لوڈ کی بات کرنے والوں کے پریشر میں آگئے توآپ بہترین کھلاڑی کبھی نہیں کھلا سکیں گے ، جب آپ ملک کے لئے کھیلتے ہیں تو درد اورتکلیف کو بھول جائیں، بارڈر پر کیا فوجی جوان سردی کی شکایت کرتے ہیں ،سابق کرکٹر نے مزید کہا کہ ملک کیلئے کرکٹ کھیلنا ایک اعزاز ہے ۔
