جنرل ساحر شمشاد کا دورہ کویت، ولی عہد شیخ صباح سے ملاقات
راولپنڈی(دنیا نیوز )چیئرمین جوائنٹ چیفس آف سٹاف کمیٹی جنرل ساحر شمشاد مرزا نے کویت کا سرکاری دورہ کیا ،آئی ایس پی آر کے مطابق جنرل ساحر شمشاد مرزا نے کویت کے ولی عہد شیخ صباح الخالد الحمد الرحمٰن سے ملاقات کی ۔
کویت کے اول نائب وزیراعظم اور وزیر دفاع شیخ فہد یوسف الصباح سمیت دیگر حکام سے بھی ملاقاتیں کیں، ملاقاتوں میں دوطرفہ امور اور دفاعی تعاون پر تبادلہ خیال کیا گیا، دونوں جانب سے دفاع اور سکیورٹی کے شعبوں میں باہمی تعاون کو بڑھانے کیلئے نئی راہیں تلاش کرنے کی اہمیت پر زور دیا،چیئرمین جوائنٹ چیفس آف سٹاف کمیٹی جنرل ساحر شمشاد مرزا نے مبارک العبداللہ جوائنٹ کمانڈ اینڈ سٹاف کالج کا بھی دورہ کیا،جہاں انہیں اکیڈمی میں ہونے والی تربیتی سرگرمیوں کے بارے میں بریفنگ دی گئی،قبل ازیں کویت پہنچنے پر چاق و چوبند دستے نے جنرل ساحر شمشاد مرزا کو گارڈ آف آنر پیش کیا۔
