تاجر برادری چغلی نہ لگائے کوئی شکایت ہے تو ہمیں بتائے:بلاول بھٹو
کراچی (دنیا نیوز،مانیٹرنگ ڈیسک) چیئرمین پاکستان پیپلزپارٹی بلاول بھٹو زرداری نے کہا ہے کہ صوبے کی ذمہ داری پیپلز پارٹی کی ہے ، ہم دودھ سے دھلے نہیں لیکن اچھے ہیں، جن مسائل کا آپ سامنا کررہے ہو وہ سب جانتے ہیں۔
تاجر برادری کو کوئی شکایت ہے تو ہمیں بتائے ، کہیں اور جانے یا چغلی کی ضرورت نہیں، اسلام آباد کے بیوروکریٹس، وزرا اور وزیر اعظم تک کہتے ہیں کہ لوڈ شیڈنگ ختم کر دی لیکن ہمارا تو وفاق پر اعتماد ہی ختم ہوچکا ہے ۔کراچی میں تاجر برادری کے اعزاز میں منعقدہ ظہرانے سے خطاب کرتے ہوئے ان کا کہنا تھا کہ اگر کسی کو کوئی شکایت ہے تو مجھ سے کہہ دیں، کوشش کریں گے کہ تاجروں کے مسائل حل کریں، ہم مسائل کی موجودگی کا اعتراف کرتے ہیں اور قبول کرتے ہیں کہ کئی مسائل حل طلب ہیں۔انہوں نے کہا کہ کراچی کے تاجروں سے بھتہ وصولی کا خاتمہ ہوگیا تو یہ کریڈٹ سندھ حکومت اور وزیراعلیٰ مراد علی شاہ کا ہے ، مزدوروں کو ہڑتال کے لیے زبردستی نہیں لے جایا جاتا، آج آپ سے بھتہ لیا جاتا ہے نہ جان سے مارنے کی دھمکیاں دی جاتی ہیں، اگر آج آپ کی فیکٹریاں اور صنعتیں چل رہی ہیں اور بھتہ نہیں لیا جاتا، سب امن و سکون سے کاروبار کر رہے ہیں تو اس میں چھوٹا سا کردار پیپلز پارٹی کا بھی ہے ۔
بلاول بھٹو کا کہنا تھا کہ میں نے کبھی بھی کسی تاجر سے چندہ مانگا ہے نہ بھتہ ، میرا سیدھا سا مدعا ہے میرے بارے میں کوئی شکایت ہے تو سیدھی طرح بتائیں، میں کیوں چاہوں گا کہ میرے نام پر یا ہماری حکومت کے نام پر لوگ آپ کو تنگ کریں، مخصوص مسائل پر ہوائی باتیں بند ہونی چاہئیں،جو بھی مسئلہ ہو آپ کھل کر بتائیں، نام لیں کہ فلاں افسر یا شخص آیا اور اس نے یہ مطالبہ کیا، ملک میں کوئی شعبہ ایسا نہیں جس سے میرا رابطہ نہ ہوتا ہو، اس کا مقصد آپ کے مسائل سننا اور ان کا حل نکالنا ہے ۔پی پی پی چیئرمین نے کہا کہ ہم فخر کرتے ہیں کہ سندھ واحد صوبہ ہے جس میں پبلک پرائیویٹ پارٹنرشپ چل رہی ہے بلکہ عالمی سطح پر بھی اسے سراہا گیا ہے ، سندھ حکومت کے پبلک پرائیویٹ پارٹنرشپ کے منصوبے منافع میں ہیں، یہ تمام منصوبے اپنی لاگت مکمل کرنے کے بعد اب منافع بنا رہے ہیں، ہم چاہتے ہیں نجی شعبے کے ساتھ مل کر سندھ کے عوام کی خدمت کریں،بزنس کمیونٹی سے رابطہ کاری اب بڑھائیں گے ۔بلاول بھٹو نے مزیدکہا کہ 15 سال سے میری حکومت ہے ، کیا میں نے آپ کو تنگ کیا؟، سندھ میں پیپلز پارٹی کی حکومت ہے اور وزیراعلیٰ آپ کی بات سنیں گے ۔