طیب اردوان پاکستان پہنچ گئے :صدر ،وزیراعظم نے استقبال کیا
اسلام آباد (اے پی پی)ترکیہ کے صدر رجب طیب اردوان بدھ کی شب پاکستان کے دو روزہ دورے پر نور خان ایئربیس پہنچے تو ان کا نہایت فقیدالمثال اور شایان شان استقبال کیا گیا۔صدر آصف علی زرداری اور وزیر اعظم شہباز شریف نے ترک رہنماکانہایت پرتپاک خیرمقدم کیا۔
خاتون اول بھی ترک صدر کے ہمراہ تھیں۔اس موقع پرخاتون اول آصفہ بھٹو زرداری، نائب وزیراعظم اور وزیر خارجہ سینیٹرمحمد اسحاق ڈار، وزیر دفاع خواجہ محمد آصف، وفاقی وزیراطلاعات عطا اللہ تارڑ بھی موجودتھے ۔طیب اردوان کے پاکستان کی فضائی حدود میں داخل ہونے کے بعد پاک فضائیہ کے جے ایف 17 طیاروں نے ان کا فضائی استقبال کیا اور انکے جہاز کو اپنے حصار میں اسلام آباد لائے ۔معزز مہمان کے اعزاز میں 21 توپوں کی سلامی پیش کی گئی جو پاکستان اور ترکیہ کے درمیان گہرے سفارتی اور تزویراتی تعلقات کی علامت ہے ۔نور خان ائیر بیس پر استقبالیہ تقریب کے دوران صدر رجب طیب اردوان اور انکی اہلیہ اپنے خصوصی طیارے سے اترے تو انہیں بچوں نے گلدستے پیش کئے ، ملٹری بینڈ کی دلکش پرفارمنس پیش کی گئی جبکہ پاکستان اور ترکیہ کے جھنڈے لہراتے بچوں کی جانب سے ان کا والہانہ استقبال کیا گیا ۔ ترک صدر کے دورہ کے موقع پر وفاقی دارالحکومت کی خوبصورتی سے سجاوٹ کی گئی ہے ۔ شاہراہوں اور چوراہوں پر خیرمقدمی بینرز اور دونوں ممالک کے پرچم آویزاں ہیں ۔ وزیر اعظم شہباز شریف کی دعوت پر صدر اردوان پاکستان کا دو روزہ دورہ کر رہے ہیں ان کے ہمراہ اعلیٰ سطح کا وفد بھی ہے جس میں وزراء اور اعلیٰ حکام کے علاوہ کاروباری شخصیات شامل ہیں۔ وزیراعظم شہباز شریف اور صدر رجب طیب اردوان آج جمعرات کو پاک ترک اعلیٰ سطحی سٹریٹجک تعاون کونسل کے ساتویں اجلاس کی مشترکہ صدارت کریں گے ۔
