ایسا پنجاب بنارہے ہیں جہاں ہر شہری خود کو محفوظ ،بااختیار سمجھے :مریم نواز
لاہور(دنیانیوز)وزیراعلیٰ مریم نوازشریف نے کہا ہے کہ اقلیتوں کی جان اور مال کے تحفظ کو ریڈ لائن قرار دے کر یقینی بنایا جا رہا ہے ، ایسا پنجاب بنا رہے ہیں جہاں ہر شہری خود کو محفوظ، بااختیار اور برابر کا پاکستانی محسوس کرے۔
پاکستان مختلف مذاہب کی برادریوں کا حسین امتزاج ہے ، سب کو یکساں حقوق و مواقع میسر ہیں۔وزیراعلیٰ نے ہندو برادری کے تہوار ہولی پر پیغام جاری کرتے ہوئے کہا کہ رنگوں کا یہ خوبصورت تہوار ہولی محبت، امن اور بھائی چارے کی علامت ہے ،دعا ہے یہ دن سب کیلئے خوشیوں، محبت اور بین المذاہت ہم آہنگی کا پیغام لے کر آئے ۔ان کااپنے بیان میں کہناتھاکہ پنجاب صوفیا ، محبت اور رواداری کی دھرتی ہے ، یہاں ہر مذہب، ہر برادری کو مکمل احترام حاصل ہے ۔ حکومت پنجاب اقلیتوں کے تحفظ اور فلاح و بہبود کیلئے عملی اقدامات کر رہی ہے ، اقلیتی برادری کے افراد کو تعلیم، صحت، روزگار اور دیگر بنیادی سہولیات یکساں طور پر فراہم کی جارہی ہیں۔مریم نواز نے کہاکہ منیارٹی کارڈ کے ذریعے نادار اقلیتی بہن بھائیوں کی ہینڈ ہولڈنگ کی جارہی ہے ، اقلیتوں کے مذہبی تہواروں کیلئے گرانٹس میں اضافہ کیا گیا ہے ، ادارے کے بجٹ میں بھی اضافہ کیا ہے ، پنجاب حکومت اقلیتوں کے مذہبی اور ثقافتی تہواروں کو سرکاری سطح پر منانے کا بھی اہتمام کر رہی ہے ۔
