کاشتکاروں کیلئے1ہزار مفت ٹریکٹر سکیم کی قرعہ اندازی،گندم کی فصل اچھی ہوگی:مریم نواز
لاہور(اے پی پی)وزیراعلیٰ مریم نوازنے ویٹ این سینٹیو پروگرام کے تحت گندم کے کاشتکاروں کیلئے ایک ہزار مفت ٹریکٹر سکیم کی قرعہ اندازی کرکے باقاعدہ آغاز کر دیا۔ وزیر اعلیٰ نے کاشتکاروں کیلئے مفت ٹریکٹرپروگرام کابٹن دبا کر گندم اگا انعامی سکیم کیلئے ڈیجیٹل قرعہ اندازی کی۔
گندم اگا مہم میں سب سے پہلا ٹریکٹر بہاولنگر کی خاتون کاشتکار کوثر پروین کا نکلا۔ وزیراعلیٰ نے خود فون کرکے کامیاب کاشتکاروں کو مفت ٹریکٹرملنے کی مبارکباد دی۔انہوں نے جھنگ کے محمد اقبال کو بھی خود فون کرکے ڈیجیٹل قرعہ اندازی کے تحت مفت ٹریکٹر نکلنے پرمبارکباد دی جس پر کاشتکار نے وزیراعلیٰ کا خود فون کرنے پر شکریہ ادا کیا۔ مریم نواز نے منڈی بہائوالدین کے کامیاب کاشتکار سلمان احمد کو فون کرکے بتایا کہ گندم اگا قرعہ اندازی میں آپ کا مفت ٹریکٹر نکلا ہے جس پر سوچا کہ آپ کو خود مبارکباد دوں۔ پنجاب کے کاشتکار کیلئے گرین، ٹریکٹر، کسان کارڈ، سپر سیڈر سمیت بیشمار پراجیکٹس لانچ کیے ہیں۔ انہوں نے کہا گندم کی فصل اچھی ہوگی میری دعائیں کاشتکار بھائیوں کے ساتھ ہیں۔مریم نواز کوبریفنگ میں بتایاگیا گندم اگا مہم میں مفت ٹریکٹرسکیم کیلئے 57733 کاشتکاروں نے اپلائی کیا۔ جانچ پڑتال کے بعد 21496کاشتکار قرعہ اندازی کیلئے اہل قرار پائے ۔ قرعہ اندازی میں کامیاب ایک ہزار کاشتکاروں کو 55ہارس پاور کے ٹریکٹر مفت دئیے جائیں گے ۔ تین ماہ کے اندر تمام کاشتکاروں کو ٹریکٹر کی فراہمی شروع ہو جائے گی۔بریفنگ میں مزید بتایا گیا پنجاب میں 5لاکھ60ہزار ایکڑ اراضی پر گندم کاشت کی گئی۔
