مریم نواز کا کم از کم اجرت نہ دینے والے اداروں کیخلاف کریک ڈاؤن کا حکم
لاہور(سٹاف رپورٹر ، دنیانیوز) وزیراعلیٰ مریم نوازشریف نے پنجاب میں کم از کم اجرت کے فیصلے پر عملدرآمد نہ کرنے والے اداروں کے خلاف کریک ڈاؤن کا حکم دے دیا ۔
صوبائی وزیر محنت فیصل ایوب کھوکھر نے گزشتہ روز وزیراعلیٰ سے ملاقات کی اورورکرز کو درپیش مسائل پرتبادلہ خیال کیا ۔ وزیراعلیٰ مریم نواز نے پنجاب میں دکانوں، ورکشاپوں اور چھوٹے اداروں میں کام کرنے والے ورکرز کی رجسٹریشن شروع کرنے کا حکم دیا،چھوٹے اداروں میں کام کرنے والے ورکرز کو لیبر ڈیپارٹمنٹ میں رجسٹریشن کے بعد گرانٹس اور دیگر مالی فوائد ملیں گے ۔ وزیراعلیٰ نے پنجاب بھر میں دکانوں، پٹرول پمپس اور فیکٹریوں میں کم از کم اجرت کی ادائیگی یقینی بنانے اور صوبے بھر میں لیبر رجسٹریشن بڑھانے کا حکم دیا۔ پنجاب میں پہلی مرتبہ دکانوں، ورکشاپوں اور چھوٹے انڈسٹریل یونٹ میں کام کرنے والے ورکرز کی رجسٹریشن کی جائے گی۔انہوں نے انڈسٹریل یونٹ میں لیبر کے لئے ورکنگ کنڈیشن بہتر بنانے ،ورکرز کو کام کے لئے صاف ستھرااور صحت مند ماحول کے مواقع یقینی بنانے کی ہدایت کی۔ وزیراعلیٰ نے لیبر کے لئے راشن کارڈ پروگرام کا جامع پلان طلب کر لیا۔
