مر یم نواز کا گندم کے کاشتکاروں کیلئے15ارب کا پیکیج آبیانہ فکس ٹیکس میں چھوٹ:پہلی ماحولیاتی تحفظ فورس بنادی
لاہور(اپنے سٹی رپورٹر سے )وزیراعلیٰ پنجاب مریم نوازشریف نے پنجاب میں گندم کے کاشتکا روں کے لئے صوبے کی تاریخ کے پہلے منفرد، بہترین اور بے مثال پیکیج کا اعلان کر دیا ہے ۔ گندم کے ساڑھے پانچ لاکھ کاشتکاروں کو براہ راست گندم سپورٹ فنڈکے تحت 15ارب روپے کے فنڈز کی منظوری دے دی گئی ہے ۔
گندم کے کاشتکاروں کو کسان کارڈ کے ذریعےڈائریکٹ فنانشل سپورٹ دی جائے گی۔ وزیراعلیٰ نے رواں سال گندم کے کاشتکاروں کے لئے آبیانہ/ فکس ٹیکس میں چھوٹ کا بھی اعلان کیا۔ پیکیج کے تحت گندم کو موسمی اثرات اورکسانوں کومارکیٹ کے دباؤ سے محفوظ رکھنے کے لئے چار ماہ مفت سٹوریج کی سہولت مہیا کی جائے گی۔ صوبے میں ای ڈبلیو آر (الیکٹرانک وئیر ہاؤسنگ ریسیٹ)سسٹم کے نفاذ کا فیصلہ کیا گیا ہے ۔ ای ڈبلیو آر سسٹم کے تحت گندم سٹور کرنے والے کاشتکاروں کو الیکٹرانک چٹ/رسید ملے گی۔ 24گھنٹے کے اندر چیک کی مانند یہ چٹ /رسیدبینک کو دے کر ٹوٹل لاگت کا 70فیصد تک قرض لیا جا سکے گا۔ گندم خریداری کے لئے فلور ملز اور گرین لائسنس ہولڈرز کو100ارب روپے تک بینک آف پنجاب سے حاصل کردہ قرضوں کا مارک اپ ادا کرنے کا فیصلہ کیا گیا ہے اور فلور مل اور گرین لائسنس ہولڈرز کوگندم کی فوری اور لازمی خریداری اور سٹوریج کی مجموعی کیپسٹی کے 25فیصد تک لازمی گندم سٹور رکھنے کے لئے فوری طور پرکابینہ سے منظوری لینے کا بھی فیصلہ کیاگیا ۔
گندم اور گندم سے تیار شدہ اشیا کی ایکسپورٹ کے لئے وفاقی حکومت سے رابطہ کرنے کا فیصلہ کیا گیا۔پرائیویٹ سیکٹر کو گندم سٹوریج کے لئے ویئر ہاؤس کی بحالی اور تعمیر کے لئے بینک آف پنجاب فنانسنگ کرے گا۔ گندم کے کاشتکاروں کو سٹوریج کی سہولت مہیا کرنے کے لئے پانچ ارب روپے کا مارک اپ حکومت پنجاب ادا کرے گی۔ صوبائی اور ضلعی سرحدوں پر گندم اور آٹا کی نقل وحمل پر پابندی ختم کر دی گئی ۔ وزیراعلیٰ مریم نواز نے عزم کا اظہار کیا ہے کہ کسان کا نقصان نہیں ہونے دوں گی، کاشتکار ہمارے بھائی ہیں، ہر دم ان کے ساتھ ہیں اور رہیں گے ۔ اگرکسی کاشتکار نے گندم لگائی ہے تو کاشتکار کواس کا بھر پور معاوضہ ملے گا۔دریں اثنائوزیراعلیٰ مریم نوازشریف نے پاکستان کی پہلی اور منفرد انوائرمنٹ پروٹیکشن فورس سکواڈ کی بنیاد رکھ دی ۔ وزیراعلیٰ نے فورس کی پہلی پاسنگ آؤٹ پریڈ میں شرکت کی۔ انہوں نے انوائرمنٹل اپرول مینجمنٹ سسٹم اور گاڑیوں کے لئے ایمیشن ٹیسٹنگ سسٹم کی بھی لانچنگ کی۔ ایمیشن ٹیسٹ سسٹم کے تحت جانچ پڑتال کے بعد وزیراعلیٰ نے اپنی گاڑی کو پہلا ای ٹی ایس سٹیکر بھی لگایا۔
انہوں نے انوائرمنٹ پروٹیکشن اتھارٹی کے جھنڈے کی پرچم کشائی بھی کی۔ سینئر صوبائی وزیر مریم اورنگزیب نے انوائرمنٹ پروٹیکشن فورس کے اقدامات پر تفصیلی روشنی ڈالی اور ای ایم ایس سسٹم سے آگاہ کیا۔مریم نواز تقریب کے بعد انوائرمنٹ فورس کے پاس گئیں اور نوجوان بچے اور بچیوں کو سراہا۔اس موقع پر پاسنگ آؤٹ کی تقریب سے خطاب کرتے ہوئے وزیراعلیٰ مریم نواز نے کہا پاکستان اور پنجاب کی پہلی انوائرمنٹ پروٹیکشن فورس کے قیام پر فخر ہے ۔فورس میں سکھ نوجوان اور بچیوں کو دیکھ کر بہت خوشی ہوئی۔ انہوں نے کہا پنجاب کو سرسبز وشاداب بنانے کیلئے لاکھوں درخت لگواچکے ہیں اور بھی درخت لگوارہے ہیں۔ہمارے آنے سے پہلے جتنے برے حالات تھے سب کے علم میں ہیں۔ کسی کو ملک و قوم کی پروا نہیں تھی لیکن اب پروا کرنے والے لوگ آچکے ہیں۔چار سال ایک حکومت رہی اس نے کرپشن کے سوا کچھ نہیں کیا۔ اگر چار سال رہنے والوں نے کام کیا ہوتا تو پاکستان کی یہ حالت نہ ہوتی۔ انہوں نے کہا شہبازشریف کی محنت کے ثمرات تیزی سے سامنے آرہے ہیں۔
انہوں نے کہا مہنگائی کبھی کم نہیں ہوتی، آٹا کبھی سستا نہیں ہوتا، بجلی کے نرخ کبھی کم نہیں ہوتے لیکن ہم نے اللہ کے فضل وکرم سے کرکے دکھایا۔ انہوں نے کہا امید ہے کہ انوائرمنٹ پروٹیکشن فورس پوری محنت کرے گی جس سے پنجاب ایک دفعہ پھر صاف اور سرسبز ہوجائے گا۔ انہوں نے کہامیو اور جناح ہسپتال کے ایم ایس کو معطل کرنے پر میڈیا پر بہت باتیں ہوئیں،ڈاکٹروں کی عزت پر کبھی سمجھوتہ نہیں کیا۔ فرض پورا کرنے والے ڈاکٹروں کی بہت عزت ہے مگر لاپروائی اور کوتاہی کو برداشت نہیں کیا جائے گا۔ ہسپتالوں میں بہتری کے لئے جو ایکشن لینا پڑالوں گی۔انہوں نے کہا مصنوعی مہنگائی کرنے والوں کے خلاف کریک ڈاؤن کی پوری کوشش کررہے ہیں۔ملک کو پانچ سال فتنے سے دور مل گئے تو ترقی کرے گا اور آگے جائے گا۔
