رواں مالی سال پاکستان کی شرحِ نمو 3فیصد رہنے کی پیشگوئی
2025کے مقابلے میں جی ڈی پی گروتھ کے تخمینے میں صفر اعشاریہ 1فیصد کمی ترسیلاتِ زر کے معمول پر آنے سے بیرونی مالی دباؤ بڑھنے کا امکان، عالمی بینک
اسلام آباد(آئی این پی )عالمی بینک نے پاکستان کی رواں مالی سال معاشی شرحِ نمو 3 فیصد رہنے کی پیش گوئی کی ہے اورجون 2025 کے مقابلے میں پاکستان کی جی ڈی پی گروتھ کے تخمینے میں اعشاریہ صفر 1 فیصد کمی کر دی ہے ۔عالمی بینک کی عالمی معاشی امکانات سے متعلق تازہ رپورٹ کے مطابق پاکستان کی مجموعی قومی پیداوار (جی ڈی پی) کی شرحِ نمو کے تخمینے میں صفر اعشاریہ ایک فیصد کمی کی گئی ہے جس کے بعد موجودہ مالی سال میں معاشی شرحِ نمو 3 فیصد رہنے کا امکان ظاہر کیا گیا ہے ، اس سے قبل حکومتی سطح پر اقتصادی ترقی کا ہدف4اعشاریہ 2فیصد مقرر کیا گیا تھا۔رپورٹ میں کہا گیا ہے کہ مالی سال 2026-27 کے دوران پاکستان کی معاشی شرحِ نمو3اعشاریہ 4فیصد تک پہنچ سکتی ہے ۔عالمی بینک کے مطابق حالیہ سیلاب کے بعد زرعی شعبے کی بحالی سے معیشت کو سہارا ملنے کی توقع ہے جبکہ تعمیرِ نو اور بحالی کے منصوبوں سے معاشی سرگرمیوں میں بہتری آ سکتی ہے ۔رپورٹ میں بتایا گیا ہے کہ غذائی اشیا کی قیمتوں میں کمی کے باعث مہنگائی کی شرح میں بتدریج کمی کا امکان ہے ، درآمدات میں ممکنہ اضافے کے باعث کرنٹ اکاؤنٹ خسارے میں بھی اضافہ ہو سکتا ہے ، ترسیلاتِ زر کے معمول پر آنے سے بیرونی مالی دباؤ بڑھنے کا امکان بھی ظاہر کیا گیا ہے ۔
