جنگل کے مینڈکوں کیلئے ہاتھی ایک محفوظ پناہ گاہ کا سبب
یوں تو اس زمین پر موجود تمام جانداروں کا وجود دوسرے جانداروں کیلئے بے حد ضروری ہے
لاہور(نیٹ نیوز)یوں تو اس زمین پر موجود تمام جانداروں کا وجود دوسرے جانداروں کیلئے بے حد ضروری ہے تاہم حال ہی میں ایک ایسی دریافت سامنے آئی جس نے ماہرین کو بھی حیران کردیا۔میانمار کے جنگلوں میں تحقیق کرنے والے چند ماہرین نے دیکھا کہ وہاں موجود ہاتھی، جنگل کے مینڈکوں کیلئے ایک محفوظ پناہ گاہ کا سبب تھے ۔ یہ پناہ گاہ ہاتھی کے پاؤں سے بننے والا گڑھا تھا جہاں مینڈکوں نے رہنا شروع کردیا تھا۔ماہرین کے مطابق ہاتھی کے پاؤں سے پڑنے والے گڑھے بارشوں میں جب پانی سے بھر جاتے ہیں تو اس وقت یہ ننھے مینڈکوںکیلئے نہایت محفوظ پناہ گاہ بن جاتے ہیں۔مادہ مینڈک یہاں پر انڈے دیتی ہیں اور انڈوں سے بچے نکلنے کے بعد ننھے مینڈک طاقتور ہونے تک انہی تالاب نما گڑھوں میں رہتے تھے ۔ماہرین کا کہنا ہے کہ چونکہ ہاتھی کے وزن کی وجہ سے اس کے پاؤں سے پڑنے والا گڑھا خاصا گہرا ہوتا ہے لہٰذا یہ خاصے وقت تک قائم رہتا ہے ۔ ماہرین نے ہاتھیوں کی اس خاصیت کی وجہ سے انہیں ایکو سسٹم انجینئرز کا نام دیا ہے ۔ان کا کہنا ہے کہ ہاتھی ایکو سسٹم کا ایک اہم حصہ ہیں۔ یہ بیجوں کے پھیلانے اور اس طرح کے عارضی تالاب تشکیل دینے میں معاون ثابت ہوتے ہیں جبکہ یہ اپنی خوراک کیلئے درختوں کی شاخوں کو توڑتے ہیں جس سے بعد ازاں دیگر جانور بھی فائدہ اٹھاتے ہیں۔
