تین باتیں

آدمی اپنی زندگی میں بے شمار باتیں سنتا، پڑھتا اور دیکھتا ہے۔ کچھ یاد رہ جاتی ہیں، بیشتر ذہن سے نکل جاتی ہیں کہ رب تعالیٰ کے بنائے ہوئے اس کمپیوٹر کا باتیں ریکارڈ میں رکھنے اور غیر ضروری فائلیں ڈیلیٹ کرنے کا اپنا ایک سسٹم ہے۔ جس بات کی کچھ عرصے تک ضرورت نہ پڑے، انسانی ذہن اسے اپنی طرف سے ردی کے ڈھیر کا حصہ سمجھ لیتا ہے اور پھر رفتہ رفتہ وہ دماغ کی ہارڈ ڈسک سے ڈیلیٹ ہو جاتی ہیں۔ ایسا بھی ہوتا ہے کہ ہم کسی خاص واقعے یا بات کو زیادہ اہمیت نہیں دے رہے ہوتے، دیکھ کر یا سن کر اپنی طرف سے اسے ذہن سے نکال دیتے ہیں، لیکن اس نے جذباتی سطح پر ایک خاص تاثر قائم کر دیا ہوتا ہے، اس لئے لاشعور اسے محفوظ کر لیتا ہے۔ برسوں بعد وہ واقعہ اچانک یاد آتا ہے اور ایسی صحت اور درستگی کے ساتھ کہ آدمی حیرت زدہ رہ جاتا ہے۔ بعض باتیں البتہ انسان دل و جاں سے یاد رکھنا چاہتا ہے اور وہ یاد بھی رہ جاتی ہیں، انہیں بھولنے کا سوال ہی پیدا نہیں ہوتا۔ رمضان کا تصور آتے ہی میرے ذہن کی سکرین پر دو تین ایسی باتیں جھلملانے لگتی ہیں، جنہیں میں کبھی بھلا نہیں پایا۔ ہر سال ماہ رمضان میں وہ باتیں بے طرح یاد آتی ہیں۔ ان پر عمل نہ ہو سکے، یہ دوسری بات ہے، لیکن ان کی افادیت اور تاثر پہلے دن کی مانند تروتازہ اور گہرا ہے۔
چند سال پہلے ایک طالب علم نے ایسی بات کہی‘ جو تیر کی طرح دل میں کھب گئی۔ اس بے چارے نے طنز کے طور پر نہیں کہا تھا، بلکہ روانی میں ایک فقرہ کہہ دیا، لیکن سچی بات ہے کہ اس وقت کی ندامت کا آج بھی تصور کروں تو پیشانی نم آلود ہو جاتی ہے۔ ان دنوں روزنامہ 'دنیا‘ شروع نہیں ہوا تھا۔ میں ایک اور اخبار میں کام کر رہا تھا۔ ایک دن دفتر کے گیٹ سے فون آیا کہ کوئی نوجوان مجھ سے ملنے آیا ہے۔ اخبار کے دفاتر میں کام کرنے والوں، خاص طور پر میگزین کے لوگوں کے اوقات کار متعین نہیں ہوتے۔ کسی بھی وقت کوئی بڑا واقعہ ہو سکتا ہے، جس پر فوری خصوصی اشاعت کی تیاری کرنا پڑتی ہے۔ ایک تو صحافیوں کی اپنی زندگی منتشر اور کسی شیڈول سے عاری ہوتی ہے، اوپر سے اس انداز کی دفتری مصروفیت... ایسے میں ملاقاتیوں سے ملنا آسان نہیں رہتا۔ آج بھی فیس بک یا ای میل کے ذریعے کسی قاری کا پیغام ملتا ہے کہ وہ ملنا چاہتا ہے تو میں مشکل میں پڑ جاتا ہوں۔ صاف انکار سے دل شکنی کا خدشہ ہوتا ہے اور یہ سوچ بھی دامن گیر رہتی ہے کہ اگر اسے کوئی خاص وقت دے کر بلا لیا‘ تو اس وقت نجانے کام کی کیا پوزیشن ہو، ہو سکتا ہے چند منٹ بھی نکالنا ممکن نہ ہوں۔ سب سے مشکل کام دوستوں اور قارئین کو یہ بات سمجھانا ہے۔ خیر اس روز کام کا دبائو کم تھا، نیچے ملاقات کے لئے مخصوص کمرے میں آیا۔ ایک دبلا پتلا نوجوان بیٹھا تھا۔ رسمی فقروں کے بعد اس نے بتایا کہ وہ فیصل آباد سے لاہور کتابیں خریدنے آیا ہے۔ پڑھنے کا بہت شوق ہے، جیسے ہی کچھ پیسے جمع ہوں، کتابیں لینے لاہور کا رخ کرتا ہے۔ اس سے گپ شپ ہوتی رہی، میں نے اسے ایک دو کتابوں کے نام بتائے کہ یہ ضرور لے لینا۔ کتابوں پر بات کرتے کرتے اس نے اچانک پوچھا، آپ کو کون سا ترجمہ قرآن پسند ہے؟ یہ سوال سن کر میں سٹپٹا سا گیا۔ اس وقت تک ترجمے سے قرآن پڑھا ہی نہیں تھا۔ کئی بار شروع کیا، مگر پھر ادھورا رہ جاتا۔ بچپن میں والد محترم کو سید مودودی کی تفسیر تفہیم القرآن پڑھتے دیکھتا تھا۔ ان کا معمول تھا کہ وہروزانہ ایک دو رکوع ترجمے اور تفسیر کے ساتھ بڑی توجہ سے پڑھتے اور کچھ دیر اس پر غور کرتے رہتے۔ مطالعہ کا شوق پیدا ہو چکا تھا، دو چار بار ہم نے بھی تفسیر پڑھنا شروع کی، مگر ہر بار ہوتا یہی کہ تھوڑی سی تلاوت کے بعد قرآن کے متن اور ترجمہ سے توجہ ہٹ کر تفسیری واقعات کی طرف چلی جاتی، خاص طور پر جہاں قصص القرآن بڑی صراحت کے ساتھ بیان کئے گئے تھے۔ برسوں بعد میں نے قرآن آسان تحریک والوں کا دو رنگوں میں طبع شدہ قرآن پاک دیکھا۔ نہایت خوشنما، ہر حرف کا الگ الگ مطلب بیان کیا گیا، ایسا لگا کہ اب قرآن کو سمجھنا بہت آسان ہو جائے گا۔ پڑھنے کی کوشش کی تو اندازہ ہوا کہ حرف حرف کو الگ
الگ پڑھنے سے وہ روانی پیدا نہیں ہو رہی اور اس طرح سے قرآن سمجھنا آسان تو ہے، لیکن اس کے لئے جس نے پہلے ترجمہ پڑھ رکھا ہو اور وہ قرآن فہمی کی نیت سے پڑھ رہا ہو۔ سید قاسم محمود کے شائع کردہ شاہکار ترجمہ قرآن نے البتہ متاثر کیا، اس میں مولانا فتح محمد جالندھری کے مشہور ترجمے کے ساتھ مولانا مودودی کا بامحاورہ ترجمہ اور ساتھ ہی علامہ عبداللہ یوسف علی کا انگریزی ترجمہ بھی دیا گیا تھا۔ ضروری تفسیری حاشیے بھی موجود ہیں۔ اپنی نوعیت کا یہ منفرد کام ہے۔ ہاسٹل کے زمانے کے ہمارے ایک دوست بڑے ذوق و شوق سے علامہ عبداللہ یوسف علی کا انگریزی ترجمہ قرآن پڑھا کرتے تھے۔ ان کے بقول قرآن کے اردو ترجمے کی نسبت اس انگریزی ترجمے سے زیادہ بہتر انداز میں مفہوم سمجھ آ جاتا ہے۔
خیر بات اس لڑکے کے سوال کی ہو رہی تھی۔ ندامت سے شرابور لہجہ میں جواب دیا کہ ترجمہ قرآن کے حوالے سے میں رہنمائی نہیں کر سکتا کہ میں نے خود ترجمہ ابھی تک نہیں پڑھا۔ مہمان نے بے ساختہ کہا، ''مطالعہ میں اتنی دلچسپی اور کتابوں سے اس قدر محبت کے باوجود دنیا کی عظیم ترین کتاب کو ابھی تک نہیں پڑھا؟‘‘ اس وقت تو کچھ نہ کہہ سکا؛ البتہ اس سے چند سال پہلے کراچی میں بھی ایک ایسا ہی واقعہ ہوا تھا، جس کے بعد اس کوتاہی کو دور کرنے کا سوچا تھا، لیکن عمل نہیں کر سکا۔ اس نوجوان سے
ہونے والے مکالمے کے چند ہفتوں بعد ماہ رمضان شروع ہو رہا تھا۔ یکم رمضان سے ایک ایک سپارے کا ترجمہ پڑھنا شروع کیا۔ طریقہ یہ نکالا کہ پہلے کچھ تلاوت کر لی، پھر براہ راست ترجمہ قرآن ہی پڑھنا شروع کر دیا، آدھے پونے گھنٹے میں ایک سپارہ پڑھا جاتا ہے۔ تلاوت پھر بے شک دن میں جتنی بار کر لو، لیکن ترجمہ روانی اور تسلسل کے ساتھ اگر پڑھ لیا جائے تو جلدی بیس پچیس دنوں میں پورا قرآن ترجمہ کے ساتھ پڑھا جاتا ہے۔ ایک بات پورے یقین کے ساتھ لکھی جا سکتی ہے کہ ترجمہ قرآن جو بھی ہو، اسے پڑھنے والے پر قرآن کی عظمت جس طرح منکشف ہوتی ہے، صرف تلاوت کرنے والے کو شاید برسوں اس کا اندازہ نہ ہو سکے۔ اللہ کا کلام پڑھتے ہی معلوم ہو جاتا ہے کہ یہ واقعتاً رب عظیم کا کلام ہے، سچا، برحق کلام۔ ایک ایک سطر سے اللہ تعالیٰ کی عظمت، جلال، حکمت اور شان و شوکت جھلکتی ہے۔ ایک اور بات یقین سے کہی جا سکتی ہے کہ دو تین بار ترجمہ قرآن پاک غور سے پڑھنے کے بعد کئی مسلکی کمزوریوں اور خامیوں سے بھی جان چھوٹ جائے گی۔ اکابر پرستی ہو یا مقابر پرستی... ہر ایک کا خاتمہ ہو جاتا ہے۔ خلوص نیت سے پڑھنے والے کو کلام اللہ سیدھے راستے پر لے آتا ہے، اس کے ساتھ جو غیر معمولی طمانیت، سکون اور راحت ملتی ہے، اسے بونس سمجھنا چاہیے۔ جس کسی کو اس عظیم الشان تجربے سے گزرنے کا اتفاق نہیں ہوا، اس رمضان مبارک میں وہ آزما سکتا ہے۔ کالم کی گنجائش ختم گئی، دو باتیں رہ گئیں، ان پر انشااللہ اگلی بار بات کریں گے۔

روزنامہ دنیا ایپ انسٹال کریں