آئی ڈی پیز انگریزوں کیلئے قربانی دے رہے ہیں؟

شمالی وزیرستان کے آئی ڈی پیز کن حالات سے گزر رہے ہیں‘ آپریشن ضرب عضب کس مرحلے میں ہے اور دہشت گردوں کو کتنا نقصان پہنچا ہے ‘ میڈیا میں اس بارے مختلف آراء آ رہی ہیں۔ کبھی کہا جا رہا ہے یہ آپریشن کئی برس ختم نہیں ہو گا‘ کوئی کہہ رہا ہے لاکھوں افراد کھلے آسمان تلے پڑے ہیں اور کسی کے مطابق لاکھوں مزید افراد کی نقل مکانی کا امکان ہے۔ اب ذرا یہ حقائق بھی ملاحظہ فرمائیں۔ تازہ ترین اطلاعات کے مطابق 93خاندان بنوں سے واپس اپنے گائوں ایدک پہنچ گئے ہیں۔ یہ گائوں شمالی وزیرستان کی تحصیل میر علی میں واقع ہے۔ چند ماہ قبل ڈی جی آئی ایس پی آر میجر جنرل عاصم سلیم باجوہ نے ایڈیٹرز اور کالم نگاروں کو ایک بریفنگ میں بتایا تھا کہ فاٹا کی سات میں سے چھ ایجنسیاں فوج پہلے ہی کلیئر کر چکی ہے۔ جہاں تک شمالی وزیرستان کی بات ہے اس میں بھی صرف تین علاقے ایسے ہیںجو شدت پسندوں کے گڑھ سمجھے جاتے ہیں۔ یہ علاقے میرعلی ‘میران شاہ اور دتہ خیل ہیں۔ میر علی ایک طرف سے بنوں اور دوسری جانب افغان سرحد سے جا ملتا ہے۔یہ طالبان کا گڑھ سمجھا جاتا تھا۔ اگر 93 خاندان میر علی میں اپنے آبائی گائوں واپس پہنچ چکے ہیں تو یہ اس امر کی دلیل ہے کہ آپریشن تکمیل کی طرف بڑھ رہا ہے۔دہشت گردوں کا دوسرا بڑا ٹھکانہ دتہ خیل ہے۔اس کے اکثر علاقے افغان سرحد کے قریب واقع ہیں۔ شمالی وزیرستان میں سب سے زیادہ پہاڑی سلسلے اور گھنے جنگلات بھی اسی علاقے میں ہیں۔ روس کے خلاف جہاد کے دنوں میں اس علاقے کو ''مجاہدین‘‘ روس کے خلاف جنگ میں اپنے مضبوط ٹھکانوں کے طورپر استعمال کرتے تھے۔

افغانستان میں طالبان حکومت کے خاتمے کے بعد زیادہ تر ملکی اور غیر ملکی جنگجوؤں نے جنوبی و شمالی وزیرستان کا رُخ کیا۔ پہلے پہل وزیرستان آنے والے ان جنگجوؤں نے عام شہریوں کے ساتھ رہائش اختیار کی۔مگر جب پاکستانی سکیورٹی فورسز نے ان کے خلاف کارروائیوں کا آغاز کیا تو طالبان جنگجوؤں نے اپنے ٹھکانے دتہ خیل جیسے بلند پہاڑی سلسلوں اور گھنے جنگلات میں قائم کر لیے۔ دہشت گردوں کا تیسرا بڑ اہیڈکوارٹر میران شاہ ہے۔ یہ شمالی وزیرستان کا صدر مقام ہے ۔ اس کی سرحدیں ایک طرف افغانستان جبکہ دوسری طرف بنوں، کرم ایجنسی اور جنوبی وزیرستان سے لگتی ہیں۔حالیہ آپریشن کے بعد فوج میران شاہ کا چالیس فیصد علاقہ مکمل طور پر کلیئر کر چکی ہے اور اب تک چار سو سے زائد دہشت گرد مارے جا چکے ہیں۔رفتار یہی رہی تو کوئی شک نہیں کہ فوج بقایا علاقے بھی جلد کلیئر کر دے گی اور آئی ڈی پیز یہ عید اپنے گھروں میں منا سکیں گے۔ سوات آپریشن کے وقت بھی یہی کہا جا رہا تھا کہ یہ آپریشن برسوں چلے گا لیکن سب نے دیکھا کہ 45دنوں میں سوات کو دہشت گردوں سے خالی کرا لیا گیا۔ آئی ایس پی آر تازہ بریفنگ کے ذریعے صحافیوں کو آپریشن کی موجودہ صورتحال سے آگاہ کردے تو تصویر مزید واضح ہو جائے گی۔ یہ تو آپریشن کی بات تھی‘ اب ہم آئی ڈی پیز کی طرف واپس آتے ہیں۔شمالی وزیرستان سے نقل مکانی کرنے والے تقریباً سات لاکھ افراد کی رجسٹریشن مکمل ہو چکی ہے۔ اسی فیصد آئی ڈی پیز بنوں اور ڈیرہ اسماعیل خان میں مقیم ہیں۔ یہاں کے لوگوں نے واقعتاً انصار مدینہ کی یاد تازہ کر دی ہے کہ جب لوگوں نے اپنے گھر ‘ اپنا

سامان اور اپنا مال مہاجرین کے لئے وقف کر دیا تھا۔ اگر آپ بنوں جائیں‘ آپ حیران رہ جائیں گے کہ آپ کو نہ تو اس طرح کی خیمہ بستیاں نظر آئیں گی جیسی سوات میں بنائی گئی تھیں اور نہ ہی کھلے آسمان تلے لوگ بے یارومددگار دکھائی دیں گے۔ اس وقت صرف چند ہزار لوگ عارضی خیمہ بستیوں میں مقیم ہیں جبکہ پانچ لاکھ سے زائد لوگوں کو عوام نے اپنے گھروں میں جگہ دے دی ہے۔ اگر کسی کا تین کمرے کا گھر ہے تو وہ فیملی خود ایک کمرے تک محیط ہو گئی ہے۔ اسی طرح کسی کا حجرہ یا ڈیرہ ہے تو دو دو سو افرا د وہاں مہمان بن چکے ہیں۔ اسی طرح سکولوں و کالجوں میں بھی بڑی تعداد مقیم ہے۔ ایک شخص نے بتایا‘ اس کا اسی لاکھ کا گھر تھا‘ اس نے پورا گھر آئی ڈی پیز کیلئے وقف کر دیا اور خود گھر کے ساتھ موجود کوارٹر میں رہ رہا ہے۔ جن فیملیوں کی رجسٹریشن ہو چکی ہے‘ ان کے سربراہ کو حکومت کی طرف سے ایک ماہ کا راشن مل جاتا ہے۔ اس کے علاوہ ہر فیملی کو چالیس ہزار روپے ماہانہ دئیے جا رہے ہیں۔ شمالی وزیرستان سے آنے والے خاندانوں کی اکثریت خوشحال تھی۔ یہ ٹینٹوں میں رہ بھی نہیں سکتے تھے۔ ان میں سے اکثر کاروباری ہیں اور بیشتر کے رشتہ دارامریکہ اور یورپ میں مقیم ہیں۔ ان لوگوں کا گناہ یہی تھا کہ وہ دہشت گردوں کے درمیان رہ رہے تھے یا پھر انہیں مجبوراً خاموش رہنا پڑتا تھا کیونکہ طالبان کے بارے میں اطلاع دینے والے کا انجام موت یا اغوا کی صورت میں نکلتا تھا۔ اب لوگوں میں ہمت آنے لگی ہے۔ کچھ دہشت گردوں نے سامان اور ٹرنکوں میں چھپ کر آنے کی کوشش کی تو لوگوں نے شور مچا دیا‘ اس طرح درجنوں زندہ گرفتار ہو گئے۔

یہاں سوال یہ ہے کہ کیا آئی ڈی پیز کی خدمت صرف بنوں کے عوام کا فریضہ ہے اور کیا یہ لاکھوں آئی ڈی پیز انگریزوں کے لئے قربانی دے رہے ہیں۔ آپریشن کی ٹائمنگ اس لحاظ سے اہم تھی کہ یہ رمضان المبارک سے چند روز قبل شروع ہوا۔ رمضان میں مسلمان زکوٰۃ بھی دیتے ہیں اور صدقات بھی۔پاکستانی قوم ویسے بھی سالانہ نوے ارب روپے صدقات و خیرات میں دے دیتی ہے۔ اس لحاظ سے یہ بہترین موقع ہے کہ اپنے ملک کو بچانے کے لئے اپنامال اپنے وطن کے نام کر دیا جائے۔آرمی‘ صوبائی حکومتیں اور فلاحی تنظیمیں ہمیشہ کی طرح متاثرین کی مدد کر رہی ہیں۔ ہونا تو یہ چاہیے کہ یہ سب چیزیں چینلائز ہوں اور تمام چھوٹی بڑی تنظیمیں کسی ایک حکومتی ادارے کو عطیات اور سامان وغیرہ جمع کرائیں، تاکہ یہ اندازہ بھی رہے کہ کس قدر امداد کی جا چکی ہے،کیونکہ اس طرح بعض لوگ تو چار چار مرتبہ راشن لے لیتے ہیں اور کسی کو ایک مرتبہ بھی نہیں ملتا۔ آئی ڈی پیز کے بارے میں تازہ صورتحال ڈاکٹر آصف جاہ سے معلوم ہوئی۔ وہ ہمیشہ کی طرح اپنی ٹیم لے کر بنوں پہنچ چکے ہیں۔ سیلاب‘ زلزلے ‘ قحط اور سوات آپریشن میں ان کی خدمات گراں قدر ہیں۔ ایسے لوگوں کو قومی سطح پر سراہا جانا چاہیے۔ ڈاکٹر صاحب کے مطابق بنوں کے درد دل رکھنے والوں نے آئی ڈی پیز کو اپنے اندر ایسے سمو لیا ہے جیسے مرغی اپنے بچوں کو پروں تلے چھپا لیتی ہے۔ لوگوں نے اپنے دروازے‘ حجرے‘ بنگلے ‘ دالان اور بیٹھکیںتک آئی ڈی پیز کے لئے خالی کر دی ہیں۔ یہی وجہ ہے کہ سوات آپریشن کے دوران جس طرح میڈیا نے کیمپوں میں لوگوں کی حالت زار دکھائی تھی‘ اب کی بار ویسے مناظر سامنے نہیں آئے ۔ اس ساری کہانی میں حکومت کا کردار سب سے کمزور ہے۔ پہلے ماڈل ٹائون آپریشن کر کے قوم کی توجہ فوجی آپریشن سے ہٹائی گئی اور اب جب آپریشن کامیابی سے ہمکنار ہو رہا ہے تو آئی ڈی پیز کا ویسے خیال نہیں رکھا جا رہا جیسے بنوں اور ڈیرہ اسماعیل خان کے عوام رکھ رہے ہیں۔ ایک تو یہ لوگ گھر بار چھوڑ کر یہاں آئے ہیں‘ اوپر سے یہاں لوڈشیڈنگ دیگر علاقوں کی طرح جاری ہے۔ گرمی بھی شدید ہے اور روزے بھی چل رہے ہیں۔ حکومت کچھ تو خدا کا خوف کرے۔ اگر انہیں ریلیف نہیں دے سکتی تو تکلیف تو نہ دے۔یہ اور کچھ نہیں کر سکتی تو بنوں جیسے علاقوں کو لوڈشیڈنگ فری قرار دے دے تاکہ متاثرین کو احساس ہو کہ کہیں تو حکومت ان کے ساتھ ہے اور اگر حکمران یہ بھی نہیں کر سکتے تو پھر اس وقت کا انتظار کریں‘ جب ظلم سے تنگ آئے لوگ آستینیں چڑھا لیں گے ‘ یہ ڈاکٹر طاہر القادری جیسے ''رہنمائوں‘‘ کا ہاتھ تھام لیں گے اور انقلاب کا یہ ڈرامہ ‘ سچ مچ آگ اور خون کے کھیل میں بدل جائے گا!