مرہم کا موسم

کیویز کی سر زمین پر نیوزی لینڈ کی تاریخ نے یہ منظر پہلی بار دیکھا۔ کلامِ الٰہی میں سے سورہ بقرہ کی آیت نمبر 153 سے 156 تک کی تلاوت‘ جس کا ترجمہ یہ ہے:

''اے ایمان والو! صبر اور نماز سے مدد چاہو بے شک اللہ صبر کرنے والوں کے ساتھ ہے۔ اور جو خدا کی راہ میں مارے جائیں انہیں مردہ نہ کہو بلکہ وہ زندہ ہیں ہاں تمہیں خبر نہیں۔ اور ضرور ہم تمہیں آزمائیں گے کچھ ڈر اور بھوک سے اور مالوں اور جانوں اور پھلوں کی کمی سے اور خوش خبری سنا ان صبر والوں کو کہ جب ان پر کوئی مصیبت پڑے تو کہیں ہم اللہ کا مال ہیں اور ہم کو اسی کی طرف پھرنا ہے‘‘۔

47/48 لاکھ آبادی کے ملک کی منتخب وزیرِ اعظم جیسنڈا آرڈرن اس تباہ کن مرحلے پر عالمی مدبر بن کر سامنے آئیں۔ مدبر ماں کہنا زیادہ مناسب ہو گا اور مسلم دکھیاریوں کی بہن بھی۔ عام سی شکل و صورت والی اِس آئرن لیڈی کو شہید نمازیوں کے بے گناہ خون نے ہلا کر رکھ دیا؛ چنانچہ جیسنڈا آرڈرن نے 15مارچ کو کرائسٹ چرچ فائرنگ کی خبر ملتے ہی سر پر دوپٹہ پہنا اور دوپٹے والی مسلم خواتین کو گلے سے جا لگایا۔ وزیر اعظم نیوزی لینڈ کے چہرے سے اجڑی ہوئی گودوں کا نوحہ عیاں تھا‘ جسے دیکھ کر دنیا کے کروڑوں نارمل ذہنوں میں یہ بات راسخ ہو گئی کہ ریاست ماں کے جیسی ہوتی ہے۔ جیسنڈا آرڈرن نے Shallow leaders کی طرح مظلوموں کے ساتھ فوٹو سیشن نہیں کیا بلکہ فرسٹ ری ایکشن سے لے کر نیوزی لینڈ کی پارلیمنٹ کے اولین اجلاس تک اپنے شہریوں کے درد کا لبادہ اوڑھ لیا۔ فرسٹ ری ایکشن کے ذکر سے مجھے جیسنڈا آرڈرن کی ٹی وی پر پہلی گفتگو یاد آ رہی ہے۔ یقین کیجیے مجھے یوں لگا جیسے محکمہ پولیس یا شیرف ڈیپارٹمنٹ کی کوئی سپوکس پرسن حادثے کی تفصیلات بتانے ٹی وی سکرینوں پر آئی ہے۔ پھر غور سے دیکھا تو پتہ چلا کہ دھان پان سی یہ خاتون نیوزی لینڈ کی منتخب چیف ایگزیکٹو ہیں‘ جو اپنے ملک کی مسلم اقلیت پر سب سے پہلے خود بول رہی ہیں۔ نیوزی لینڈ ان مما لک میں سے ایک ہے‘ جو فلاحی ریاست کہلاتے ہیں‘ جس طرح نام رکھ دینے سے کوئی ملک جمہوریہ‘ ری پبلک، اسلامیہ وغیرہ نہیں بن جاتا‘ اسی طرح سے فلاحی ریاست کا نا م رکھ دینے سے ملک ویلفیئر سٹیٹ نہیں بن سکتا۔ فلاحی ریاست بننے کے لیے ایک خاص طرزِ عمل اور سوچ درکار ہے جس کا عملی مظاہرہ وزیر اعظم جیسنڈا آرڈرن نے کیا۔ اس کے چند خاص پہلو یوں ملاحظہ ہو سکتے ہیں۔ یہ کہنے کی ضرورت نہیں کہ نیوزی لینڈر وزیرِ اعظم اول و آخر گوری ہیں۔ شہید نمازی مسلمان اور تقریباً سارے ہی ایشین ہیں۔ ہمارے آئین کا آرٹیکل نمبر 4 اور 25‘ دونوں ہی شہریوں کی برابری کی بنیاد فراہم کرتے ہیں۔ وہ بھی نا قابلِ تنسیخ بنیادی حقوق (Fundamental Rights) کے طور پر۔ وزیرِ اعظم جیسنڈا آرڈرن نے لفظوں کا قیمہ کیے بغیر معرکہ آرا غیر متزلزل کردار کا مظاہرہ کیا۔ پہلے دن سے گورے دہشت گرد کو دہشت گرد اور بزدل نسل پرست کہہ کر پکارا ۔ اسے محض جنونی ماننے سے انکار کر دیا۔ برینٹن کو ذہنی مریض کے لبادے میں بھی نہیں ڈھانپا ۔ جیسنڈا آرڈرن نے پو ری نسوانی وجاہت اور ہمت سے کہا: شہرت کے اس بھوکے کو بے نام کر دوں گی ۔ اپنے کسی خطاب میں پی ایم نے برینٹن کو دہشت گرد اور بزدل قاتل کے علاوہ کسی دوسرے نام سے نہیں پکارا ۔ یہ بھی مغرب کی تاریخ میں پہلی مر تبہ ہوا کہ کسی ریاست کے سربراہ نے کالی بھیڑ کو کالی بھیڑ کے علاوہ کچھ اور کہنے سے برملا انکار کر دیا ۔ وزیرِ اعظم جیسنڈا آرڈرن کے اس دلیرانہ موقف پر پوری قوم ان کی پشت پر آ کھڑی ہوئی۔ کرائسٹ چرچ کے چرچ، کرائسٹ چرچ شہر کے چوک، میونسپلٹی، حکومتی ادارے اور شہری مظلوم مسلم روحوں کے ہم نوا بن گئے ۔ جیسنڈا آرڈرن کا دوسرا تاریخ ساز موقف تب سامنے آیا‘ جب امریکی صدر ڈونلڈ جے ٹرمپ نے اُنہیں کرائسٹ چرچ فائرنگ کے واقعہ پر ہمدردی کے اظہار کے لئے ٹیلیفون کال کی ۔

ڈی جے ٹرمپ نے وزیرِ اعظم جیسنڈا سے پو چھا:

Prime Minister, What can I do on the christ Chruch killing incident?

جیسنڈا کے جواب نے نہ صرف سپر طاقت اور چھوٹے ملک کے درمیان ڈائیلاگ کی تاریخ بدل کر رکھ دی بلکہ ڈی جے ٹرمپ کو بھی لا جواب کر دیا۔ کیوی وزیر اعظم نے کہا:

Mr. President Show solidarity with the victims of christ Chruch .

جیسنڈا کے اس تاریخی مکالمے کا پہلا نتیجہ یہ نکلا کہ امریکی صدر ٹرمپ کو اپنی متنازعہ ٹویٹ واپس لینا پڑ گئی‘ جس کے ذریعے اس نے نسل پرستانہ مؤقف کو پروموٹ کیا تھا۔ کیویز کی لیڈر نے پھر اپنے من کی سچائی اور مؤقف کی پختگی کے عملی اقدامات کی پوری سیریز چلا دی۔ نیوزی لینڈ میں اذان نشر کرنے کا اقدام۔ پورے ملک میں سرکاری طور سوگ منانے کا اقدام۔ سب سے بڑے چرچ میں سفید جوڑوں کا مظاہرہ۔ مختلف ادیان، تہذیبوں اور سوچ کے کمیونٹی لیڈرز ایک جگہ جمع کر کے مسلمانوں کی دل جوئی۔ آٹو میٹک، سیمی آٹو میٹک اور فوجی طرز کی گنوں پر پابندی۔ زخمیوں، شہید نمازیوں اور ان کے خاندانوںکے لئے ہر طرح سے سہولت کاری ۔ جیسنڈا آرڈرن کے پے در پے اقدامات سے یوں لگتا ہے جیسے کیویز کی سر زمین پر مرہم کا موسم اتر آیا ہے۔

وہ عزم ہو کہ منزلِ بیدار ہنس پڑے

ہر نقشِ پا پہ جرأتِ رہوار ہنس پڑے

اب کے برس بہار کی صورت بدل گئی

زخموں میں آگ لگ گئی گلزار ہنس پڑے

مٹ جائے تیرے نام سے ہر تلخیِ جفا!

وہ کام کر کہ بے کس و نادار ہنس پڑے

میرے جنوں نے آج وہ سجدہ ادا کیا!

بت خانۂ حیات کے آثار ہنس پڑے

پھر شادماں ہوئے ہیں خرابے حیات کے

ساغرؔ کسی کے گیسوئے خم دار ہنس پڑے

پچھلے چند عشروں میں اسلامو فوبیا کی جو انجینئرڈ لہر اٹھائی گئی اس کے پیچھے سیاست تھی۔ مسلم آزاری پر مبنی اس جدید سیاست کی اسفل ترین مثال ڈونلڈ ٹرمپ سے ملتی ہے۔ بے پناہ طاقت کے زعم میں مبتلا امریکی صدر چاہتے تھے کہ دنیا اس طرزِ سیاست کو نیو ورلڈ آرڈر مان لے‘ مگر ایسا نہ ہو سکا۔ مغرب کے لیڈروں میں سے وہ لوگ جو ٹرمپ کا سامنا کرنے سے کتراتے تھے‘ ان کا ڈر جیسنڈا آرڈرن نے پرے اُٹھا مارا۔ اس ایک خاتون کے بلند عزم نے نیوزی لینڈ میں ایک اور ایسا منظر دکھا دیا‘ جس کا مظاہرہ کسی دوسرے ملک میں نہیں ہوا۔ اور وہ یہ کہ یہودیت کے ماننے والوں نے بھی کرائسٹ چرچ کے سانحے پر مسلمانوں کے ساتھ اظہارِ یکجہتی کے لیے سوگ منایا۔ جیسنڈا کے دستِ شفا کی اور کوئی تاثیر ہو نہ ہو اس نے نیو نازی ازم کے زخم خوردہ مغربی سماج کو بھی مرہم فراہم کر دیا ہے‘ جس کا پہلا نتیجہ یہ ہے کہ مغرب کی جدید تعلیم یافتہ یوتھ نے اسلامو فوبیا کے سب سے بڑے پرچارک کا گھر سے نکلنا مشکل بنا کر رکھ دیا۔ آسٹریلیا کا سینیٹر جسے پہلے ''EGG-Boy‘‘ نے ایکسپوز کر دیا۔ جیسنڈا آرڈرن کی مثال قابلِ توصیف کم قابلِ تقلید زیادہ ہے۔ سیدنا علی کرم اللہ وجہہ کے ایک قول کا مفہوم یہ ہے: معاشرہ کفر کے نظام پر چل سکتا ہے ظلم کے نظام پر نہیں۔ چلیے جیسنڈا آرڈرن نے ایک بات تو طے کر دی‘ ظالم کسی ریاست کا رشتے دار نہیں ہو سکتا‘ اور مظلوم کسی ریاست سے نظر انداز نہیں ہو سکتا۔

روزنامہ دنیا ایپ انسٹال کریں