آئین کا آرٹیکل پندرہ پچیس چھبیس اور ساڑھے پانچ

گزشتہ دو دن تکلیف دہ تھے البتہ گزشتہ رات بڑی آرام دہ تھی۔ مزے کی بات یہ ہے کہ دن کی تکلیف اور رات کی راحت کا ایک ہی سبب تھا۔ ملتان میں وی آئی پی آئے ہوئے تھے۔ ایک چھوڑ تین تین وی آئی پیز۔ وضاحت کی نہ تو ضرورت ہے اور نہ ہی حوصلہ۔ بس پاکستان میں وی آئی پی‘ وی آئی پی ہوتا ہے اور باقی لوگ مثل کیڑے مکوڑے۔ آئین کے آرٹیکل آٹھ تا اٹھائیس بنیادی حقوق کے متعلق ہیں مگر یہ حقوق صرف آئین کے صفحات تک تو بالکل ٹھیک، عام آدمی کی زندگی میں ان اکیس آرٹیکلز کا کوئی عمل دخل نظر نہیں آتا۔

پرسوں شام میں گھر سے نکلا۔ زکریا ٹائون کی مین سٹریٹ سے جب بوسن روڈ پر چڑھ کر دائیں طرف گاڑی موڑنے کا اشارہ لگایا تو ایک ٹریفک سارجنٹ نے اپنی بھاری بھر کم موٹر سائیکل میری گاڑی کے آگے لگا دی اور اپنی موٹر سائیکل پر لگے ہوئے لائوڈ سپیکر سے اعلان کیا کہ دائیں مڑنا منع ہے؛ البتہ بائیں طرف جایا جا سکتا ہے،اس نے مجھے بھی ہاتھ ہلا کر بائیں طرف جانے کا اشارہ کیا۔ میں نے اسے بتایا کہ مجھے دائیں طرف جانا ہے، اس نے میری بات سنی ان سنی کرتے ہوئے کہا کہ فی الحال آپ بائیں طرف جائیں۔ میں نے کہا مجھے بائیں طرف کوئی کام نہیں، مجھے دائیں طرف جانا ہے۔ اس نے مجھ سے بحث فضول سمجھی‘ موٹر سائیکل میری گاڑی کے بونٹ سے جوڑکر سٹینڈ پر لگایا اور خود سڑک پرگزرنے والی ٹریفک کو اپنا ہاتھ تیزی سے ہلاتے ہوئے''سپیڈو سپیڈ‘‘گزرنے کا اشارہ کرنا شروع کردیا۔ میں نے دیکھا کہ بوسن روڈ پر میرے سامنے ڈیوائیڈر میں موجود کٹ کے پار زکریا ٹائون میں داخل ہونے والی گاڑیوں کی ایک لمبی قطارکو ایک اور ٹریفک وارڈن نے روک رکھا تھا۔ اس نے دوسری جانب اپنی موٹر سائیکل اسی پوزیشن میں لگا رکھی تھی۔ اسی اثنا میں میرے پیچھے گاڑیوں کی ایک لمبی قطار لگ گئی جس کی وجہ سے زکریا ٹائون میں داخلے کا راستہ بالکل بند ہوگیا۔ اب صورت حال یہ تھی کہ بوسن روڈ پر یونیورسٹی سے شہرکی جانب آنے والی ٹریفک،جس نے زکریا ٹائون جانا تھا بوسن روڈ پر جمع ہونا شروع ہو گئی۔ چند منٹ کے بعد ہی ہر طرف مکمل ''پھس پھسا‘‘ یعنی ٹریفک جام کی صورت حال پیدا ہو گئی۔ میں نے گاڑی سے نکل کر ٹریفک وارڈن سے پوچھا کہ کیا معاملہ ہے؟ اس نے میری طرف دیکھے بغیر جواب دیا: وی آئی پی موومنٹ ہے۔

چند منٹ کے بعد دو موٹر سائیکل‘ پھر ایک نیلی اور لال جگمگاتی بتی والی جیپ‘ پھر پولیس کے دو ڈالے‘ پھر ایک سیاہ کار‘ پھر تین ڈالے‘ پھر ایک ایمبولینس اور آخر میں ایک فائر بریگیڈ کی گاڑی گزری۔ جونہی یہ گاڑی گزری‘ وی آئی پی موٹرکیڈ ختم ہوا۔ دونوں طرف ٹریفک کو روکنے والے ٹریفک وارڈنز سلف سٹارٹ موٹر سائیکلوں پر لپک کر بیٹھے، موٹر سائیکلیں سٹارٹ کیں اور یہ جا وہ جا۔ ان کے روانہ ہوتے ہی دونوں طرف سے ٹریفک کا سیلاب امڈا اور سب کچھ آپس میں اس طرح گڈمڈ ہوا کہ کچھ سمجھ میں نہیں آ رہا تھا کہ کس نے کس طرف جانا ہے۔ آدھے گھنٹے کی جدوجہد کے بعد جب ہمیں راستہ ملا تو اندازہ لگایا کہ وی آئی پی کو اپنے گھر پہنچے بیس پچیس منٹ ہو چکے ہوں گے۔

میں رات دیر سے گھر آیا، قریب بارہ بجے۔ آ کر سو گیا؛ تاہم ارادہ کیا کہ صبح کسی وکیل کو مل کر پوچھتے ہیں کہ عام شہری کو حاصل آئینی حقوق سلب کرنا کیا آئین شکنی کے زمرے میں نہیں آتا؟ کیا صرف حکومتوںکا تختہ الٹنا ہی آئین کا تختہ الٹنا اور آئین شکنی ہے؟ آئین کے آرٹیکل پندرہ کے تحت حاصل نقل و حرکت کی آزادی اور آئین کے آرٹیکل پچیس کے تحت فرد کو حاصل مساوات کی آزادی کو سلب کرنے پر آئین کیا کہتا ہے؟ میں رات یہ مصمم ارادہ کر کے سویا کہ صبح کچہری جائوں گا اور اپنے حقوق کی پامالی پر کسی وکیل سے مشورہ کروں گا اور اگر کسی وکیل دوست نے مفت مقدمہ لڑنے کی ہامی بھر لی تو اس سلسلے میں ایک رٹ دائرکردوں گا۔ صبح اٹھ کر کچہری روانہ ہوا ۔نو نمبر چونگی چوک پر ٹریفک وارڈنز نے بیریئر رکھ کر چوک سے کچہری کی طرف جانے والا راستہ بند کر رکھا تھا۔ وارڈن نے کہا کہ آپ فلائی اوورکے اوپر سے جائیں۔ واپس مڑ کر خانیوال روڈ پرگیا اور وہاں سے فلائی اوور پر چلا گیا۔ نو نمبر چونگی فلائی اوور سے اترکر دوبارہ کچہری کی طرف جانے کی کوشش کی تو دیکھا وہاں بھی بیریئر رکھا ہوا ہے۔کچہری جس بات کا ریلیف لینے جانا تھا خود اس کی جانب جانا دشوار ہوگیا۔

دوبارہ اگلے فلائی اوور پر چڑھ گیا۔ وہاں سے اتر کر آگے اولڈ بہاولپور روڈ سے یو ٹرن لیا اور کچہری کی طرف روانہ ہوگیا۔ ڈویژنل سپورٹس گرائونڈز کے سامنے سے کچہری کی طرف جانے والا راستہ بھی بند تھا۔ دوبارہ گاڑی ریورس کی اور پھر اسی فلائی اوور پر چڑھ گیا جس سے اتر کر یہ سارا کشٹ کاٹا تھا۔ فلائی اوور سے پیر خورشیدکالونی کی طرف اترا‘ وہاں سے لودھی کالونی اور ایم ڈی اے چوک کی طرف سے کچہری جانے کی آخری کوشش کی مگر یہ راستہ بھی بند تھا۔ میں ملتان کا پیدائشی رہائشی ہوں اور میرے سامنے اب کچہری جانے کا کوئی اور راستہ موجود نہیں تھا۔ ہاں گھنٹہ گھر سے آیا جا سکتا تھا مگر وہ راستہ بھی کچہری چوک سے گزرتا ہے اور یہی چوک دور دور سے بند تھا۔ ہر اس جگہ سے جہاں سے میں نے داخل ہونے کی کوشش کی ،بیسیوں نہیں سینکڑوں لوگ پھنسے ہوئے تھے اور اس نظام کو ''دعائیں‘‘ دے رہے تھے۔ میں نے آئین کے آرٹیکل پندرہ اور پچیس کے تحت حاصل اپنے حقوق کے حصول کے لیے کچہری میں داخل ہونے کی ہر طرح کوشش کی‘ مگر ناکام رہا۔ مجھے کچہری میں داخل ہونے سے روکنا آئین کے آرٹیکل چھبیس کے تحت شہری کو عام مقامات میں داخلے سے متعلق عدم امتیازکی خلاف ورزی تھی۔ میں یہاں اپنے لیے آرٹیکل پندرہ

اور پچیس کا ریلیف لینے آیا تھا الٹا آرٹیکل چھبیس گلے پڑگیا۔

میں نے ہائی کورٹ بارکے صدر اپنے دوست سید اطہر حسین بخاری کو فون کیا اور پوچھا کہ شاہ جی! آئین کی خلاف ورزی یا آئین شکنی صرف حکومت کا تختہ الٹنا ہے یا اس کے کسی آرٹیکل کی خلاف ورزی آئین شکنی ہو سکتی ہے؟ شاہ جی کہنے لگے یہ ہے تو آئین کی خلاف ورزی۔ میں نے پوچھا کیا اس خلاف ورزی یا آئین شکنی پر آرٹیکل پونے چھ تک کا اطلاق ہو سکتا ہے؟ شاہ جی نے حسب معمول زوردار قہقہہ لگایا اور کہنے لگے نہیں لگ سکتا۔ چھ کے ساتھ ملتا جلتا کوئی بھی آرٹیکل بہت زیادہ شدید قسم کی صورت حال سے جڑا ہوا ہے، تمہارا معاملہ اس کیٹیگری میں نہیں آتا، ہاں اگر کوئی آرٹیکل ساڑھے پانچ ہوتا تو سوچا جا سکتا تھا۔ میں نے مایوس ہوکر فون بندکردیا۔

البتہ رات آرام دہ اور خوشگوار تھی۔ وی آئی پیزکی آمدکی وجہ سے لوڈشیڈنگ میں خاصی رعایت تھی۔ میں چھ بجے گھر پہنچا تو بجلی موجود تھی۔ رات آٹھ بجے بجلی جاتی ہے مگر نہیں گئی۔ پھر رات دس بجے جاتی ہے مگر نہیںگئی۔ دن تکلیف میں اور رات راحت میں گزری۔ میری وی آئی پیز حضرات سے درخواست ہے کہ وہ ملتان آتے ہوئے اگر اپنا شیڈول اس طرح بنا لیں کہ دن کے بجائے رات کو آیا کریں تو نہ صرف یہ عاجز بلکہ پورا ملتان ان کا ازحد شکرگزار ہوگا۔ یہ صرف درخواست ہے، قبول کرنا یا نہ کرنا صاحبان اختیارکا اختیار ہے۔ جہاں آئین کے تحت حاصل برابری کے حقوق نہیں مل رہے وہاں اگریہ درخواست مسترد ہو گئی توکون سی قیامت آ جائے گی۔