آئین اور صرف آئین

نمائندے نامزد ہوگئے، کمیٹیاں بن گئیں مگرابہام ہے کہ بڑھتا ہی چلا جا تا ہے۔

حکومتی کمیٹی؟اس کا مفہوم کیا ہے؟بظاہراس سے مراد وہ لوگ ہیں جو حکومت کی ترجمانی کریں گے۔حکومت کا نقطہ نظر مگر ہے کیا؟یہ ابھی تک کوئی نہیں جانتا۔طالبان کی کمیٹی؟خیال یہی ہوتا ہے کہ اس سے مراد وہ لوگ ہیں جو طالبان کا نقطہ نظر پیش کریں گے۔یہ نقطہ نظر ہے کیا؟یہ بھی کوئی نہیں جا نتا۔پروفیسر ابراہیم صاحب کا کہناہے کہ وہ ثالث بالخیر ہیں۔یہ نہیں بتا یا کہ کیسے؟آپ کو ایک فریق نے نامزد کیا ہے۔عرفِ عام میں اس کا مفہوم یہ ہے کہ آپ ان کی ترجمانی کریں گے۔ثالث تو وہ ہو تا ہے جسے دونوں فریق اس منصب پر فائز کریں۔حکومتی کمیٹی کے ارکان کا انداز بھی وہی ہے جوثالث کا ہے۔حالانکہ وہ بھی ایک فریق کی نمائندگی کر رہے ہیں۔ دونوں کی یہ حیثیت کہ وہ ثالث ہیں، اُس وقت مسلّم ہو گی جب دونوں فریق یہ اعلان کریں گے کہ جو یہ فیصلہ کریں گے، ہمیں قبول ہو گا۔تادمِ تحریر یہ بات اپنی کمیٹی کے بارے میں کسی فریق نے نہیں کہی۔پھر ثالث بھی بالعموم ایک ہی ہو تا ہے جس پر دونوں فریق اتفاق کرتے ہوں۔تو کیا پھر یہ وکیل ہیں؟یہ بھی طے نہیں۔وکیل موکل کا مقدمہ پیش کرتا ہے۔وہ ثالث نہیں ہوتا۔سوال وہی ہے کہ موکلوں کا مقدمہ ہے کیا؟یہ ابھی واضح نہیں۔اگریہ ثالث نہیں اور وکیل بھی نہیں تو پھر کیا ہیں؟دعا کی جانی چاہیے کہ یہ ابہام جلد دور ہو۔خیال ہوتا ہے کہ مذاکرات کی گرم جوشی میں سب گھر سے نکل پڑے ،زادِ راہ کے بارے میں کسی نے نہیں سوچا۔عمران خان اور مو لانا فضل الرحمن نسبتاً سمجھ دار نکلے۔اپنا دامن بچا لیا۔

ایک ابہام اور بھی ہے۔تاثر یہ قائم ہوا کہ یہ سارا عمل طالبان کے خیر خواہوں کے مابین ہو رہا ہے۔یہ بات فرداً فرداً شاید درست نہ ہولیکن فی الجملہ یہی احساس ہوتاہے۔طالبان نے تو اس باب میں کوئی ابہام نہیں رکھا ۔ انہوں نے ایسے افراد کو نامزد کیا، جنہوں نے کشمکش کے بارہ تیرہ سالوںمیں اپنی سیاست اور صحافت،زبان اور قلم کا سارا زور ان کے پلڑے میں ڈالا۔یہ محض لفظی موشگافیاں ہیں کہ ایک بغیر داڑھی شخص کو اپنا نمائندہ بنا کر طالبان نے اعلان کر دیا ہے کہ وہ ایسے شخص کو بھی اپنے جیسا مسلمان مانتے ہیں یا آئین کو تسلیم کرتے ہیں۔آئین کو تسلیم کرنے والا ریاست کے خلاف ہتھیار کیسے اٹھا سکتا ہے؟طالبان کی سب سے بڑی خوبی یہ ہے کہ ان کے موقف میں کوئی ابہام نہیں ہوتا۔اُن کی بات کا مفہوم جاننے کے لیے بین السطور جھانکنے کی کبھی ضرورت نہیں پڑتی۔یعنی، گویا‘چنانچہ ‘یہ الفاظ ان کی لغت میں کم ملتے ہیں۔

حکومت نے اس بات کا خیال رکھا کہ اُن لوگوں کو یہ ذمہ داری سونپی جا ئے جنہیں طالبان اگر اپنا حامی نہیں تو اپنا مخالف بھی نہ سمجھتے ہوں۔ایک رائے یہ ہے کہ اس سماج میں دو نقطہ ہائے نظر اور بھی ہیں۔ایک سیکولر اور دوسرا غیر دیوبندی مذہبی نقطہ نظر ۔یہ دونوں گروہ اس سے پہلے جو گلہ دبے لفظوں میں کرتے تھے، اب اس کاآہنگ بلند ہو رہا ہے۔ان کا مقدمہ یہ ہے کہ طالبان کے بالمقابل اصل فریق وہ ہیں جو طالبان کی کارروائیوں سے براہ راست متاثر ہوئے۔ان کا شکوہ ہے کہ وہ مذاکرات کے اس سارے عمل کا سرے سے حصہ ہی نہیں ہیں۔ان کی رائے معلوم کی گئی ہے اور نہ انہیں مشورے میں شامل کیا گیا ہے۔حکومت کہہ سکتی ہے کہ اے پی سی نے اسے مذاکرات کا حق دیا ہے۔تاہم یہ اس کی ذمہ داری ہے کہ وہ اس عمل میں تمام طبقات کو اعتماد میں لے۔ طالبان نے اس معاملے میں بھی زیادہ بالغ نظری کا ثبوت دیا ہے۔انہوں نے دو کمیٹیاں،اس کے علاوہ بنا دی ہیں جو اس مذاکراتی عمل میں طالبان کے مفادات کا خیال رکھیں گی۔وہ یہ دیکھیں گی کہ کہیں ان کے مقاصد یا شرائط سے انحراف تو نہیں ہو رہا۔میرا خیال ہے، ایسی ایک کمیٹی حکومت کو بھی بنا دینی چاہیے۔اس میں ان طبقات کی بھی نمائندگی ہو جنہیں نظر انداز کیے جا نے کا گلہ ہے۔حکومت چونکہ ریاست اور آئین کی پاسبان ہے،اس لیے یہ کمیٹی اس بات کا جائزہ لے کہ کوئی ایسا مطالبہ تسلیم نہ کیا جائے جو آئین کے خلاف ہو۔اس سے امید ہے کہ اس مذاکراتی عمل کو پوری قوم کی تائید میسر آ جائے گی۔

واقعہ یہ ہے کہ اس ملک میں لوگ آئین کی دُہائی تو بہت دیتے ہیں ، لیکن اسے ماننے والے بہت کم ہیں۔اس ملک کا آئین حکومت کو پابند بنا تا ہے کہ وہ ریاست اور سماج کومسلمان بنائے۔ہماراسیکولر طبقہ آئین کی بات کرتا ہے لیکن حکومت کو یہ حق دینے کے لیے تیار نہیں کہ وہ سماج کی اخلاقی تعمیر کے باب میں کوئی قدم اٹھائے۔وہ اسے فرد کا انفرادی معاملہ قرار دے کر ریاست کے حق کو تسلیم نہیں کرتا جو اسے آئین دیتا ہے۔اس لیے اگر ان لوگوں کو بھی اس کمیٹی میں شامل کر لیا جائے تو آئین پسندی کا جو دعویٰ یہ لوگ کرتے ہیں،وہ بھی واضح ہو جائے گا۔جو بات ہم طالبان سے کہتے ہیں، وہی اِن سے بھی کہی جا نی چاہیے۔ طالبان کے نزدیک جمہوریت کفر ہے لیکن ہم ان سے اصرار کرتے ہیں کہ وہ آئین کو مانیں جو جمہوری ہے۔سیکولر لوگوں کے نزدیک اخلاق ومذہب فرد کا معاملہ ہے مگر پاکستان کا آئین ایسا نہیں کہتا۔اس لیے انہیں بھی آئین کو ماننا چاہیے اور اس باب میں ریاست کے کردار کو تسلیم کر نا چاہیے۔

معلوم نہیں لوگوں کو اس بات کا کتنا خیال ہے کہ ہم اس وقت جس عذاب کا شکار ہیں،وہ اس بنیادی سوال کی کوکھ سے پیدا ہوا ہے کہ ریاست،مذہب، سماج اور فرد کا باہمی تعلق کیا ہے؟اس باب میں ہمارے ہاں ایک سے زیادہ نقطہ ہائے نظر موجود ہیں۔آئین بھی ایک نقطہ نظر پر مبنی ہے۔اس میں غلط ا ورصحیح، دونوں طرح کی باتیں شامل ہو سکتی ہیں۔تاہم اس کی خوبی یہ ہے کہ اس کو سماج کی نمائندہ جماعتوں نے ایک عمرانی معاہدے کے طور پر قبول کر رکھا ہے۔اس کی اساس پر ہماری ریاست قائم ہے اور قائم رہ سکتی ہے۔یہ انسانی تخلیق ہے اور اس میں تبدیلی ہو سکتی ہے۔اس کا طریقہ بھی یہ آئین تجویز کر رہا ہے۔یہ طالبان ہوں یا سیکولر طبقہ، دونوں کو باور کرنا چاہیے کہ آئین جیسا ہے، ویسا ہی ماننا پڑے گا۔ وہ اگرچاہیں تو اسے حسبِ منشا تبدیل کر سکتے ہیں۔اس کی شرط یہ ہے کہ وہ اس طریقہ کار کی پابندی کریں جو اس آئین میں درج ہے۔

حکومت اگر اس بنیادی نکتے پر اتفاق رائے پیدا کرسکے تو یہی مذاکرات کی کامیابی ہو گی۔طالبان کی کمیٹی کو چاہیے کہ وہ طالبان کو اس پر آمادہ کریں کہ وہ آئین کے تحت، یہ نشاندہی کریں کہ نفاذِ اسلام کے باب میں یہ کام ہو نے چاہئیں۔ حکومت اگر سب طبقات کے نمائندوں پر مشتمل کمیٹی بنائے تو اس کے سامنے بھی یہی بات رکھے کہ اگر طالبان کا کوئی مطالبہ آئین کے خلاف ہے تو اسے قبول نہ کیا جا ئے۔یہ ممکن ہے کہ آئین کسی طبقے کی خواہشات کی مکمل ترجمانی نہ کرتا ہو لیکن یہ ہر شخص کو یہ حق ضرور دیتا ہے کہ وہ عامتہ الناس کو ہم نوا بنا کر اسے اپنی آرزئوں کے مطابق ڈھال لے۔اس لیے آج اگر کسی کو اس آئین میں کوئی کمی دکھائی دیتی ہے تو وہ جمہوری انداز سے جد وجہد کرے اور آئین کو بدل ڈالے۔اگر کوئی اس بات کو قبول نہیں کرتا تو پھر پوری قوم کو اس کے خلاف یکسو ہو جا نا چاہیے۔ابہام کی اس فضا سے نکلنے کا یہی راستہ ہے۔

روزنامہ دنیا ایپ انسٹال کریں