پاکستان کی چٹان

جنرل راحیل شریف نے پی ایم اے کاکول اکیڈمی کیڈٹس سے خطاب کرتے ہوئے کہا کہ ''بھارت پاکستان کو غیر مستحکم کرنے کی سازشوں میں مصروف ہے ۔اُس نے فاٹا، کراچی اور بلوچستان میں دہشت گردی کو ہوا دینے کے علاوہ جموں و کشمیر کی کنٹرول لائن اور ورکنگ باؤنڈری پر جنگ جیسی صورت حال پیدا کر رکھی ہے‘‘۔ اس تشویش ناک صورتحال کے باوجود پاکستان میں انتخابی جنگ کا آغاز ہو چکا ہے۔ بھارتی سازشوں کے حوالہ سے‘ میں ملک میں خطرے کی گھنٹی کی گونج سن رہا ہوں۔ سندھ میں کرپشن کی لوٹ مار کے علاوہ ترقیاتی سکیموں پر عمل کی آڑ میں بھاری رقوم ملک سے باہر بھیجی جاتی رہیں، یہاں تک کہ سندھ افلاس و غربت اور بربادی کا منظر پیش کرنے لگا۔ سندھ میں کرپشن کی تہہ تک پہنچنے کے لئے تمام وفاقی وسائل بروئے کار لائے جا رہے ہیں، لیکن دوسری طرف بعض حلقوں کے خیال میں پنجاب کو احتساب سے استثنیٰ حاصل ہے۔ اس پالیسی سے سندھ کے عوام میں بے چینی پھیلتی جا رہی ہے۔ عوام اچھی طرح جانتے ہیں کہ اگر سندھ میں لوٹ کھسوٹ ہو رہی تھی‘ تو پنجاب میں بھی کرپشن کم نہ تھی۔ بہرحال وقت آگیا ہے کہ ایک اعلیٰ سطحی کمیشن بناکر سندھ کی طرح پنجاب کے کرپٹ لوگوں کے خلاف بھی یکساں طرز کی تحقیقات کی جائے۔ اُن کے بارے میں جو بھی حقائق سامنے آئیں وہ نہ فقط عوام کے سامنے پیش کئے جائیں بلکہ لٹیروں کو ایسی سزا دی جائے کہ آئندہ کوئی ایسا کرنے کی جرأت نہ کر سکے۔

رینجرز کے خلاف سندھ پولیس کی طرف سے ایف آئی آر درج کرنے کی خفیہ کوشش

دوبئی میں سازشی ذہنوں نے تیار کرائی تھی؛ تاہم سندھ حکومت نے ایسی کسی بھی سازش سے انکار کیا ہے۔ اگرچہ فوج کے ڈر سے رینجرز کے خلاف ایف آئی آر درج کرنے سے گریز کیا گیا ہے‘لیکن حقائق کو گہری نظر سے دیکھا جائے تو محسوس ہوتا ہے کہ ایسی ہر منصوبہ بندی میں وہ ہاتھ ہے، جس نے گزشتہ دنوں افواج پاکستان کی اینٹ سے اینٹ بجانے کی دھمکی دے ڈالی تھی۔ کہا جاتا ہے کہ موصوف سندھ پولیس اور رینجرز میں ٹکرائو کے حامی ہیں تاکہ دبائو بڑھا کر ڈاکٹر عاصم کے حوالہ سے سودا بازی کرائی جا سکے۔ کون اس بات پر یقین کرے گا کہ جب پولیس نے رینجرز کے خلاف ایف آئی آرز درج کیں تو وزیر اعلیٰ کو ان کا علم نہیں تھا۔ سندھ کی وزارت اطلاعات نے بھی پولیس کو اشتہارات کی منظوری دی اور ادائیگی کی، لیکن اس کے باوجود سارا ملبہ جونیئر پولیس اہل کاروں پر ڈال کر انہیں فوری طور پر منظر سے ہٹا دیا گیا۔ ممکن ہے کہ سندھ حکومت کے خفیہ ہاتھوں نے اُنہیں دوبئی بھجوا دیا ہو‘ کیونکہ جب ذوالفقار مرزا سندھ کے وزیرداخلہ تھے تو اُن کے عہد میں تقریباً دس ہزار کے لگ بھگ سیاسی کارکنوں کوصوبائی پولیس میں بھرتی کیا گیا پھر اسی پر اکتفا نہ کیا گیا بلکہ جونیئر آفیسروں کو راتوں رات پولیس کیڈر میں مدغم کرا دیا گیا۔ اب ایف آئی آر والی واردات بھی انہیں وفاداروں کے ہاتھوں کرائی گئی ہے۔

ڈاکٹر عاصم کے گرد گھیرا تنگ ہوا تو سیاسی و غیر سیاسی حلقے حیران رہ گئے۔ اسی کارروائی کے بعد، زرداری صاحب افواج پاکستان سے ناراض ہو گئے۔ وزیر اعلیٰ سندھ اور چیئر مین سینیٹ میاں رضا ربانی نے بیان دینے شروع کر دئیے کہ جرنیلوں اور ججوں کا احتساب کیا جائے اور سخت وارننگ دی کہ سندھ میں قومی احتساب بیورو نے ان کے خلاف کاروائیوں کا سلسلہ بند نہ کیا تو اس کا جواب دیا جائے گا ؛ چنانچہ سندھ میں احتساب کا نیا نظام لانے کے لئے صوبائی اسمبلی میں قانون سازی کے لئے بل پیش کر دیا گیا ہے۔ معاملات یہاں تک پہنچ گئے کہ سندھ رینجرز کے سربراہ جنرل بلال کو تحفظات کا اظہار کرنا پڑا‘ سندھ حکومت کو بتا دیا گیا کہ وہ کراچی آپریشن کے خلاف سازشیں فوراً بند کرے۔ سندھ حکومت اور رینجرز کے درمیان تعلقات کے تناظر میں دیکھا جائے تو یہ چپقلش آپریشن ضرب عضب، کراچی آپریشن یا پھر سیاسی نظام کے لئے اچھا شگون نہیں۔ آویزش بڑھے تو کشیدگی ناخوشگوار صورت اختیار کر سکتی ہے۔ ایسے ہی واقعات اور سول ملٹری تعلقات میں تلخ تعلقات کے باعث 12اکتوبر 1999ء کا المیہ پیش آیا‘ جس کے نتیجے میں پورا سسٹم منہدم اور پارلیمانی نظام کی بساط ہی لپیٹ دی گئی۔ اس رات نواز شریف اور ان کے گھر کے بعض افراد وزیر اعظم ہاؤس میں موجود تھے ‘ اگر چیف آف سٹاف لیفٹیننٹ جنرل عزیز خان بروقت مداخلت نہ کرتے تو حکمرانوں کے ساتھ کچھ بھی ہو سکتا ہے، عین اُس وقت جنرل پرویز مشرف کا طیارہ فضا میں تھا۔

اب کرپشن کے خلاف آپریشن، صرف ایک صوبے اور اُس کے سیاستدانوں یا آپریشن کے خلاف مزاحمت کرنے والوںتک ہی محدود نہیں رہنا چاہئے،بلکہ قانون کے دائرے کے اندر رہتے ہوئے شفاف طریقے سے بلاتفریق اور شفاف طور پر ملک بھر کو محیط ہونا چاہیے۔ پنجاب میں میگا کرپشن ہو رہی ہے ‘وزیر خزانہ اسحاق ڈار غلط اعداد و شمار اور فرضی شماریات کے تحت قوم کو گمراہ کر رہے ہیں، ان سب کے خلاف بھی کارروائی

ہونی چاہیے۔ پائلٹوں کی ہڑتالوں کے بہانے پی آئی اے کو نجکاری کے ذریعے غیر ملکی کارپوریٹ سیکٹر کے حوالے کرنے کی سازش ہو رہی ہے۔ پی آئی اے کو اقتصادی طور پر مفلوج کرنے والے سازشی ذہنوں کو بے نقاب کرنے کے

لئے آزاد کمیشن بنانا چاہئے۔ پاکستان سٹیل مل کو تباہی تک لیجانے والوں کوبھی منظر عام پر لانے کے لئے نیب کو مکمل اختیارات دیئے جائیں۔سندھ میں وسیع پیمانے پر کرپشن کے پھیلائو کا باعث بننے والوں کے خلاف بھی کارروائی ہونی چاہیے۔ ایسا ہی فعال کمیشن حکمرانوں‘ ان کے رشتہ داروں اور اُن کے حوالیوں موالیوں کے خلاف بھی تحقیقات کرے کہ انہوں نے اپنی صنعتوں کو فروغ دینے کے لئے ملکی معیشت کو دیوالیہ کیسے بنا دیا ۔ بلوچستان کے ساحل پر ایک شاندار شپ بریکنگ انڈسٹری کو تباہ کرانے میں کس کارپوریٹ مافیا گروپ کا ہاتھ ہے؟ سندھ میں حیدر آباد کے قریب نوری پور ایشیا کی سب سے بڑی شاندار انڈسٹریل سٹیٹ قائم کی گئی اسے تباہ کرنے میں کس کارپوریٹ ایجنسی کا ہاتھ تھا؟۔ اسی طرح سوات میں مثالی انڈسٹریل سٹیٹ کو تباہ کرنے میں کس صنعت کار کی سازش کار فرما تھی؟۔ ان سارے منصوبوں کو منظر عام پرلانے کے لئے عسکری قوت کی نگرانی میں تحقیقات ہونی چاہئے اور حقائق عوام کے سامنے آنے چاہئیں۔

جنرل راحیل شریف قوم کی واحد امید ہیں جو پاکستان کو محفوظ و مستحکم بنانے کے لئے آخری چٹان کی مانند کھڑے ہیں۔ اگر ملک بھر کے کرپٹ عناصر کا آہنی ہاتھوں سے احتساب ہوا تو پوری قوم آرمی چیف کے شانہ بشانہ کھڑی ہوگی۔ لہٰذا پنجاب اور خیبر پختونخوا میں بھی، اب کرپشن کے خلاف کارروائی کا آغاز ہو جانا چاہیے۔ ماضی کی حکومتوں میں کرپشن کے جو کارنامے سرانجام دیے گئے اس نے ملک کی معیشت کا بیڑہ غرق کر دیا یہی وجہ ہے کہ آج ہر پیدا ہونے والا بچہ ایک لاکھ روپیہ کا مقروض ہے۔

آرمی چیف کا یہ بیان انتہائی تشویش انگیز ہے کہ اسلام آباد میں بعض عناصر داعش کی اطاعت کرنا چاہتے ہیں، صورت حال خطرناک ہے، دہشت گرد تنظیم داعش القاعدہ سے بھی بڑا خطرہ ہے؛لہٰذا عسکری قوتوں کو اسلام آباد میں ایسے لوگوں کے خلاف آپریشن کے لئے قومی حکمت عملی اپنانا ہوگی۔ اسلام آباد آپریشن کے لئے 24 گھنٹوں کا کر فیو لگا کر کارروائی کی جائے۔ رئیل اسٹیٹ ایجنسیوں کے مالکان پر نظر رکھی جائے جو زمینوں پر قبضہ کرنے کے لئے ان عناصر کو مالی سہولتیں فراہم کر رہے ہیں۔ یہ وہ لوگ ہیں جو اسلام آباد کی ایک لاکھ کنال سے زائد زمینوں پر ناجائز قبضہ جمانے کے لئے ان عناصر کی پشت پناہی کر رہے ہیں۔