آیاتِ الٰہی

اللہ تعالیٰ کا ارشاد ہے : ''ہم عنقریب ان کواَطرافِ عالم میں اپنی نشانیاں دکھائیں گے اورخود اُن کی اپنی ذات میں حتیٰ کہ اُن پرواضح ہوجائے گا کہ یہ قرآن حق ہے ،کیا اُن کے لیے یہ کافی نہیں ہے کہ آپ کا رب ہرچیز پر گواہ ہے، سنو!بیشک اُن کو اپنے رب کے حضور حاضر ہونے کے بارے میں شک ہے ،سنو!بیشک وہ ہر چیز پر محیط ہے ‘‘(حمٓ السجدہ:53-54)قرآن مجید کی اِن آیاتِ مبارکہ سے واضح ہواکہ اللہ تبارک وتعالیٰ کائنات کے اِس تکوینی نظام میں اپنی آیات اپنے بندوں کو دکھاتارہتاہے اور انسان کا وجود بجائے خود اللہ تعالیٰ کی قدرت کا ایک شاہکار ہے ،اِسی لیے قرآن نے انسان کے اپنے وجود کے اندر آیات کو ''اَنفُس‘‘ سے تعبیر کیا اور انسانی وجود سے باہر کی آیات کو'' آفاق‘‘ سے تعبیر کیا۔آیت کے معنیٰ نشانی اور علامت کے ہیں، یعنی کائنات میں پھیلی ہوئی یہ ساری چیزیں اللہ تعالیٰ کی بے پایاں قدرت کی دلیل ہیں ۔اِسی لیے آیاتِ تذکیر بھی ہیں ،آیاتِ وعدووعید بھی ہیں اورآیاتِ تنبیہات بھی ہیں ۔اِن آیاتِ تنبیہات میں سے ایک زلزلہ ہے ، ارشادِ باری تعالیٰ ہے : '' اے لوگو! اپنے پروردگار سے ڈرتے رہاکرو ،بیشک قیامت کا زلزلہ بہت سنگین چیز ہے ،جس دن تم اس کو دیکھوگے ،ہر دودھ پلانے والی اپنے دودھ پیتے بچے کو فراموش کردے گی اور ہر حاملہ کا حمل ساقط ہوجائے گا اور لوگ تم کو مدہوش نظر آئیں گے ،حالانکہ وہ مدہوش نہیں ہوںگے ،لیکن اللہ کا عذاب بہت سخت ہے‘‘، (الحج:1-2)

سورۃ الزلزال میں ارشاد فرمایا: '' جب زمین شدت سے ہلادی جائے گی اور زمین اپنا تمام بوجھ باہر نکال دے گی اورانسان کہے گا : اسے کیاہوا ،اُس دن زمین (اپنے سینے میں مستور ) تمام خبریں بیان کردے گی ،اُس دن لوگ گروہ درگروہ نکلیں گے تاکہ انہیں اُن کے اَعمال دکھا دیئے جائیں ،سو جو ذرہ بھر نیکی کرے گا ،وہ اُس کا صلہ دیکھ لے گا اورجو ذرہ بھر برائی کرے گا، وہ اُن کا نتیجہ دیکھ لے گا‘‘(الزِّلزَال:1-8)

الغرض زلزلہ بھی اللہ تعالیٰ کی قدرت کی عظیم نشانیوں میں سے ایک نشانی ہے اور قیامت بھی ایک عظیم بھونچال کی صورت میں آئے گی ،سو زلزلے کے موقع پر قیامت کی یاد کو اپنے ذہنوں میں تازہ کرنا چاہیے ۔ماہرینِ ارضیات زلزلے کا مطالعہ تکوینی اسباب کے تحت کرتے ہیں کہ زمین کی ساخت اور ترکیب میں کون سے ایسے عوامل اور محرکات ہیں جن کے رونماہونے کے سبب زمین کا توازن بگڑ جاتاہے اور زلزلہ آتاہے ۔آج سائنس نے کافی ترقی کرلی ہے اور زمین کے بھونچال اور اِرتعاش کو ناپنے کے لیے ایک آلہ اور سائنسی معیار ایجاد کرلیاگیاہے ، جسے ریکٹر سکیل کہتے ہیں۔ زلزلے کی شدّت کو ناپنے کا یہ آلہ یا فارمولا ڈاکٹر چارلس ایف ریکٹر نے کیلی فورنیا انسٹی ٹیوٹ آف ٹیکنالوجی میں طویل تحقیق کے بعد ایجاد کیا اور پھریہ پیمانہ اُنہی کے نام سے منسوب ہوا اور تاحال زلزلہ پیمائی کے لیے یہی معیاری پیمانہ سمجھاجاتاہے ۔یہ آلہ ریاضی کی ایک ذیلی شاخ ''لوگارتھم‘‘کے اصولوں پر کام کرتاہے ، جس میں زمین کے دس دفعہ کے ارتعاش کو چھ گنا جاتاہے ۔ ساڑھے تین منٹ دورانیے اور سات سے اوپر پیمائش والے زلزلے کو تباہ کن قرار دیاجاتاہے ۔ زلزلے کا آغاز گڑگراہٹ سے ہوتاہے اور تھوڑی دیر بعد یہ تھر تھراہٹ یعنی زمینی ارتعاش میں تبدیل ہوجاتی ہے ۔

ا س آلے کے ذریعے یہ بھی معلوم کرلیاجاتاہے کہ زلزلے کامرکز کہاں تھا اور کتنی گہرائی میں تھا ‘لیکن ابھی تک انسان نے یہ قدرت حاصل نہیں کی کہ قبل از وقت پیشین گوئی کی جاسکے کہ زلزلہ کب آئے گا ، کس مقام پر آئے گا اور کتنی طاقت کا ہوگا تاکہ کم ازکم ممکنہ جانی نقصان سے حتی الامکان بچاجاسکے ۔ جسے سائنسی زبان میں سونامی کہتے ہیں ،دراصل وہ بھی سمندر کے اندر زمینی زلزلہ ہی ہوتاہے ، جس کی بناپر سمندر کی موجیں بے انتہا بلند ہوتی ہیں اور بعض صورتوں میں ساحلی علاقوں میں تباہی مچادیتی ہیں ۔قدرت غالب ہے اور انسانی علم نے ابھی اتنی ترقی نہیں کی کہ کائنات میں رونماہونے والی بہت سی چیزوں کا رُخ موڑ سکے یا اُن کے آگے بند باندھ سکے اور ممکنہ تباہی سے بچاؤ کی تدبیر کرسکے ۔

یقیناً انسان کے تجسُّس اور تحقیق کا سلسلہ جاری رہے گا اور مستقبل میں کیارونماہوتاہے ،اس کا حقیقی علم اللہ تعالیٰ کے پاس ہے ۔ اسلام تحقیق ،تجسُّس اور علمی ارتقاکی نفی نہیں کرتا بلکہ حوصلہ افزائی کرتاہے اور سائنسی تحقیقات سے انسانیت کو جو فیض ملتاہے یاممکنہ خطرات کی پیش بندی کی جاسکتی ہے یا مابعد تلافی کی کوئی صورت اختیار کی جاسکتی ہے ، اسلام اسے قدر کی نگاہ سے دیکھتاہے‘لیکن اسلام یہ چاہتاہے کہ انسان اَنفُس وآفاق میں اللہ تبارک وتعالیٰ کی نشانیوں سے عبرت حاصل کرے ، اس کی غالب قدرت کے سامنے اپنے عجز کو تسلیم کرے اور اپنی عاقبت کو سنوارنے کی فکر کرے اور یہ سمجھے کہ جو انسان آندھی ، سیلاب ، طوفان اورسونامی کا نہ رُخ موڑ سکتا ہے اور نہ ہی اُس کے آگے بند باندھ سکتاہے،وہ اپنی موت یاقیامت کو کیسے ٹال سکتاہے ۔یہی وجہ سے کہ قرآن نے قیامت کو ''الحاقّہ‘‘ سے تعبیر کیا یعنی جس کا قائم ہونا حق ہے ،ثابت ہے اور اِسے آکرہی رہناہے ، کسی کی مجال نہیں کہ اسے ٹال دے ،اللہ تعالیٰ کا ارشاد ہے : ''بیشک جب اللہ کا مُقررہ وقت آجاتا ہے تو وہ (کسی بھی صورت میں) مؤخر نہیں ہوتا ، کاش کہ تم اس حقیقت کو جان لیتے ‘‘(نوح:4)

رسول اللہ ﷺ نے یہی شعار خسوف و کسوف یعنی چاند گرہن اور سورج گرہن کے بارے میں تعلیم فرمایا۔اہلِ عرب کا عقیدہ تھاکہ کسی بڑے آدمی کی پیدائش یاموت کے سبب چاند گرہن یا سورج گرہن کا وقوع ہوتاہے اورعہدِ رسالت مآب ﷺ میں آپ ﷺ کے صاحبزادے کا انتقال ہوا اور اتفاق سے اُنہی ایام میں سورج گرہن ہوا،تو لوگوں نے سمجھا کہ رسول اللہ ﷺ کے صاحبزادے کی وفات کے سبب یہ واقعہ رونماہواہے ۔آپ ﷺ نے اس نظریے کا رَد کرتے ہوئے فرمایا : ''بیشک سورج اور چاند اللہ تعالیٰ کی نشانیوں میں سے ہیں اور سورج گرہن یا چاند گرہن کسی کی موت یا پیدائش کے سبب وقوع پذیر نہیں ہوتے ، سو جب تم یہ دونوں نشانیاں دیکھو تو اللہ کی کبریائی بیان کرو ، اللہ سے دعاکرو ، نماز پڑھو اور صدقہ دو‘‘(صحیح مسلم:2087)

پس مومن کو یہ سوچ کر لرزجانا چاہیے کہ یہ زلزلہ قیامت کا بھی تو ہوسکتاتھا کہ جس کے بعد توبہ کی مہلت بھی نہیں ملتی ، سوہمیں قدرت کی جانب سے ملنے والی اس مہلت کو غنیمت جانتے ہوئے مکمل حضوریٔ قلب کے ساتھ اللہ تعالیٰ سے اپنے تمام گناہوں سے توبہ کرنی چاہیے ۔ اور اللہ تعالیٰ کا شکر بھی بجالانا چاہیے کہ اُس نے اس تباہ کن آفت سے محفوظ رکھااور اپنا امان عطافرمایا۔اس کے ساتھ ساتھ ہمیں اپنے اُن بھائیوں اور اہلِ وطن کے دکھوں کے مداوے، تکالیف کے ازالے اور بحالی کے لیے ہرممکن تعاون کرنی چاہیے ۔ اس موقع پر ہمیں اس حدیث کو ہمیشہ پیشِ نظر رکھنا چاہیے :''تم میں سے کوئی شخص کامل مومن نہیں ہوسکتا ،تاوقتیکہ وہ اپنے بھائی کے لیے وہی چیز پسند کرے جو اپنے لیے کرتاہے ‘‘(صحیح بخاری:13)فارسی میں کہتے ہیں : آنچہ بر خودنہ پسندی بر دیگراں مپسند ۔

2005ء کے ہزارہ اور آزادکشمیر کے زلزلے میں ہم نے دیکھا کہ لوگوں نے اپنی استعمال شدہ ،ناقص اور ناپسندیدہ اشیاء زلزلے کے متاثرین کے لیے دیں، وہ اُن کے لیے قابلِ استعمال نہیں تھیں ، اُن کی وہاں ترسیل پر ہزاروں روپے خرچ آئے اور پھر وہ سامان ہم نے پہاڑوں میںبکھراہوا دیکھا ۔لہٰذا حکومت کو چاہیے کہ زلزلہ زدگان کے لیے دی جانے والی اشیاء کے لیے معیار مقرر کرے ، استعمال کے کپڑے نئے ہوں ،اشیاء خوراک تازہ اور قابلِ استعمال ہوں اور دوائیں زائدالمیعاد (Expired)نہ ہوں۔اور اس طرح کا انتظام ہو کہ ایک مرکزی انتظام کے تحت اشیاء چیک کرکے متاثرین تک پہنچائی جائیں ۔ اِسی طرح اشیائے خوراک اور دوائیں قریب کی مارکیٹ سے بھی خرید کر فراہم کی جاسکتی ہیں ۔اب جب کہ سائنسی اعتبار سے یہ بات طے ہوچکی ہے کہ ہمارے علاقے ، بالخصوص خیبر پختونخوا، آزادکشمیر اور شمالی علاقہ جات جو زلزلے کے اعتبار سے فالٹ رینج میں آتے ہیں ، وہاں تعمیرات کے لیے لوگوں کی فنی معاونت کی جائے تاکہ ممکنہ حدتک عمارات زلزلے سے محفوظ رہیں ۔

روزنامہ دنیا ایپ انسٹال کریں