پا نامہ کہانی

آج یورپ اور امریکہ کے بیشتر اخباروں میں پانامہ لیکس کے تذکرے ہیں۔ میں نے اپنے قارئین کے لئے وائس آف امریکہ کی رپورٹ منتخب کی ہے۔ ملاحظہ فرمایئے۔

''پانامہ پیپرز لیک نام کے حالیہ سکینڈل کی وجہ بننے والی پانامہ کی قانونی فرم موسیک فونسیکا کاروباری شخصیات اور اداروں کو قانونی اور تجارتی مشورے دیتی ہے اور اپنے کلائنٹس کے لیے دوسرے ملکوں میں کمپنیاں قائم کرکے انہیں چلاتی ہے۔ اس ہفتے کے شروع میں واشنگٹن میں قائم ایک صحافتی تنظیم''انٹرنیشنل کنسورشیم آف انویسٹی گیٹو جرنلسٹس‘‘ یا (آئی سی آئی جے) نے دعویٰ کیا ہے کہ موسیک فونسیکا نام کی اس فرم کی ایک کروڑ 15 لاکھ دستاویزات ان کے ہاتھ لگی ہیں، جن پر ایک سال تک تحقیق کے بعد انہوں نے پانامہ پیپرز کے نام سے اپنی آن لائن رپورٹ میں کہا ہے کہ دنیا کے کئی ملکوں کی بااثر شخصیات نے پیسے کو بیرونِ ملک منتقل کرنے اور غیر ملکی کمپنیوں میں سرمایہ کاری کے لیے اس فرم کی خدمات حاصل کی ہیں۔ پاکستان کی کچھ اہم شخصیات کے نام بھی اس فہرست میں شامل ہیں۔ وزیر اعظم نواز شریف کے دو بیٹوں اور ایک بیٹی کا نام ، پیپلز پارٹی کے دور کے سابق وزیر داخلہ پاکستان رحمان ملک کا نام ، لاہور ہائی کورٹ کے ایک ریٹائرڈ جج کا نام اور کئی اہم کاروباری شخصیات کے نام‘ بھی فرست کا حصہ ہیں۔

پاکستانی صحافی عمر چیمہ اس پروجیکٹ کا حصہ تھے ،جس نے پانامہ پیپرز پر تحقیق کی ہے۔ وی او اے اردو کے پروگرام ،انڈی پنڈنس ایونیو میں بات کرتے ہوئے ان کا کہنا تھا کہ انہوں نے لاکھوں دستاویزات دیکھی ہیں۔ ایک کیس کے لئے کئی کئی ڈاکومنٹس دیکھے گئے۔انکشافات ٹھوس ہیں۔ کسی نے ابھی تک ان کی صحت سے انکار نہیں کیا۔ بہت سے کیسز میں لوگوں کے پاسپورٹ کی کاپیاں، گھر کا ایڈریس، اور فون نمبرز تک اس میں موجود ہیں۔ میں ذاتی طور پر کسی ابہام کا شکار نہیں ہوں ان انکشافات کی صحت کے حوالے سے، دوسو پاکستانیوں کے نام اس لسٹ میں ہیں۔ مشکل یہ پیش آرہی ہے کہ کسی نے پاکستان کا ، کسی نے بیرون ملک کا کوئی ایڈریس دے رکھا ہے۔ ریٹائرڈ جج ملک قیوم کا کوئی ایڈریس دستاویز میں شامل نہیں ہے۔ ایک ذوالفقار لاکھانی ہیں ۔ ان کا پتہ ہمیں آخری دنوں میں چلا ۔ ان کی ایک بے نامی کمپنی تھی۔ بے نامی کمپنی وہ ہوتی ہے، جس کے اصل مالک کا نام شیئر سرٹیفکیٹس میں نہیں آتا۔ اس کے لئے لافرم کی طرف سے کوئی اور ڈائریکٹر نامزد ہوتا ہے۔عمر چیمہ کے بقول، مریم نواز کے نام پردو بے نامی کمپنیاں ہیں۔

تجزیہ کار ایاز امیر کا کہنا تھا کہ اگر کسی نے رقم آف شور کمپنیوں میں منتقل کی ہے، تو وہ کہاں سے آئی؟ وہ آف شور کمپنیاں کب بنی تھیں؟ وزیر اعظم نواز شریف نے‘اپنے ٹیکس ڈیکلیریشنز میں یا انتخابی میدان میں اترتے ہوئے الیکشن کمیشن کے سامنے، اپنے اثاثہ جات میں کیا یہ سب کچھ ظاہر کیا تھا؟ اگر نہیں کیا توکیا انہوں نے اپنے ٹیکسز اور اثاثے چھپائے ہیں؟ پاکستان کے قانون کے مطابق یہ ایک سنگین جرم ہے۔ اگر وزیر اعظم کے بیٹے کہتے ہیں کہ ہم نے فلاں سال میں، آف شور کمپنی کا کنٹرول سنبھالا ،لیکن اس کا ٹریل کہیں اور جاتا ہو، اور اس میں وزیر اعظم کا نام آتا ہو، یا دیگر خاندانوں کا نام آتا ہو تو وہ قانون شکنی کے دائرے میں آسکتے ہیں۔ ایسے الزامات پہلے بھی لگتے رہے ہیں لیکن پاکستان میں تہہ تک پہنچنے کا کام اور قانونی چارہ جوئی کا نظام مغربی ملکوں جیسا نہیں ہے۔ لیکن اس معاملے نے پاکستانی سیاست کے منظر نامے کو ہلا دیا ہے اور وزیر اعظم اور ان کی جماعت کو بہت دفاعی پوزیشن اختیار کرنے پر مجبور کر دیا ہے۔ دیکھنا یہ ہوگا کہ اب اس کی تحقیق کیسے ہوتی ہے۔ ریٹائرڈ جج کی سربراہی میں تحقیق کی بات وزیر اعظم نواز شریف کر رہے ہیں لیکن کوئی اسے ماننے کو تیار نہیں۔ کیا وہ اسے چھپانے میں کامیاب ہونگے یا نہیں؟ اس کا تعلق اس سے ہے کہ سیاسی دباؤ کس حد تک بڑھتا ہے؟ اپوزیشن کی سیاسی جماعتوں میں خود ایسے لوگ موجود ہیں، جن کے نام اس لسٹ میں شامل ہیں۔بینظیر بھٹو اور سابق وزیر داخلہ رحمان ملک کا نام بھی اس لسٹ میں شامل ہے۔ اس لئے جو جذبہ اپوزیشن کی طرف سے حکومت پر سیاسی دباؤ بڑھانے کے لئے درکار ہے، وہ موجود نہیں۔ ایاز امیر کے بقول ''رحمان ملک تو ڈھٹائی میں، مسلم لیگ نواز سے بھی کہیں آگے ہیں۔ وہ تو کہتے ہیں کہ یہ میرے خلاف را کی سازش ہے۔ اس کا مطلب ہے‘یہ سارا پانامہ لیک را نے کیا ہے تاکہ ہمارے سابق وزیر داخلہ کو مطعون کیا جائے‘‘۔

وزیر اعظم پاکستان کے صاحبزادے حسین نواز نے ایک حالیہ انٹرویو میں کہا ہے کہ انہوں نے کوئی ایسا کام نہیں کیا ،جس کی پاکستان کے قوانین میں گنجائش نہ ہو۔ماہرمعاشیات زبیر اقبال کا کہنا تھا کہ پانامہ ، دبئی اور بحرین سمیت دنیا بھر میں، اس قسم کے آف شور یونٹس موجود ہیں، جہاں آف شور بینکنگ ہوتی ہے۔ ان کا کہنا تھا کہ ہر ملک کے قوانین و ضوابط دوسرے سے مختلف ہوتے ہیں، جن کی وجہ سے کوئی نہ کوئی ایسا نظام بن جاتا ہے، جو ان قوانین و ضوابط سے بچنے کے لئے استعمال کیا جاتا ہے۔ زبیر اقبال کے بقول، انیس سو نوے کے بعد سے ،تین چار مرتبہ ایسے اہم سمجھوتے عالمی سطح پر ہوئے، جن کی بنا پر معیاری قوانین بنائے گئے تھے۔ ایسے آخری قوانین دو ہزار دس اور گیارہ میں بنائے گئے، جن کا مقصد تمام دنیا میں اس قسم کے رولز اور ریگولیشنز کو ہم آہنگ کرنا تھا ، مگر مسئلہ یہ ہے کہ ان پر عمل درآمد کیسے کیا جائے؟

زبیر اقبال کے بقول ''جہاں تک حسین نواز کا یہ کہنا ہے کہ ان کا کوئی عمل قانون کے مطابق ہے یا نہیں؟ میں یہ نہیں کہہ سکتا۔ میں اتنا ضرور کہہ سکتا ہوں کہ جب آپ کسی آف شور مارکیٹ میں جاتے ہیں تو بنیادی مقصد یہ ہوتا ہے کہ آپ کی آمدنی پر ٹیکس نہ لگے، کیونکہ آف شور مارکیٹس میں کام کرنے والے مالیاتی اداروں پر ٹیکس نہیں ہوتا۔ ایسے معاملات خفیہ ہوتے ہیں ، اور وہاں صرف ٹیکس بچایا ہی نہیں جاتا بلکہ ٹیکس بچانے کے طریقے بھی بتائے جاتے ہیں۔ جو شیل کمپنیاں بنائی جاتی ہیں، ان کا مقصد یہ ہوتا ہے کہ جو پیسہ آئے، اسے اس طرح استعمال کیا جائے کہ اس کا کوئی ٹریل باقی نہ رہے۔ اگر ٹریل باقی نہیں رہتا تو اس پر ٹیکس نہیں لگا یا جا سکتا۔ ہاں اگر آپ یہ کہیں کہ یہ وسائل ملک سے باہر نکالے گئے ہیں ، تو یہ بتانا ہوگا کہ کب نکالے گئے ؟ کیسے نکالے گئے اور وہ پیسہ کہاں سے آیا ہے؟ اگر یہ مان لیا جائے کہ پیسہ اس وقت بنایا گیا تھا جب نواز خاندان ،سعودی عرب میں جلا وطنی کے دن گزار رہا تھا ، تو انہوں نے وہاں جو پیسہ بنایا ، اس کا پاکستان کے ساتھ کوئی تعلق نہیں ہے۔ اگر پاکستان آنے سے پہلے ہی وہ رقم باہر ٹرانسفر ہو گئی تھی تو پھر اس پر برطانوی رولز اینڈ ریگولیشنز لاگو ہونگے، یا پانامہ کے قوانین لاگو ہونگے۔ یعنی قانونی طور پر اگر کوئی یہ ثابت کر دے کہ یہ وسائل پاکستان میں نہیں، پاکستان سے باہر پیدا کئے گئے ہیں تو واقعی پاکستان کا کوئی قانون اس پر لاگو نہیں ہوتا۔ یہ الگ بات ہے کہ اسے سیاسی طور پر غیر اخلاقی سمجھا جائے ، لیکن قانون کی روسے اس میں کچھ غلط نہیں ہے‘‘۔

پانامہ پیپرز انکشافات میں لاہور ہائی کورٹ کے ایک ریٹائرڈ جج عبد القیوم کے نام سے بھی آف شور کمپنیوں کی نشاندہی کی گئی ہے۔ شریف خاندان پر قانونی اور اخلاقی دونوں طرح کے سوال لاگو ہوتے ہیں۔ وہ میڈیا کو مہارت سے استعمال کرنا جانتے ہیں اس لئے کسی کو حسن اور حسین سے آگے نکلنے نہیں دیا جا رہا۔ عمر چیمہ کے بقول ''حسن نواز کی کمپنی 2007ء میں لائبیریا کے ایک شخص سے پچپن لاکھ پائونڈ میں خریدی گئی۔ حسین نوازکی کمپنی میں مریم صفدراور حسین نوازدونوں شیئر ہولڈر ہیں۔ لیکن اصل مسئلہ دو دوسری کمپنیوں نیسکول اور نیلسن کا ہے۔ یہ دونوں بے نامی کمپنیاں ہیں۔بے نامی کمپنی وہ ہوتی ہے جس میں ڈائریکٹر اور شیئر ہولڈر اور لوگ ہوتے ہیں اور شیئر سرٹیفکیٹ میں کوئی نام نہیں لکھا ہوتا۔ دو ہزار بارہ تک برٹش ورجن آئی لینڈ کو بھی یہ معلوم نہیں تھا کہ ان دونوں کمپنیوں کا مالک کون ہے‘ کیونکہ وہاں کے قوانین میں بے نامی کمپنیاں قائم کرنے کی اجازت تھی۔ دو ہزار آٹھ میں کچھ نئی قانون سازی ہوئی ، جس کے بعد کمپنیوں کے مالکان کی تفصیلات مانگی گئیں، نیسکول اور نیلسن کو لیٹر بارہ جون دو ہزار بارہ کو، ان کے وکیل کے ذریعے موسیک فونسیکا نام کی لا فرم کی طرف سے جاری کیا گیا ،جس کا ڈیٹا لیک ہوا ہے۔ ان سے پوچھا گیا تھا کہ ان کے بینیفشری اونر کون ہیں؟ کیا ان کے ساتھ کوئی اور کمپنی بھی منسلک ہے اور کیا ان کے ساتھ کوئی ٹرسٹ بھی جڑا ہوا ہے؟ جواب یہ آیا کہ بینیفشل اونر ہیں۔بینیفشل اونر کا جہاں بھی نام آتا ہے اس کا مطلب ہوتا ہے کہ اونر شپ خفیہ رکھی گئی ہے‘‘۔

اس سوال کے جواب میں کہ کیا وزیر اعظم مستعفی ہو سکتے ہیں؟ ایاز امیر کا کہنا تھا کہ دنیا ٹوٹ سکتی ہے، وزیر اعظم مستعفی نہیں ہو سکتے۔ لیکن اس کیس میں کچھ ثابت ہونا رہ نہیں گیا ، وہ آف شور کمپنیوںسے انکار نہیں کر رہے۔ یہ باتیں پہلے بھی گردش کرتی رہی ہیں کہ شریف خاندان کی آف شور کمپنیاں تھیں، جن کے ذریعے انہوں نے لندن میں جائیداد خریدی، ان پر منی لانڈرنگ کے الزامات بھی لگتے رہے ہیں۔ اسحا ق ڈار جو فنانس منسٹر ہیں، انہوں نے نیب میں ایک لمبا چوڑا بیان دیا تھا کہ کس طریقے سے منی لانڈرنگ ہوئی تھی۔انہوں نے کیسے فلاں فلاں نام سے FORGING کر کے لندن میں اکائونٹس کھولے اور کیسے پارک لین میں فلیٹس خریدے۔ یہ سب کچھ ریکارڈ پر ہے لیکن اس دفعہ فرق یہ ہے کہ یہ ایک انٹرنیشنل سکینڈل بن گیا ہے۔ جب آئس لینڈ کے وزیر اعظم استعفیٰ دے رہے ہیں، جب ڈیوڈ کیمرون تاویلیں کررہے ہیں ، جب آسٹرین بینک کے سربراہ استعفیٰ دے رہے ہیں تو یہ شریف خاندان کے لئے پریشانی کی بات ہے کہ وہ یہ نہیں کہہ سکتے کہ ہمارے خلاف آئی ایس آئی یا فوج کچھ کر رہی ہے یا پیپلز پارٹی یا عمران خان کچھ کر رہے ہیں۔لیکن اب بھی ان کی کوشش ہے کہ ہر بات کو رد کریں اور ماشااللہ ، انشااللہ ، سبحان اللہ کہہ کرکہیں کہ انہوں نے سب کچھ بالکل ٹھیک کیا ہے۔ ‘‘

روزنامہ دنیا ایپ انسٹال کریں