حکومت سے استعفیٰ‘ خوابوں سے نہیں!

49 دن کی حکومت کے بعد اروند کجری وال نے جان لوک پال بل اسمبلی میں مسترد ہونے پر وزارت اعلیٰ سے استعفیٰ دے دیا۔ 70 سیٹوں کی اسمبلی میں کرپشن کے خلاف اس احتساب بل کے حق میں صرف 27 ووٹ آئے جبکہ 42 ارکان نے اس کے خلاف ووٹ دیا ‘یوں اروند کجری وال کو بخوبی اندازہ ہو گیا کہ محض دہلی میں عام آدمی کی حکمرانی قائم ہونے سے کرپشن فری معاشرے کا خواب شرمندہ تعبیر نہیں ہو سکتا بلکہ ابھی عشق کے اور بھی امتحان باقی ہیں۔ 44 سالہ سابق بیوروکریٹ اروند کجری وال نے عام آدمی کے خوابوں کو تعبیر دینے کے لیے اناہزارے کی قیادت میں جس سفر کا آغاز کیا تھا اس کا اصل امتحان ہی اب شروع ہوا ہے ۔کجری وال کے عزم اور جذبے کو دیکھ کر کہنا پڑتا ہے کہ وہ آئندہ اس سے بھی بڑا کوئی معرکہ سر کرنا چاہتے ہیں۔انہوں نے اسمبلی تحلیل کرنے اور نئے الیکشن کا مطالبہ کر دیا ہے۔ عام آدمی پارٹی کا ہر ورکر اب پہلے سے زیادہ پُرعزم ہے کہ اب کی بار بھی وہ اپنے جھاڑو سے میدان سیاست کے پرانے بُرجوں کو گرانے میں کامیاب ہوں گے۔

جان لوک پال بل کے خلاف کانگریس اور بی جے پی کا مشترکہ گٹھ جوڑ عام آدمی کی حکومت کو گرانے کا باعث بنا اور یہاں یہ بات دلچسپی سے خالی نہیں کہ دونوں بڑی جماعتوں کا یہ گٹھ جوڑ کھرب پتی بھارتی مکیش امبانی کی کرپشن کے تحفظ کے لیے تھا کیونکہ اروند کجری وال نے مکیش امبانی کے خلاف ایف آئی آر درج کروائی تھی جس میں استدعا کی گئی کہ مکیش امبانی گروپ کی آئل اینڈ گیس کمپنی نے مصنوعی قلّت پیدا کر کے ملک میں گیس کی قیمتوں میں اضافہ کیا جو غریب عوام کی جیب پر ڈاکہ ڈالنے کے مترادف ہے۔ اس طرح قیمتوں میں اضافے کے بعد کمپنی اربوں روپے ناجائز منافع کما رہی ہے۔ یہی اروند کجری وال کا سب سے بڑا قصور تھا کہ بھارتی انڈسٹری کے ایک طاقتور ٹائیکون کو کرپشن کے معاملے پر کٹہرے میں کھڑا کرنے کا خواب دیکھا۔ ادھر مکیش امبانی جو دنیا کے امیر ترین افراد کی فہرست میں شامل ہیں‘ اپنے پیسے کی بدولت حکومتوں کو بنانے اور گرانے کی طاقت رکھتے ہیں۔ بقول مکیش امبانی کے کانگریس‘ مری دکان ہے‘ میں یہاں سے جو چاہے خرید سکتا ہوں۔

گھاگ سیاستدان اور ارب پتی کارخانہ دار دراصل اپنے ناجائز مفادات کا تحفظ کرتے ہیں اور مفاد کے اس کھیل میں عام آدمی کی زندگی بد سے بدتر ہوتی جاتی ہے۔ اگر جنوبی ایشیا کی سیاست کا مطالعہ کریں تو کم و بیش یہاں ہر ملک میں کرپشن اور اقربا پروری کی ایسی ہی فضا نظر آتی ہے۔ اہل اقتدار اور طاقتور ہر طرح کے احتساب سے بالاتر ہیں۔ قانون اور ضابطے عام آدمی کے لیے ہیں۔ ایسی فضا میں دہلی میں‘ عام آدمی پارٹی کے نام سے جس تحریک کا آغاز ہوا‘ اُسے مساوات اور انصاف پر مبنی معاشرے کا خواب دیکھنے والے ہر طبقہ فکر نے پذیرائی دی۔ اس قافلے کا قافلہ سالار‘ اناہزارے ہے‘ جس نے 5 اپریل 2011ء کو اینٹی کرپشن

بل ‘جسے جان لوک پال بل کا نام دیا گیا ہے ‘کے پاس ہونے تک بھوک ہڑتال کا اعلان کیا۔ کرپشن کے خلاف تحریک کا آغاز انا ہزارے نے 1998ء میں کیا لیکن دنیا بھر کی خبروں میں اناہزارے کا نام 2011ء میں آیا۔ دہلی کے سابق وزیراعلیٰ اور عام آدمی پارٹی کے سربراہ اروند کجری وال بھی اس سفر میں ان کے ہمراہ ہو لیے‘ جنہوں نے ریونیو آفیسر کی نوکری سے استعفیٰ دے کر پری ورتن کے نام سے ایک این جی او بنائی۔ اس این جی او کی چھتری کے نیچے کرپشن کے خلاف مہم چلانے کے لیے اروند نے دو سال پہلے ایک گروپ بنایا جس کا نام India against corruption تھا۔ اس میں دہلی کے بہت سے تعلیم یافتہ نوجوان شامل ہو گئے۔ بھارتی بیوروکریسی کو قریب سے دیکھنے کے بعد اروند کجری وال کو یقین ہو گیا تھا کہ جب تک طاقتور کرپٹ مگرمچھ قانون کے شکنجے میں نہیں آئیں گے یہ ناسور غریب عوام کی خوشیاں چھینتا رہے گا۔ اس ایک خواب نے کجری وال اور اناہزارے کو اکٹھا کردیا۔ 1963ء میں ڈرافٹ ہونے والے لوک پال بل میں بہت ساری نئی شقیں شامل کر کے اسے جان لوک پال بل کا نام دیا۔ جان سے جنتا یعنی عوام‘ عوامی خواہشات پر مبنی احتساب بل ہے اور اس میں کرپشن کی زیادہ سے زیادہ سزا عمر قید ہے جبکہ حکومتی ڈرافٹ میں یہ سزا صرف 7 سال ہے۔ کرپشن کے خاتمے کے لیے عملی میدان میں قدم رکھ کر اروند نے 26 نومبر 2012ء کو عام آدمی پارٹی کا باقاعدہ افتتاح کیا۔ اس خواب کو خاکروبوں سے لے کر رکشہ ڈرائیوروں اور بڑے بڑے اداروں کے سی ای اوز تک‘ سب نے سپورٹ کیا۔

اسی سپورٹ سے عام آدمی پارٹی نے الیکشن جیت کر حکومت بنائی۔ اس سارے سفر میں کجری وال نے بخوبی دیکھ لیا کہ سیاستدان عوام کے نام پر ووٹ لے کر حکومتیں تو حاصل کرتے ہیں مگر کسی بھی ایسے نظام کو اپنے وجود کے لیے خطرہ سمجھتے ہیں جو ان کو قانون کے سامنے جوابدہ کرے اور ان کی کرپشن اور بددیانتی پر سوال اٹھائے۔ یقینا ایسا ہی سسٹم عام شہریوں کے حق کا تحفظ کر سکتا ہے۔ 49 دن کی حکومت کرنے کے بعد عام آدمی پارٹی اور اروند کجری وال کے سیاسی سفر کا آغاز اب ہوا ہے۔ دیکھتے ہیں کہ گھاگ سیاستدانوں اور کھرب پتی اشرافیہ کے مقابل‘ یہ چراغ کب تک جلتا ہے۔

جہاں تک اروند کجری وال اور ان کے حامیوں کا تعلق ہے‘ ان کے عزم اور جذبوں کو دیکھ کر یہی لگتا ہے کہ وہ صرف حکومت سے مستعفی ہوئے ہیں‘ اپنے خوابوں سے نہیں...!!

روزنامہ دنیا ایپ انسٹال کریں