کلیات بیدل حیدری پر کچھ لوہارا ترکھانا

یہ کتاب مجھے محبی ناصر بشیر کے ذریعے موصول ہوئی ہے جو قمر رضا شہزاد، ڈاکٹر اختر شمار اور لاتعداد افراد سمیت شاعر موصوف کے حلقہ شاگردی میں شامل رہے ہیں اور یہ چشمۂ فیض انہوں نے عمر بھر جاری رکھا۔ اس سے پہلے ہم انجم رومانی اور احسان دانش کی صورت میں دو استادوں کو بھگت چکے ہیں اور اب ہم بے استادے ہی رہ جاتے اگر استاد ریاض مجید کا سایہ عاطفت ہمارے سروں پر موجود نہ ہوتا۔ مرحوم کی شاعری کی تحسین کرنے والوں میں احمد ندیم قاسمی، ڈاکٹر توصیف تبسم اور خود اختر شمار شامل ہیں اس لیے ان ثقہ حضرات کی موجودگی میں ہمارے لیے اس بارے کچھ کہنے سننے کی گنجائش نہیں رہ جاتی، البتہ زبان و بیان کے حوالے سے ہم اس ضمن میں کچھ معروضات پیش کریں گے چونکہ مرحوم بھی ہماری طرح بندہ بشر ہی تھے، اس لیے غلطیاں ان سے بھی ہوئیں جن کا ذکر ہم کرنے جا رہے ہیں تاکہ محبان بیدل حیدری اگر مناسب سمجھیں تو اپنا ریکارڈ درست کر لیں اور اگر کہیں میں غلط ہوںتو اس کی نشاندہی کر دیں تاکہ میری اصلاح بھی ہو جائے۔ یہ کتاب اعلیٰ گیٹ اپ کے ساتھ ادارہ ادب وثقافت فیصل آباد نے شائع کی ہے اور قیمت ایک ہزار روپے رکھی ہے۔ اس میں شاعر کے چار مجموعے ''میری نظمیں‘‘، ''پشت پہ گھر‘‘، ''ان کہی‘‘ اور ''کتبے ٹھہر گئے‘‘ شامل ہیں جس کا پیش لفظ اس کتاب کے مرتب اور مرحوم کے ایک اور شاگرد شکیل سروش نے ''استاد جی‘‘ کے عنوان سے سپرد قلم کیا ہے جو کسی حد تک محل نظر ہے کیونکہ یہ لقب بالعموم طوائفیں اپنے سینئر دلال کے لیے استعمال کرتی ہیں۔ اس کی بجائے اگر استاد صاحب ہوتا تو بہتر تھا۔ پہلا مجموعہ جیسا کہ نام سے ظاہر ہے، نظموں اور باقی غزلوں پر مشتمل ہیں جن کے آخر میں چند قطعات، رباعیاں اور مفردات شامل ہیں۔

ان گزارشات سے حضرت بیدل حیدری کی اہانت مقصود ہے نہ ان کے شاگردوں اور ہو اخواہوں کی دلآزاری بلکہ جس زبان اور کرافٹ کے حوالے سے مرحوم عمر بھر اپنے شاگردوں کو اصلاح دیتے رہے، یہ اسی زبان کو درست دیکھنے کی خواہش اور کوشش کے سوائے اور کچھ نہیں ہے کیونکہ وہ بھی ہمیشہ یہی کام کرتے رہے ہیں اور شاعر سے بھی بڑھ کر ان کی شہرت ایک استاد ہی کی رہی ہے۔ چنانچہ مقصد ان کے علم و فضل پر سوال اٹھانا نہیں کیونکہ ہو سکتا ہے یہ محض ان کی تساہل پسندی کا نتیجہ ہو چنانچہ اس کاوش کو خدمت ہی سمجھا جانا چاہیے۔ پہلی کتاب کے صفحہ 38 پر درج نظم کا آخری مصرع ہے ع

خود مجھے اکھڑے ہوئے سانسوں میں گم ہونا پڑا

سانس مونث ہے، مذکر نہیں۔ اور شاعر نے ایک اور جگہ بھی اسے مذکر باندھا ہے۔

دوسری کتاب کے صفحہ 3 پر مصرع ہے ع

چوکڑی بھرتے ہیں آنکھوں میں یوں آنسو بیدل

اس میں لفظ یوں کی وائو اور نون غنہ دونوں دب جاتے ہیں جو مستحسن نہیں۔ یہ مصرع اگر اس طرح ہوتا تو بہتر تھا۔

چوکڑی بھرتے ہیں یوں آنکھوں میں آنسو بیدل

جبکہ پہلی کتاب کے صفحہ 73 کی نظم کا یہ مصرع ساقط الوزن ہے ع

یہاں پر چھائونی اور توپوں کے دہانوں میں

دوسری کتاب کے صفحہ 4 پر مصرع ہے ع

میں پارسل کروں گا گلابِ امید اسے

ظاہر ہے کہ گلاب سے یہاں شاعر کی مراد گلاب کا پھول ہے لیکن چونکہ ترکیب لگا کر اسے مفرس کر دیا گیا ہے اس لیے اس کے معنی بدل گئے ہیں کیونکہ فارسی میں گلاب کے معنی گلاب کا پھول نہیں بلکہ عرقِ گل کے ہیں جو گل اور آب سے مل کر بنا ہے۔ یہ غلطی اکثر شعراء کرتے ہیں۔

صفحہ 78 کا ایک مصرع ہے ع

اسی زمیں سے یا پھر آسماں سے آیا ہے

یہاں یا کا الف بُری طرح گرتا ہے۔ یہ مصرع اس طرح سے بھی ہو سکتا تھا ع

اسی زمین سے یا آسماں سے آیا ہے

صفحہ 89 کا مقطع ہے ؎

بیدل یہ کون لوگ ہیں مصلوب دیکھنا

سب کے گلے میں ایک سا پھندا دکھائی دے

مصلوب لوگوں کو گلے میں پھندا ڈال کر نہیں بلکہ انہیں صلیب پر کھڑا کر کے مارا جاتا ہے جیسا کہ حضرت عیسیٰ کو مصلوب کیا گیا تھا۔

صفحہ 63 کا ایک مصرع ہیع

سوتیلا باپ اسے اس دفعہ بھی زہر لگا

یہاں سوتیلا کی وائو مکمل طور پر غائب کر دی گئی ہے۔

صفحہ 184 کے ایک مصرع میں بھی شاخ گلاب کی ترکیب ملتی ہے۔