سرخیاں ‘ متن اور تازہ غزل

اللہ کا قانون ہے کہ بدعنوان آدمی آخر پکڑا جاتا ہے: صدر ممنون حسین

صدر مملکت ممنون حسین نے کہا ہے کہ '' بدعنوان آدمی آخر پکڑا جاتا ہے کہ یہ اللہ کا قانون ہے‘‘ اگرچہ یہ بیان صاف شریف برادران کے خلاف ہے‘ لیکن اب وہ میرا کیا بگاڑ سکتے ہیں کہ خود اللہ میاں کی پکڑ میں ہیں اور میں ویسے بھی بطور صدر چند دنوں کا مہمان ہوں۔ انہوں نے کہا کہ ''میں احتساب کا ہمیشہ سے قائل رہا ہوں‘‘ لیکن اس کا اظہار اب کر رہا ہوں کہ نواز شریف جیل میں ہیں اور شہباز شریف وہاں جانے کی تیاری کر رہے ہیں۔ انہوں نے کہا کہ ''پاکستان نے اب آگے جانا ہے‘ پیچھے نہیں‘‘ کیونکہ اس نے جتنا پیچھے جانا تھا گزشتہ پانچ برسوں میں جا چکا ہے اور یہ سب کچھ میری گنہگار آنکھوں کے سامنے ہوتا رہا ہے‘ لیکن اس کا اظہار کر کے میں اپنی صدارت کو خطرے میں نہیں ڈال سکتا تھا ‘کیونکہ جس کوالیفکیشن پر مجھے صدر بنایا گیا تھا ‘اس کی بنیاد پہلے ہی بہت کمزور تھی اور نواز شریف نے صرف اپنا چسکا پورا کرنے کے لیے مجھے صدر بنایا تھا۔ آپ اگلے روز لندن میں میڈیا سے گفتگو کر رہے تھے۔

جعلی مینڈیٹ والوں کے دن زیادہ نہیں: نواز شریف

مستقل نا اہل اور سزا یافتہ سابق وزیراعظم میاں نواز شریف نے کہا ہے کہ ''جعلی مینڈیٹ والوں کے دن زیادہ نہیں‘‘ کیونکہ پانچ سال کے بعد ان کی چھٹی ہو جائے گی‘ جعلی مینڈیٹ کا نتیجہ ایسا ہی ہوتا ہے۔ اسی لیے ہم بھی بار بار پانچ سال پورے کرتے رہے ہیں‘ صرف اس دفعہ بیچ میں پکڑا گیا ہوں اور سارا مزہ ہی کرکرا ہو گیا ہے۔ انہوں نے کہا کہ '' تمام مشکلات قوم کے لیے برداشت کر رہا ہوں‘‘ کیونکہ اے سی اور ٹی وی وغیرہ میری پسند کے نہیں‘ لیکن قوم کی خاطر یہ بھی برداشت کر رہا ہوں‘ ہیں جی؟ انہوں نے کہا کہ ''کارکن صفوں میں اتحاد برقرار رکھیں‘‘ جبکہ ارکان رفوچکر ہو گئے تھے‘ ان کے لیے یہی سزا کافی ہے کہ جا کر وزیر ہو گئے ہیں اور عمران خان کے نیچے کام کرنے کا انہیں لگ پتا جائے گا۔ انہوں نے کہا کہ ''سیاسی نظم و ضبط سے آگے بڑھیں ‘‘ اگرچہ ہماری سیاست ہمیشہ کے لیے ختم ہو چکی ہے‘ کیونکہ ابھی میرے علاوہ شہباز صاحب کے خلاف بھی درجنوں کیسز تیار ہو رہے ہیں۔ آپ اگلے روز جیل میں ملاقات کے لیے آنے والوں سے گفتگو کر رہے تھے۔

ریلوے کو نیب زدہ کہنا غلط ہے: خواجہ سعد رفیق

سابق وزیر خواجہ سعد رفیق نے کہا ہے کہ ''ریلوے کو نیب زدہ کہنا غلط ہے‘‘ کیونکہ جب تک نیب مجھ پر باقاعدہ ہاتھ نہیں ڈال لیتی‘ اس وقت تک اسے نیب زدہ کیوں کر کہا جا سکتا ہے‘ بلکہ ریلوے کے علاوہ پیراگون سٹی وغیرہ جیسے کئی اور معاملات بھی ہیں ‘جس میں نیب زدہ ہونا یقینی ہے‘ لہٰذا قبل از وقت ایسی بات نہیں کرنی چاہئے ‘کیونکہ جب چاند چڑھے گا تو ساری دنیا دیکھ لے گی۔ انہوں نے کہا کہ ''قومی اداروں کو سیاسی محاذ آرائی کا مرکز نہ بنایا جائے‘‘ کیونکہ اگر انجن مہنگے خریدے گئے تھے‘ تو اس میں شیخ رشید کا کیا نقصان ہوا ہے۔ وہ اچھل اچھل کر باتیں کر رہے ہیں‘ جبکہ اتنے فربہ آدمی اک ا چھلنا ویسے بھی قُربِ قیامت کی نشانیوں میں سے ایک ہے۔آپ اگلے روز لاہور سے ایک بیان جاری کر رہے تھے۔

عمران خان خود اسمبلیاں تحلیل کر دیں گے: منظور وسان

پاکستان پیپلز پارٹی سندھ کے سینئر رہنما منظور حسین وسان نے کہا ہے کہ ''عمران خان خود اسمبلیاں تحلیل کر دیں گے‘‘ اگر اس بار نہیں تو دوسری بار ضرور کر دیں گے‘ کیونکہ میری پیشگوئیاں بے شک دیر سے پوری ہوں‘ لیکن پوری ضرور ہوتی ہیں اور جو نہیں ہوتیں‘ ان کا بھی مجھے پہلے سے پتا ہوتا ہے‘ لیکن اس کے باوجود کہہ دیتا ہوں کہ عادت سے مجبور ہوں۔ انہوں نے کہا کہ ''خان صاحب کے اعلانات اچھے ہیں‘ لیکن ان پر عمل نہیں ہوگا‘‘ اگرچہ میری یہ پیشگوئی بھی ڈھیلی ڈھالی سی ہے‘ تاہم جب مجھے پیش گوئی آتی ہے‘ تو میں اسے روک نہیں سکتا اور اللہ کا نام لے کر کر دیتا ہوں ‘کیونکہ جب سے میری پیش گوئیاں غلط ثابت ہو رہی ہیں‘ میں تھوک کے حساب سے کرتا رہتا ہوں کہ کوئی تو پوری ہوگی۔ آپ اگلے روز عید الاضحی پر وڈیو پیغام جاری کر رہے تھے۔

اور ‘ اب آخر میں یہ تازہ غزل:

وحشت صحرا میں پھینک آئے

کس تنگیٔ جا میں پھینک آئے

دنیا میں ہمیں ملا تھا جو کچھ

ہم صحنِ خدا میں پھینک آئے

کچھ بھی نہیں اپنے پاس رکھا

ہر چیز ہوا میں پھینک آئے

اس کی خاموشیوں کی گھٹڑی

امکانِ صدا میں پھینک آئے

اس بُت کی بے اثر دوا بھی

ایوانِ دعا میں پھینک آئے

اور‘ اُس کی بے وفائیاں بھی