سرخیاں، متن اور نوحہ

سعد رفیق کو آج نہیں تو کل پکڑ لیا جائے گا: نواز شریف

مستقل نااہل اور سزا یافتہ سابق وزیراعظم میاں نواز شریف نے کہا ہے کہ ''سعد رفیق کو آج نہیں تو کل پکڑ لیا جائے گا‘‘ کیونکہ موصوف کے کام میں ایسے تھے‘ جبکہ میں نے بھی انہیں کئی بار کہا تھا کہ احتیاط سے کام لیں‘ کیونکہ جو کام میں اور شہباز شریف کر رہے ہیں‘ آپ سب کے لئے وہی کافی ہونا چاہئے‘ لیکن میری ایک نہ سنی گئی‘ جس طرح بھابھی صاحبہ تہمینہ درانی نے ہم دونوں بھائیوں کو محتاط رہنے کا مشورہ دیا تھا اور ہم نے کافی احتیاط سے ہی سارا کام کیا تھا‘ لیکن پھر بھی پکڑے گئے ہیں۔ انہوں نے کہا کہ ''ضمنی الیکشن کے نتائج میں پیغام ہے کہ آنے والا وقت کس کا ہے‘‘ تاہم بعض دوستوں کی رائے یہ ہے کہ احتساب عدالتوں کے آنے والے فیصلوں میں جو پیغام آئے گا‘ اصل پیغام وہی ہوگا کہ آنے والا وقت کس کا ہے۔ انہوں نے کہا کہ ''توقع سے بڑھ کر فتح ملی‘‘ تاہم بیوقوف عوام یہ بات بھول گئے کہ ہم نے ملکی خزانے کی حالت ہی ایسی کر دی تھی کہ آئی ایم ایف اور مہنگائی نے آنا ہی تھا۔ انہوں نے کہا کہ ''حالات بدل جائیں گے‘‘ کیونکہ اگر حالات اس سے زیادہ بھی خراب ہوگئے‘ جن کا خدشہ روز بروز بڑھ رہا ہے تو یہ بھی حالات کی تبدیلی میں ہوگی‘ ہیں جی؟ انہوں نے کہا کہ ''عوام کے شکر گزار ہیں‘‘ جنہوں نے اصل صورتحال کا علم ہونے کے باوجودہمیں ووٹ دیئے۔ انہوں نے کہا کہ ''ہمارے چاربرسوں میں ڈالر 104 سے نہیں بڑھا اب 50 دنوں میں حال دیکھ لیں‘ کیونکہ ہم نے مالی حالات ہی اس قدر ابتر کر دیئے تھے کہ آئی ایم ایف کی طرف جانا ہی تھا اور ڈالر سمیت مہنگائی نے بڑھنا ہی تھا اور ہماری حکمت عملی کو کامیابی حاصل ہوئی۔ انہوں نے کہا کہ ''ہمارے زمانے میں کوئی مہنگائی نہیں تھی‘‘ اور لوگوں کو خوشی سے ہی چیخیں نکل رہی تھیں اور ایک عرصے سے خوشی کا اظہار وہ اسی طرح سے کر رہے تھے۔آپ احتساب عدالت کے باہر میڈیا سے گفتگو کر رہے تھے۔

ضمنی الیکشن نے تحریک انصاف کواُڑا کر رکھ دیا:خورشید شاہ

پاکستان پیپلزپارٹی کے مرکزی رہنما اور رکن قومی اسمبلی سید خورشید احمد شاہ نے کہا ہے کہ ''ضمنی الیکشن نے تحریک انصاف کو اڑا کر رکھ دیا ہے‘‘ اور جو ماشاء اللہ نواز لیگ کے ساتھ ہمارے اتحاد کا نتیجہ ہے‘ تاکہ حکومت کو زرداری صاحب اور دیگر شرفاء کے خلاف گھیرا تنگ کرنے کا مزہ چکھایا جاسکے اور اسے کہا جاسکے کہ ہور چوپو! بلکہ ابھی تو وہ میرے اثاثوں پر بھی تکلیف کا اظہار کر رہی تھی کہ ہم نے انہیں پوری طرح احساس دلا دیا کہ ایسے کاموں کا نتیجہ ایسا ہی نکلے گا؛ حالانکہ کسی کے اثاثوں اور جائیداد سے جلنے اور حسد کا مظاہرہ کرنے والے ایسے ہی انجام سے دو چار ہوا کرتے ہیں۔ انہوں نے کہا کہ ''عوام گرتی ہوئی معیشت پر پریشان ہیں‘‘ جبکہ ہماری گرتی ہوئی معیشت پر ہم سے زیادہ پریشان اور کون ہوگا‘ ادھر بیمار میں ایان علی کے وارنٹ گرفتاری نکالے جانے سے حکومت مزید بے نقاب ہوگئی ہے اور یہ بھی زرداری صاحب کو جذباتی صدمہ پہنچانے کے لئے کیا گیا ہے‘ شیم‘ شیم! آپ اگلے روز سکھر میں میڈیا سے بات چیت کر رہے تھے۔

جتنا قانون ہم جانتے ہیں‘ اتنا وزیراعظم نہیں جانتے: سعید غنی

سندھ کے وزیر بلدیات سعید غنی نے کہا ہے کہ ''جتنا قانون ہم جانتے ہیں‘ وزیراعظم نہیں‘‘ کیونکہ اسی قانون دانی کی وجہ سے ہمارے شرفاء پکڑے جانے سے بچے ہوئے ہیں اور اگر پکڑے بھی جائیں ‘تو جلدی ہی چھوٹ بھی جاتے ہیں اور اگر ہم قانون کے ماہر نہ ہوتے تو اب تک ماشاء اللہ ہماری پارٹی ہی اندر ہوتی‘ لیکن اب نیب کے ادارے کچھ اور ہی طرح کے لگتے ہیں اور ایسا لگتا ہے کہ ہماری قانون دانی بھی کچھ زیادہ کام نہیں آئے گی‘ کیونکہ جعلی اکائونٹس والا جو گل کھلا ہے‘ اس سے بچنے کی کوئی صورت مشکل ہی سے نکلتی نظر آتی ہے۔ انہوں نے کہا کہ ''وفاقی وزیر فیصل واوڈا کا رویہ اور لب ولہجہ انتہائی نامناسب تھا‘‘ کیونکہ اگر حکومت نے باز ہی نہیں آنا تو کم از کم لب و لہجہ تو ٹھیک رکھنا چاہئے۔ آپ اگلے روز فیصل واوڈا کے بیان پر تبصرہ کر رہے تھے۔

اور اب ڈاکٹر تحسین فراقی کے اپنے جواں مرگ بیٹے کی یاد میں کہے گئے اشعار میںسے:

ہمارے دل کو لہو کر کے تو نے وقت وداع

پلٹ کے بھی نہیں دیکھا یہ کیسی عجلت تھی

مرے مسافر تنہا‘ مرے حبیب لبیب

ترے وجود سے اس گھر میں کیسی برکت تھی

گرد و پیش آتی ہے ہر دم ترے انفاس کی باس

روز اس دل میں کوئی پھول کھلاتا ہے ترا

اکیلا چھوڑ کے تنہا کہاں چلا گیا ہے

مرا خموش ستارا کہاں چلا گیا ہے

ستارہ بار ہیں جس کے فراق میں آنکھیں

وہ جان و دل کا اجالا کہاں چلا گیا ہے

وہ جس کو دیکھ کے دل میں چراغ جلتے تھے