سرخیاں‘متن‘ مردہ شہر میں زندہ آدمی اور عامرؔ سہیل

نواز شریف کی عدم موجودگی میں مشن جاری رکھیں گے: شہباز شریف

سابق وزیر اعلیٰ پنجاب میاں شہباز شریف نے کہا ہے کہ ''نواز شریف کی عدم موجودگی میں مشن جاری رکھیں گے‘‘ یعنی میں اور میرے ساتھی یہ مشن الگ جاری رکھیں گے اور مریم نواز اور اُن کا میڈیا سیل الگ‘ جبکہ میری واپسی بھی خاصی مشکوک ہے ‘کیونکہ میں نے بھی اپنی کمر درد کا علاج کروانا ہے‘ جس میں کئی سال بھی لگ سکتے ہیں ‘کیونکہ یہ کمر ہمت ہے‘ جو مکمل طور پر درست ہونی چاہیے‘ اس کے علاوہ لاتعداد نئی بیماریاں بھی شامل ہوں گی‘ جن کا انکشاف وہاں جا کر ہوگا‘ کیونکہ کچھ بیماریاں ایسی ہوتی ہیں‘ جن کا انکشاف جیل جانے پر ہوتا ہے اور ہسپتال داخلے کی ضرورت پڑ جاتی ہے اور اگر ہم دونوں کی صحت درست نہ ہوئی اور جس کا پورا پورا امکان موجود ہے‘ تو ہم وہاں سیاسی پناہ حاصل کرنے کیلئے بھی درخواست دے سکتے ہیں ۔ آپ اگلے روز نواز شریف کی بیرون ملک روانگی پر مشاورت کر رہے تھے۔

عمران پر کپکپی طاری ہے‘ خیالی پلاؤ نہیں پکا رہے: فضل الرحمن

جمعیت علمائے اسلام (ف) کے سربراہ مولانا فضل الرحمن نے کہا ہے کہ ''عمران پر کپکپی طاری ہے‘ خیالی پلاؤ نہیں پکا رہے‘‘ اور اب معلوم ہوا ہے کہ یہ کپکپی غصے کی وجہ سے ان پر طاری ہو گئی ہے کہ میں خواہ مخواہ اپنا اور قوم کا وقت ضائع کر رہا ہوں؛ حالانکہ غصے میں مبتلا ہونے کی بجائے انہیں استعفیٰ دے کر اس غصے سے نجات حاصل کر لینی چاہیے تھی اور جہاں تک خیالی پلاؤ کا تعلق ہے تو اسے لے کر گھر سے نکلنے کی بجائے ہم نے دھرنے کے دوران ہی پکانا شروع کر دیا تھا ‘جبکہ شرکاء اسی کے بل بوتے پر ابھی تک چل رہے ہیں ‘بلکہ ہم نے تو خیالی حلوہ بھی کافی مقدار میں پکا لیا تھا کہ نمکین چیز کے بعد میٹھا بھی کھانے کو جی چاہتا ہے اور انہیں یہاں پر حلوہ کھانے کی ریہرسل بھی کرنا تھی‘ کیونکہ شہید ہونے کے بعد جنت میں بھی ان کی حلوے ہی سے تواضع ہونی تھی‘ جبکہ میں تو رات کو اپنے دوستوں ہی کے ہاں سے پیٹ بھر کر حلوہ کھا آیا کرتا تھا۔ آپ اگلے روز اسلام آباد میں ایک نجی ٹی وی چینل کو انٹرویو دے رہے تھے۔

عمران اور پاکستان اب ایک ساتھ نہیں چل سکتے: قمر زمان کائرہ

پیپلز پارٹی وسطی پنجاب کے صدر قمر زمان کائرہ نے کہا ہے کہ ''عمران خان اور پاکستان اب ایک ساتھ نہیں چل سکتے‘‘ کیونکہ پاکستان اب ہمارے ساتھ چلے گا اور عمران خان صرف حکومت چلائیں گے اور پانچ سال پورے کر کے اگلے پانچ سال کی تیاری کر رہے ہوں گے‘ جبکہ ہمارے زعماء ایک ایک کر کے اندر ہوتے جائیں گے‘ جو کہ سراسر زیادتی ہے اور جن صاحب نے خورشید شاہ کے اکاؤنٹ میں 25لاکھ روپے جمع کرائے تھے‘ یہ وہ رقم تھی‘ جو انہوں نے شاہ صاحب سے اُدھار لے رکھی تھی اور شاہ صاحب نے بھی کسی اور سے اُدھار لے کر اُنہیں دی تھی اور اس چھوٹی سی بات کا اتنا بڑا بتنگڑ بنا لیا گیا ہے‘ کیونکہ شاہ صاحب تو پیسے سے ویسے بھی سخت نفرت کرتے ہیں ‘جبکہ خود میں نے کئی بار انہیں پیسے سڑک پر پھینکتے دیکھا ہے‘ بلکہ خود وہ پیسے اٹھا بھی لیتا تھا‘ کیونکہ میں پیسوں کی بے ادبی ہرگز برداشت نہیں کر سکتا۔ آپ اگلے روز میڈیا سے گفتگو کر رہے تھے۔

مُردہ شہر کا زندہ آدمی

یہ ناصر حسنی کے افسانچوں کا مجموعہ ہے‘ جسے حسنی کتاب گھر مہاجر کالونی بہاولپور نے شائع کیا ہے۔ انتساب معروف پارلیمنٹیرین ممتاز شاعر تابش الوری کے نام ہے۔ سرورق ذیشان یوسف باجوہ کا تیار کردہ ہے‘ جس میں قبرستان میں ایک زندہ آدمی کو بیساکھیوں کے سہارے چلتا ہوا دکھایا گیا ہے۔ ابتداء میں خصوصی مطالعہ کے عنوان سے خورشید ناظر نے مصنف کا تعارف کرایا ہے‘ اس کے بعد ''افسانہ نگاری کا رخشندہ ستارہ‘‘ کے عنوان سے مشتمل تحریر ہے‘ جس پر لکھنے والے کا نام نہیں ‘ ہو سکتا ہے‘ یہ مصنف کے اپنے ہی زورِ قلم کا نتیجہ ہو! پس سرورق مصنف کی تصویر ہے ۔ افسانچوں کی تعداد 57ہے۔ افسانچہ افسانے سے بہتر اس لئے ہے کہ یہ افسانے کی نسبت جلدی ختم ہو جاتا ہے‘ تاکہ قاری کوئی اور کام بھی دیکھ بھال سکے‘ جبکہ بعض افسانچے نصف سے بھی کم صفحے پر مشتمل ہیں‘ جو قاری ایسی تحریروں کو پسند کرتے ہیں انہیں یہ کتاب ضرور پسند آئے گی۔

پچھلے ہفتے عامر ؔسہیل کی جو غزل درج کی تھی‘ اس کا بقیہ پیش ہے:

یہ درد ہے کہ کوئی کھانستا ہوا راہب

یا وہ فقیر جسے بوریا نصیب نہ ہو

پڑھیں جو آنکھ تو خالی ہو خانۂ تقدیر

زمیں پہ فال کھلے‘ زائچہ نصیب نہ ہو

سو بارشیں تو کرو‘ تم گزارشیں تو کرو

کہیں لکھا تو نہیں نینوا نصیب نہ ہو

جو داستانِ جدائی کے بیچ سو جائیں

ہمیں تمہاری گلی کی ہوا نصیب نہ ہو

میں موم موم پگھل کر اسے مناؤں گا

کوئی چراغ‘ کوئی رتجگا نصیب نہ ہو

میں دُلہنوں کو دلاسے کا کون شبد کہوں