سرخیاں‘متن‘ درستی اور ابرارؔ احمد کی نظم

پارٹی کو منظم کرنے کیلئے نچلی سطح پر تنظیم سازی کی جائے: احسن اقبال

سابق وفاقی وزیر داخلہ اور نواز لیگ کے مرکزی رہنما چوہدری احسن اقبال نے کہا ہے کہ ''پارٹی کو منظم کرنے کیلئے نچلی سطح پر تنظیم سازی کی جائے‘‘ کیونکہ اوپر کی سطح تو لندن کو پیاری ہو چکی اور باقی ماندہ سرکاری مہمان بننے والی ہے‘ اس لیے نچلی سطح ہی باقی رہ جاتی ہے‘ تاہم اوپر والی سطح کو لندن میں منظم کیا جا سکتا ہے ‘جہاں مریم بی بی بھی جانے کو تیار بیٹھی ہیں ‘جبکہ رانا ثنا اللہ مقدمے سے تو فارغ ہوتے نظر آتے ہیں؛ البتہ آمدن سے زیادہ اثاثوں والا معاملہ ابھی باقی ہے‘ جو زیادہ سنگین بھی ہے؛ حالانکہ ‘اگر آمدن نہ ہو تو اثاثے کیسے بن سکتے ہیں؟ بلکہ ان کی تو آمدن اس سے بھی زیادہ تھی اور ابھی وہ اثاثوں میں اپنی مزید آمدنی کے مطابق‘ اضافہ کرنے ہی والے تھے کہ انتقامی کارروائی کر کے انہیں اندر کر دیا گیا۔ آپ اگلے روز پارلیمنٹ ہائوس میں صوبائی عہدیداروں کو ہدایات جاری کر رہے تھے۔

ہمارے منصوبوں پر تختیاں لگا کر عوام کو بیوقوف بنا یا جا رہا ہے: سعد رفیق

سابق وزیر ریلوے اور نواز لیگ کے اہم عہدیدار خواجہ سعد رفیق نے کہا ہے کہ '' ہمارے منصوبوں پر تختیاں لگا کر عوام کو بیوقوف بنا یا جارہا ہے‘‘ حالانکہ عوام کو بیوقوف بنانے کے اور بھی کئی طریقے ہیں‘ مثلاً تیز رفتار ترقی کے نام پر خود اپنی ترقی کرنا وغیرہ‘ نیز عوام کو ہم پہلے ہی اس قدر بیوقوف بنا چکے تھے کہ اب‘ ان میں مزید بیوقوف بننے کی گنجائش ہی نہیں تھی‘ جبکہ یہ سارے منصوبے اس لیے ادھورے رہ گئے تھے کہ ہم عوام کی خدمت میں لگے رہے اور ان منصوبوں کو مکمل کرنے کا ہمیں وقت ہی نہ ملا‘ تاہم ان نامکمل منصوبوں میں بھی اصل خدمت تو ہم کر ہی چکے تھے اور خیال تھا کہ انہیں اپنی دوسری باری میں توڑ چڑھا لیں گے‘ لیکن پھر ہماری باریاں ہی بند کر دی گئیں۔ آپ اگلے روز لاہور میں میڈیا سے گفتگو کر رہے تھے۔

2023ء کے انتخابی نتائج کیلئے منصوبہ بندی شروع ہو چکی : سراج الحق

امیر جماعت اسلامی پاکستان سینیٹر سراج الحق نے کہا ہے کہ ''2023ء میں مرضی کے انتخابی نتائج کیلئے منصوبہ بندی شروع ہو چکی‘‘ اوریہ اطلاع دونوں بڑی پارٹیوں کیلئے ہے‘ کیونکہ انتخابات کے نتائج ہمارا تو کبھی مسئلہ ہی نہیں رہے اور نہ ہی ہم نتائج کی خاطر انتخابات لڑتے ہیں‘ جبکہ نتائج ہمیں پہلے ہی اچھی طرح سے معلوم ہوتے ہیں اور محض وضع داری کی خاطر الیکشن میں حصہ لیتے ہیں ‘ کیونکہ ہم نے نشستوں کا کبھی لالچ نہیں کیا اور نہ ہی تاریخ نے کبھی ہماری پروا کی ہے اور ہم بقول شاعر: ؎

بیکار مباش کچھ کیا کر

کپڑے ہی ادھیڑ کر سیا کر

آپ لاہور میں پریس کانفرنس سے خطاب کر رہے تھے۔

درستی

محترم میم سین بٹ نے اپنے کالم میں پانچ شعر درج کیے ہیں‘ جو غالباً ٹائپ کی غلطی سے بے وزن ہو گئے ہیں‘ مثلاً:؎

یہ کاروبارِ فراغت تمام کرنے کو

صبح گھر سے نکلتا ہوں شام کرنے کو

اس کے دوسرے مصرعے کے شروع میں لفظ ''میں‘‘ شامل ہونے سے رہ گیا ہے۔ دوسرا شعر اس طرح درج ہے: ؎

خیال و خواب کی حجت نے کر دیا مجبور

اپنی نیند سے نکلا ہوں کام کرنے کو

اس کے بھی دوسرے مصرع میں لفظ ''میں‘‘ چھپنے سے رہ گیا ہے‘ تیسرا شعر اس طرح نقل کیا گیا ہے؎:

کلی کو پھول بنا کر گزر گئی بہار