سرخیاں‘متن اور انجم قریشی کی شاعری

کورونا کے ساتھ غربت سے نمٹنا چیلنج ہے: عمران خان

وزیراعظم عمران خان نے کہا ہے کہ ''کورونا کے ساتھ غربت سے نمٹنا چیلنج ہے‘‘ حالانکہ غربت سے نمٹنا ہمارے لیے کورونا کے بغیر بھی ایک چیلنج تھا ‘لیکن یہ لڑائی ہم نے عوام کے سپرد کر دی ہے کہ کورونا سے ڈرنا نہیں‘ بلکہ لڑنا ہے؛ اگرچہ پہلے عوام کو یہی تلقین کی گئی تھی کہ گھبرانا نہیں؛ حالانکہ میں خود اس دوران کافی گھبراہٹ کا شکار رہا ہوں اور اسی لیے کورونا کیخلاف ایک نہیں ‘بلکہ کئی حکمت عملیوں پر عمل کرنا پڑا اور اب‘ لوگ صرف اپنی بد احتیاطی سے مر رہے ہیں؛ حالانکہ مرنے کے لیے بھی احتیاط سے کام لینا چاہیے۔ آپ اگلے روز کراچی میں پی ٹی آئی کی کور کمیٹی کے ارکان سے خطاب کر رہے تھے۔

حکومت نے کورونا کے خلاف جنگ

میں ہتھیار ڈال دیئے: شہباز شریف

سابق وزیراعلیٰ پنجاب میاں شہباز شریف نے کہا ہے کہ ''حکومت نے کورونا کے خلاف جنگ میں ہتھیار ڈال دیئے‘‘ اور وہی ہتھیار میرے اور میرے جملہ لواحقین کے خلاف اٹھا لیے ہیں اور خواہ مخواہ ہمارے اثاثوں کے پیچھے پڑی ہوئی ہے‘ جبکہ بھائی صاحب نے یہ کہہ کر سب کا منہ بند کر دیا تھا کہ اگر میرے اثاثے میرے ذرائع آمدنی سے زیادہ ہیں تو اس سے کسی کو کیا ہے؟ جبکہ اثاثے بنانے ہی کے لیے ہوتے ہیں‘ بگاڑنے کے لیے نہیں اور ان پر وہی لوگ اعتراض کرتے ہیں ‘جو خود اپنی نالائقی کی وجہ سے اثاثے نہیں بنا سکتے ہیں اور دوسرں کے اثاثوں کی گنتی میں لگے رہتے ہیں؛ حالانکہ انہیں گنتی بھی اچھی طرح سے نہیں آتی۔ آپ اگلے روز طارق عزیز کے انتقال پر تعزیت کرنے کے بعد میڈیا سے گفتگو کر رہے تھے۔

وزیراعظم کا دورۂ سندھ عوام کے زخموں

پر نمک پاشی ہے: بلاول بھٹو زرداری

چیئر مین پاکستان پیپلز پارٹی بلاول بھٹو زرداری نے کہا ہے کہ ''وزیراعظم کا دورۂ سندھ عوام کے زخموں پر نمک پاشی ہے‘‘ اگرچہ یہ زخم ہمارے اپنے ہی لگائے ہوئے ہیں‘ لیکن ہم ان پر نمک پاشی نہیں کرتے‘ کیونکہ یہاں نمک دستیاب ہی نہیں ‘جبکہ یہ نمک وزیراعظم خود ہمراہ لائے تھے کہ کھیوڑہ سمیت نمک کی ساری کانیں اسلام آباد کے قریب ہی واقع ہیں اوریہاں ہمارے ہاں‘ سمندر کے پانی سے جو نمک تیارہوتا ہے‘ وہ زخموں پر چھڑکنے کے کام ہی نہیں آسکتا اور اسی لیے ہم اسے نمک ِحرام کہا کرتے ہیں‘ کیونکہ کھائے ہوئے نمک کو حلال کرنا کوئی آسان کام نہیں ہے‘ جبکہ آسان کام ایک ہی ہے ‘جو میرے والد گرامی صاحب کو خوب آتا ہے او روہ اسے کرتے بھی خوب ہیں۔ آپ اگلے روز کراچی میں میڈیا کے نمائندوں سے گفتگو کر رہے تھے۔

کاغذ کے شیر کورونا پر خود ڈھیر ہو گئے: شہباز گل

وزیراعظم کے معاونِ خصوصی شہباز گل نے کہا ہے کہ ''کاغذ کے شیر کورونا پر خود ڈھیر ہو گئے‘‘ اور کورونا کو ہمارے لیے چھوڑ دیا؛ حالانکہ ہمارے سامنے کورونا سے بھی بڑے مسائل ہیں اور جو کورونا کی طرح ہم سے بھی حل نہیں ہو رہے‘ لیکن ہم ان کے سامنے ڈھیر نہیں ہوئے ‘بلکہ چھوٹی چھوٹی ڈھیریوں کی شکل میں ہر وقت موجود رہتے ہیں۔ اور اگرچہ اصلی شیر ہم بھی نہیں ہیں؛ البتہ ہم جنگل کے بادشاہ ضرور ہیں ‘جو کہ ہمیں بطورِ خاص تصور کیا گیا ہے‘ تاہم ہماری حیثیت بھی شیر آیا‘ شیر آیا‘ دوڑنا سے زیادہ نہیں ہے‘ لیکن ایک دن ایسا ہوا کہ ہم واقعی آ گئے اور شور مچانے والوں کو اپنی جان کے لالے پڑ گئے۔ آپ اگلے روز اسلام آباد سے قومی میڈیا کیلئے ایک بیان جاری کر رہے تھے۔

اور‘ اب آخر میں انجم قریشی کی یہ دو نظمیں:

تینوں پیار میں کس لئی کرنی آں

تینوں پیار میں ایس لئی کرنی آں تیرا ہور کراں میں کیہ

جدوں جدوں مرزا جمیا‘ نال صاحباں وی سی

تینوں پیار میں ایس لئی کرنی اں جس لئی کُرلاوے کاں

گُڑ نالوں مٹھا دکھ نہیں بن تیرے میں کِنج رہواں

تینوں پیار میں ایس لئی کرنی آں جس لئی آسمان تے تارے

گھاہ نواں پھُٹدا جس کارن پھل کھڑدے نیں سارے

تینوں پیار میں ایس لئی کرنی آں کہ سپھل ہو جاوے جینا

دُکھ جرنا مینوں آ جاوے تے سُکھ نال بھر جائے سینا

تینوں پیار میں ایس لئی کرنی آں کہ توح جھلیں اپنا ابھیمان

نیویاں ہو کے عرشاں توں کریں پیار تے دیویں مان