کاک ٹیل

حکومتی جھوٹ کی سزا عوام کاٹ رہے ہیں: مریم اورنگزیب

نواز لیگ کی ترجمان مریم اورنگزیب نے کہا ہے کہ ''حکومتی جھوٹ کی سزا عوام کاٹ رہے ہیں‘‘ جبکہ ان جھوٹوں کی سزا وہ پہلے ہی کافی کاٹ چکے تھے جنہیں ہمارے قائد 'سیاسی بیان‘ کہا کرتے تھے اس لئے وہ جھوٹ پارلیمنٹ میں بھی بولا گیا۔ عدالت میں بھی اور عوام میں بھی، جبکہ حکومتی جھوٹ صرف عوام میں بولنا چاہئے، اس لئے اس میں کوئی ورائٹی نہیں ہے، نیز ہمارے عملی جھوٹ کی روشن مثال ہمارے قائد کی صحت کی صورت حال ہے کہ وہ بیمار بھی ہیں اور علاج بھی نہیں کرواتے حتیٰ کہ ہسپتال کی انہوں نے وہاں شکل تک نہیں دیکھی بلکہ اکثر اوقات سیر سپاٹا ہی کرتے پائے جاتے ہیں، جس کی تصاویر بھی اخبارات کی زینت بنتی رہتی ہیں۔ آپ اگلے روز اسلام آباد میں فواد چودھری کے نواز شریف بارے ٹویٹ کا جواب دے رہی تھیں۔

عاشورہ کے بعد اپوزیشن متفقہ لائحہ عمل بنائے گی: کائرہ

پیپلز پارٹی پنجاب کے صدر قمر زمان کائرہ نے کہا ہے کہ ''عاشورہ کے بعد اپوزیشن متفقہ لائحہ عمل بنائے گی‘‘ اور اس سے پہلے ہم اس ایجنڈے پر متفق ہونے کی بھی کوشش کریں گے کیونکہ پہلے بھی ہماری طرف سے ہی اختلاف کا مظاہرہ کیا جا رہا ہے کیونکہ اختلافِ رائے ہی جمہوریت کی جان ہے اور ہم جمہوریت کے سب سے بڑے علمبردار بھی ہیں جبکہ جو کارنامے ہم اپنے دور میں کر گزرے ہیں وہ جمہوریت ہی کا ثمر ہیں کیونکہ اس میں پوچھنے والا تو کوئی ہوتا ہی نہیں لیکن اب پی ٹی آئی کے اس غیر جمہوری دور میں چھوٹی چھوٹی باتوں پر بھی پوچھ گچھ شروع ہو جاتی ہے۔ آپ اگلے روز لاہور سے ایک بیان جاری کر رہے تھے۔

نواز شریف کمٹمنٹ کر کے گئے‘ واپس آنا چاہئے: یاسمین راشد

وزیر صحت پنجاب ڈاکٹر یاسمین راشد نے کہا ہے کہ ''نواز شریف کمٹمنٹ کر کے گئے‘ واپس آنا چاہئے‘‘ کیونکہ وہ ہمیشہ اپنی کمٹمنٹ پوری کرتے ہیں جیسا کہ ہم اپنی ہر کمٹمنٹ پوری کر رہے ہیں جس کے نتیجے میں تبدیلی بھی آئی ہے اور نیا پاکستان بھی بن گیا ہے بلکہ اب تو یہ پھر پرانا ہو رہا ہے کیونکہ ہر نئی چیز کو بالآخر پرانا ہونا ہوتا ہے جبکہ ہماری اہم ترین کمٹمنٹ یہ تھی کہ بزدار صاحب اپنے عہدے پر قائم رہیں گے جو اُسی طرح اپنے عہدے پر براجمان ہیں اور اپوزیشن کی ساری قیاس آرائیاں ناکام ہو کر رہ گئی ہیں۔ آپ اگلے روز ایک نجی ٹی وی چینل کے ایک پروگرام میں شریک تھیں۔

تبدیلی نظر آنی چاہیے‘ عوامی مسائل کیلئے خود نکلوں گا: بزدار

وزیراعلیٰ پنجاب سردار عثمان بزدار نے کہا ہے کہ ''تبدیلی نظر آنی چاہئے، عوامی مسائل کے لئے خود نکلوں گا‘‘ بشرطیکہ مجھے پہلے ہی نہ باہر کر دیا جائے کیونکہ آثار مجھے کچھ اچھے نظر نہیں آتے اور جہاں تک تبدیلی کا تعلق ہے تو بیشک یہ نظر نہیں آ رہی، اسی لئے میں کہتا ہوں کہ یہ اگر کہیں ہے تو اسے نظر بھی آنا چاہیے جیسا کہ میں ہوں اور نظر بھی آ رہا ہوں اور جب تک ہوں، سب کو نظر بھی آتا رہوں گا اور اگر گیا تو سب کو جاتا ہوا بھی نظر آئوں گا جبکہ میری تبدیلی تو اتنی بڑی تبدیلی ہو گی کہ سب کو‘ اور، دُور سے ہی نظر آنا شروع ہو جائے گی، بیشک میں خود نظر نہ آؤں، تبدیلی ضرور سب کو نظر آئے گی۔ آپ اگلے روز لاہور میں ایک اجلاس کی صدارت کر رہے تھے۔

نیب کا فیصلہ بعد میں آتا، وزرا

اعلان پہلے کر دیتے ہیں: سراج الحق

امیر جماعت اسلامی پاکستان سینیٹر سراج الحق نے کہا ہے کہ ''نیب کا فیصلہ بعدمیں آتا، وزراء اعلان پہلے کر دیتے ہیں‘‘ جبکہ یہ دونوں کام ایک ہی وقت میں ہونے چاہئیں اور دونوں کا اکٹھا بیان آنا چاہئے جس سے ثابت ہو کہ سب ایک صفحے پر ہیں اور اس ضمن میں کسی کے ذہن میں کوئی شک و شبہ باقی نہ رہے اور اس مثبت بیان پر میں جائز طور پر حکومت سے داد کا طالب ہوں جبکہ احتسابی ادارے کو بھی میرا ممنون ہونا چاہئے اور اگر اس نے اپنے فیصلے وزراء کے بیانات کے بعد ہی دینا ہیں تو اس کارِ خیر میں مجھے بھی شریک کر لیا کرے کیونکہ ایک عرصۂ دراز سے ہر نیک کام میں میری شمولیت مستقل چلی آ رہی ہے۔ آپ اگلے روز منصورہ میں ایک اجلاس سے خطاب کر رہے تھے۔

سانپ

ٹرین میں ایک مسافر سفرکررہا تھا۔ سامنے والی برتھ پر ایک انگریز بیٹھا اخبار پڑھنے میں منہمک تھا۔ یکایک اس نے دیکھا کہ اس کی برتھ کے دوسرے سرے پر ایک سانپ بیٹھا ہے۔ اس نے سانپ سانپ کہہ کر چلانا شروع کیا تو انگریز نے اخبار ذرا نیچے کھسکایا اور بولا، ''یہ میرا نہیں ہے!‘‘

پاگل

کریانے کی دو دکانیں ساتھ ساتھ تھیں‘ ایک روز ایک دکاندار نے دیکھا کہ ساتھ والی دکان کا لڑکا اُس کی بوری میں سے آٹا نکال کر اپنی بوری میں ڈال رہا ہے۔ اس نے لڑکے کے مالک سے شکایت کی تو اس نے بتایا کہ لڑکا پاگل ہے، جس پر دکاندار خاموش ہو رہا۔ کچھ دن بعد اس نے پھر دیکھا کہ وہ لڑکا اس کی بوری میں سے آٹا نکال کر اپنی بوری میں ڈال رہا ہے جس پر اس نے ساتھ والے دکاندار سے دوبارہ شکایت کی تو وہ بولا''آپ کو بتایا تھا کہ لڑکا پاگل ہے‘‘۔ اس پر وہ بولا''اگر یہ واقعی پاگل ہے توکبھی اپنی بوری میں سے آٹا نکال کر میری بوری میں بھی ڈالے!‘‘

اور‘ اب آخر میں حسین مجروح کی شاعری:

رخشِ مفاد و مصلحت! مُنہ میں ذرا لگام لے

اپنے غبار و گرد سے جھک کے دُعا سلام لے

اے میری دسترس کی شام! مجھ میں کوئی دیا جلا

نیند کھڑی ہے منتظر کب مرا ہاتھ تھام لے

میں ترا مبتلا سہی‘ لیکن ترا گدا نہیں

خواہشِ خود سپردگی‘ مجھ سے بھی کوئی کام لے

کرنا ہے کل جو فیصلہ آج ہی کر اے زندگی!

وقت پہ منحصر نہ ہو، ہاتھ میں انتظام لے

آیا ہے تیرے پاس دل پیار کی اشرفی لئے

حسنِ مطالبہ شعار دولتِ خواہشِ خام لے

یورشِ حُسن صلح کر والیٔ ملکِ چاہ سے