کاک ٹیل

گیس کی صورتحال انتہائی تشویشناک، سردیوں

میں شدید قلت پیدا ہوگی: عمران خان

وزیراعظم عمران خان نے کہا ہے کہ ''گیس کی صورتحال انتہائی تشویشناک، سردیوں میں شدید قلت پیدا ہوگی‘‘ اس لیے قوم کو میرا مشورہ ہے کہ سردی سے بچنے کے لیے رضائی کا استعمال زیادہ سے زیادہ کریں حتیٰ کہ دفاتر میں بھی رضائی اوڑھ کر آ سکتے ہیں جبکہ کھانا پکانے کے لیے بھی گیس کا انتظار کر کے اپنا وقت ضائع نہ کریں کیونکہ یہ ہرگز نہیں آئے گی بلکہ لکڑیوں کے ذریعے چولہا گرم رکھیں جبکہ ایک ارب درختوں کی کاشت سے ملک میں لکڑیوں کی کمی کا مسئلہ بھی ختم ہو گیا ہے۔ آپ اگلے روز اسلام آباد میں گیس کے حوالے سے ایک سیمینار سے خطاب کر رہے تھے۔

سیاست میں کبھی کچھ ہوتا ہے کبھی کچھ : آصف زرداری

پیپلز پارٹی کے مرکزی رہنما اور سابق صدر آصف علی زرداری نے کہا ہے کہ ''سیاست میں کبھی کچھ ہوتا ہے کبھی کچھ‘‘ یعنی کبھی پکڑے جاتے ہیں اور کبھی چھوٹ جاتے ہیں اور یہ ہمیشہ کے لیے پکڑے جانے سے بہت بہتر ہے‘ اور ایسا لگتا ہے کہ ہمیشہ کے لیے پکڑے جانے کے دن بھی اب کچھ زیادہ دور نہیں ہیں اور اگر جیل میں پہلے جیسی عیاشیاں دستیاب ہوتی ہیں تو کیا ہی کہنے۔ اس صورت میں ہر سیاست دان کو جیل ہی کی تمنا کرنی چاہیے ورنہ پلی بارگین میں کچھ دے دلا کر خلاصی کروائی جا سکتی ہے حالانکہ یہ سب انتقامی کارروائی ہوتی ہے اور شریف آدمیوں کو خواہ مخواہ پریشان کیا جاتا ہے۔ آپ اگلے روز اسلام آباد میں میڈیا سے گفتگو کر رہے تھے۔

لاہور میں مزید 11 لنگر خانے کھولے جائیں گے: بزدار

وزیراعلیٰ پنجاب سردار عثمان بزدار نے کہا ہے کہ ''لاہور میں مزید 11 لنگر خانے کھولے جائیں گے‘‘ اور رفتہ رفتہ ملک کو ایک بڑا لنگر خانہ بنا کر رکھ دیں گے جس سے عوام کے لیے روٹی کا مسئلہ ہمیشہ کے لیے حل ہو جائے گا اور انہیں دو وقت صرف روٹی کھانے کی زحمت اٹھانا پڑے گی اور کام کاج کی اذیت سے ہمیشہ کے لیے گلو خلاصی حاصل ہو جائے گی اور ملک کا کام اور نظام تو اپنے آپ ہی چلتا رہے گا جبکہ رہائش کا مسئلہ ہم اپنی ہائوسنگ سکیم کے ذریعے ویسے ہی حل کر دیں گے۔ آپ اگلے روز شاہ جمال میں لنگر خانے کا افتتاح کر رہے تھے۔

نواز شریف کو اشتہاری قرار دینا افسوسناک ہے: شہباز شریف

سابق وزیراعلیٰ پنجاب میاں شہباز شریف نے کہا ہے کہ ''نواز شریف کو اشتہاری قرار دینا افسوسناک ہے‘‘ جبکہ اشتہارِ گمشدگی تو اس آدمی کے لیے دیا جاتا ہے جس کا کوئی اتا پتا نہ ہو جبکہ یہ کس کو معلوم نہیں کہ وہ لندن میں جوانیاں مان رہے ہیں اور کم خوری کی وجہ سے بیمار بھی ہو گئے تھے جس کے تدارک کے لیے خوش خوراکی کے نئے ریکارڈز قائم کر رہے ہیں اور انہیں صرف ڈاکٹروں نے روکا ہوا ہے جو زیادہ تر بھارت نژاد ہیں اور ان کے جذبات و سہولتوں کا خود ہی بہت خیال رکھتے ہیں۔ اس لیے میری درخواست ہے کہ وہ اشتہار واپس لیا جائے اور اس سلسلے میں نواز شریف سے معذرت بھی کی جائے۔ آپ اگلے روز لاہور میں شہید حوالدار لیاقت کو خراج تحسین پیش کر رہے تھے۔

مسئلہ کشمیر پر بھارت دو طرفہ گفتگو کیلئے تیار نہیں: شاہ محمود

وزیر خارجہ شاہ محمود قریشی نے کہا ہے کہ ''مسئلہ کشمیر پر بھارت دو طرفہ گفتگو کے لیے تیار نہیں‘‘ اور یہ بات مجھے حال ہی میں مصدقہ ذرائع سے معلوم ہوئی جسے میں عوام کے ساتھ شیئر کرنا ضروری سمجھتا ہوں کیونکہ ہر کامیاب حکومت کا فرض ہے کہ وہ ہر پیچیدہ مسئلے کے بارے عوام کو تازہ ترین صورت حال سے با خبر رکھے بلکہ اس بیان سے میں بیرونی دنیا اور خاص طور پر اقوام متحدہ کے علم میں بھی اضافہ کر رہا ہوں؛ چنانچہ آئندہ بھی جونہی مجھے کشمیر کے حوالے سے کوئی خاص اور راز کی بات پتا چلے گی‘ میں ملک کے عوام بلکہ ساری دنیا کو اس سے آگاہ کر دوں گا اور اس سلسلے میں اپنے فرائض منصبی سے کوتاہی نہیں کروں گا۔ آپ اگلے روز ماسکو روانگی سے قبل میڈیا سے گفتگو کر رہے تھے۔

میں بھی!

وزیراعظم برطانیہ سر ونسٹن چرچل ایک بار دورے پر لندن کے پاگل خانے گئے، جہاں ایک پاگل سے مخاطب ہوتے ہوئے بولے: جانتے ہو کہ میں کون ہوں؟

اس پر پاگل نے جواب دیا: میں نہیں جانتا ہوں۔

چرچل نے کہا میں برطانیہ کا وزیراعظم ہوں۔

پاگل بولا: جب میں پہلی بار یہاں آیا تھا تو میں بھی وزیراعظم تھا!

اور‘ اب آخر میں کچھ شعر و شاعری ہو جائے:

کب اپنے ہونے کا اظہار کرنے آتی ہے

یہ آگ مجھ کو نمودار کرنے آتی ہے

میں دن میں خواب بناتا ہوں‘ رنگ رنگ کے خواب

مگر یہ رات انہیں مسمار کرنے آتی ہے

اندھیرا جاتا جب بھی اُلٹ پلٹ کے مجھے

تو روشنی مجھے ہموار کرنے آتی ہے