اسٹاک ایکسچینج شدید مندی,420 پوائنٹس کی کمی,43ہزار کی نفسیاتی حد بھی گر گئی
گیس کی قیمتوں میں متوقع اضافے کے پیش نظر ٹریڈنگ کا منفی آغاز،سرمایہ کاروں کی حصص خریداری کے بجائے فروخت کو ترجیح ،انڈیکس 42747پوائنٹس پر بند،51ارب سے زائدڈوب گئے کے ایس ای 30اورآل شیئرزانڈیکس میں بھی مندی ، کاروباری حجم 17فیصد کم ،353کمپنیوں کے حصص کا کاروبار،70میں اضافہ ،267کی قیمتیں گرگئیں ،مجموعی سرمایہ 8033ارب رہ گیا
کراچی (بزنس رپورٹر)پاکستان اسٹاک ایکسچینج کاروباری ہفتے کے پہلے روز شدید مندی کی لپیٹ میں آگئی اور کے ایس ای100انڈیکس400سے زائد پوائنٹس کی کمی سے 43ہزار کی نفسیاتی حد ایک بار پھر گنوابیٹھا۔75.63فیصد کمپنیوں کے حصص کی قیمتوں میں کمی ریکارڈ کی گئی ،اس دوران سرمایہ کار وں کے 51ارب روپے سے زائد ڈوب گئے جبکہ کاروباری حجم بھی 17.74فیصد کم رہا۔تفصیلات کے مطابق گزشتہ روز اسٹاک مارکیٹ میں ٹریڈنگ کے آغاز سے ہی گیس کی قیمتوں میں متوقع اضافے کے پیش نظر منفی رجحان دیکھنے میں آیا اور سرمایہ کار حصص خریداری کے بجائے فروخت کو ترجیح دیتے رہے جس کے باعث مارکیٹ مندی کی لپیٹ میں آگئی ،دوران ٹریڈنگ 100انڈیکس 42632پوائنٹس کی نچلی سطح پر آ گیا، بعد ازاں ریکوری آئی اورانڈیکس کی42700کی حد بحال ہوگئی لیکن مندی کا رجحان غالب رہا۔کاروبار کے اختتام پر کے ایس ای 100انڈیکس 420پوائنٹس کی کمی سے 42747پوائنٹس پر بند ہوا۔اسی طرح کے ایس ای 30انڈیکس198پوائنٹس کی کمی سے 19798 پوائنٹس اور کے ایس ای آل شیئرز انڈیکس 189 پوائنٹس کی کمی سے 29808پوائنٹس پر بند ہوا۔مجموعی طور پر 353 کمپنیوں کے حصص کا کاروبار ہوا جن میں سے 70 کمپنیوں کے حصص کی قیمتوں میں اضافہ، 267 میں کمی اور16میں استحکام رہا ۔ مارکیٹ کا مجموعی سرمایہ گھٹ کر80کھرب 33ارب روپے رہ گیا۔گزشتہ روز 17کروڑ38لاکھ97ہزار شیئرز کا کاروبار ہوا جوجمعہ کی نسبت3کروڑ75لاکھ6ہزار شیئرزکم ہے ۔ قیمتوں میں اتار چڑھاؤ کے لحاظ سے کولگیٹ پامولوکے حصص کی قیمت86.33روپے کے اضافے سے 2461.33 روپے اورماری پٹرولیم کے حصص کی قیمت 75.08 روپے کے اضافے سے 1440.26 روپے ہوگئی جبکہ سفائر ٹیکسٹائل اورانڈس ڈائنگ کے حصص کی قیمتوں میں بالترتیب35.99 روپے اور 30.05 روپے کی کمی ہوئی جس سے سفائر ٹیکسٹائل کے حصص کی قیمت 900.01 روپے اور انڈس ڈائنگ کے حصص کی قیمت 527 روپے ہوگئی ۔نمایاں کاروباری سرگرمیوں کے لحاظ سے اینگرو فرٹیلائز ر، ٹی آر جی پاک، بینک آف پنجاب،ورلڈ کال ٹیلی کام ،سمٹ بینک ،پاک انٹر بلک ،اینگرو پولیمر ،میپل لیف ،کے الیکٹرک اور فوجی فرٹیلائزر کے شیئرز نمایاں رہے ۔
