ایل پی جی کی قیمت 70روپے کم ،مزید سستی ہونیکا امکان
لاہور(آئی این پی)ملک میں ایل پی جی کی قیمت میں کمی آ گئی، جس کے بعد آئندہ ہفتے بھی ایل پی جی مزید سستی ہونے کا امکان ہے ۔
چیئرمین ایل پی جی ڈسٹری بیوٹرز ایسوسی ایشن عرفان کھوکھر کے مطابق ایل پی جی کے لوکل ڈسٹری بیوٹرز اور امپورٹرز کے درمیان لڑائی کے نتیجے میں قیمت 60 سے 70 روپے کم ہوکر 250 روپے سے 180 روپے فی کلو پر آ گئی ہے ۔ انہوں نے کہا کہ درآمد شدہ ایل پی جی کے 3 جہاز کراچی پورٹ پر پہنچتے ہی او جی ڈی سی ایل نے پیداواری لاگت کم کر دی اور ایل پی جی کا ایک اور جہاز دو تین روز میں پاکستان پہنچ جائے گاجس کے بعد قیمت میں مزید کمی ہوگی۔ عرفان کھوکھر نے کہا کہ اوگرا نے ایل پی جی کی قیمت 238 روپے مقررہ کی تھی مگر مافیا 240 سے 250 روپے فی کلو فروخت کر رہا تھا ۔ ایل پی جی مافیا کی بلیک میلنگ پر اوگرا اور دیگر حکومتی ادارے بھی خاموش تماشائی بنے رہے ۔ او جی ڈی سی ایل نے صرف چند افراد کو نوازنے کیلئے قیمت میں کمی کی۔انہوں نے مزید کہا کہ او جی ڈی سی ایل نے ایل پی جی کی پیداواری قیمت میں 32 ہزار میٹرک ٹن تک کمی کی ہے جس کے بعد ایل پی جی کی پیداواری قیمت1لاکھ 62 ہزار میٹرک ٹن سے کم ہو کر 1 لاکھ 30 ہزار پر آگئی اور ایل پی جی کے تمام اسٹوریج سے بھر گئے ہیں ۔آئندہ ہفتے ایل پی جی کی قیمت میں مزید کمی ہوگی۔
