اسٹاک ایکسچینج:801 پوائنٹس کی تیزی، 56 ارب منافع
کراچی(بزنس رپورٹر)اسٹاک ایکسچینج میں سال 2025 کی دوسری بڑی تیزی رہی۔ انڈیکس 1 لاکھ 16 ہزار کی سطح عبور کرتے ہوئے 1 لاکھ 17 ہزار کی سطح پر جاپہنچا۔۔۔
گزشتہ ہفتے کی زبردست تیزی کا تسلسل کاروباری ہفتے کے دوسرے بھی روز جاری رہا ،آئی ایم ایف سے مثبت مذاکرات ، روشن ڈیجیٹل اکاؤنٹ میں ترسیلات کا آنا، چین کی جانب سے قرضوں کو روول اوور کرنا، ریکو ڈک میں عالمی سرمایہ کاری کی متوقع آمد اور پٹرولیم ڈولپمنٹ لیوی کا بڑھنا اسٹاک سرمایہ کاروں کے اعتماد کو بڑھا گیا ہے ۔تیزی کے سبب 46فیصد حصص کی قیمتیں بڑھ گئیں جبکہ حصص کی مالیت میں 56ارب 33کروڑ 98لاکھ 50 ہزار کا اضافہ ہوا ۔ دوسری جانب آئل اینڈ گیس، بینکس اور سیمنٹ میں یکدم خریداری سرگرمیاں بڑھنے سے ٹریڈنگ کے تمام دورانیے کے دوران تیزی رہی جس سے ایک موقع پر 100 انڈیکس میں 1ہزار پوائنٹس کی تیزی ہوئی ،تاہم وقفے سے پرافٹ ٹیکنگ کے سبب تیزی کی شرح میں معمولی کمی واقع ہوئی۔کاروبار کے اختتام پر کے ایس ای 100 انڈیکس 801پوائنٹس کے اضافے سے 117001پوائنٹس پر بند ہوا، اسی طرح کے ایس ای 30 انڈیکس 227پوائنٹس کے اضافے سے 36134پوائنٹس اور آل شیئرز انڈیکس 332پوائنٹس کے اضافے سے 72541پوائنٹس پر بند ہوا ۔گزشتہ روز 44کروڑ 94لاکھ 84 ہزار 737 حصص کے سودے ہوئے ۔کاروباری حجم11.43فیصد کم رہا۔
