سونا 8100مہنگا،قیمت نئی بلند سطح پر،ڈالر میں بھی اضافہ
کراچی(بزنس رپورٹر)سونے کی قیمتوں میں اضافے کا سلسلہ تھمنے کا نام ہی نہیں لے رہا جس کے نتیجے میں پیر کو بھی عالمی اور مقامی مارکیٹوں میں سونا مزید مہنگا ہوکر تاریخ کی نئی بلند ترین سطح پرجاپہنچا ۔۔
ادھرزرمبادلہ کی دونوں مارکیٹوں میں پیر کو بھی ڈالر کی قدر میں اضافے کا رحجان برقرار رہا۔تفصیلات کے مطابق عالمی بلین مارکیٹ میں سونا 69 ڈالر کے اضافے سے پہلی بار 3,395 ڈالر فی اونس کا ہوگیا۔بین الاقوامی مارکیٹ میں سونے کے نرخ میں اضافے کے باعث مقامی سطح پربھی فی تولہ سونا 8100 روپے کے بڑے اضافے سے تاریخ میں پہلی بار 3 لاکھ 57 ہزار 800 روپے کی نئی بلند ترین سطح پر پہنچ گیا۔اسی طرح دس گرام سونے کی قیمت 6 ہزار 944 روپے کے اضافے سے تاریخ میں پہلی بار 3 لاکھ 6 ہزار 755 روپے ہوگئی۔یاد رہے کہ ہفتہ کو سونے کی فی تولہ قیمت 3 لاکھ 49 ہزار 700 روپے پر مستحکم رہی تھی۔دریں اثنا چاندی کی فی تولہ قیمت 24 روپے کے اضافے سے 3 ہزار 441 روپے ہوگئی۔دوسری جانب اسٹیٹ بینک کے مطابق انٹربینک مارکیٹ میں ڈالر15پیسے کے اضافے سے 280روپے 87پیسے پر بند ہوا،اسی طرح اوپن کرنسی مارکیٹ میں بھی ڈالر کی قدر 6 پیسے کے اضافے سے 282روپے 33پیسے کی سطح پر بند ہوئی۔
