موبی لنک بینک میں 20 ملین ڈالر کی نئی سرمایہ کاری کا اعلان
عالمی ڈیجیٹل آپریٹر وی اون گروپ نے کیا، مالیاتی شعبے میں سرمایہ کاری کا خوش آئند آغاز مقصد بینک کے ایم ایس ایم ای فنانسنگ پورٹ فولیو، ڈیجیٹل اسلامی بینکاری کا فروغ
لاہور (این این آئی)اسپیشل انوسٹمنٹ فیسلی ٹیشن کونسل کے سرمایہ دوست ڈیجیٹل اصلاحاتی فریم ورک کے تحت سال 2026 میں پاکستان کے مالیاتی شعبے میں سرمایہ کاری کا خوش آئند اور پراعتماد آغاز ہوا ہے ۔ایس آئی ایف سی کی دوراندیش معاشی حکمتِ عملی کے نتیجے میں پاکستان کے ڈیجیٹل بینکاری نظام پر عالمی سرمایہ کاروں کا اعتماد مزید مستحکم ہو رہا ہے ۔ سال 2026 کے آغاز پر ہی پاکستان کے مالیاتی شعبے میں ایک نمایاں اور حوصلہ افزا غیر ملکی سرمایہ کاری سامنے آئی ہے ، جس کے تحت عالمی ڈیجیٹل آپریٹر وی اون گروپ کی جانب سے موبی لنک بینک میں 20 ملین ڈالر کی نئی سرمایہ کاری کا اعلان کیا گیا ہے ۔ یہ پیشرفت جنوری 2025 کی 15 ملین ڈالر سرمایہ کاری کا تسلسل ہے ، جو موبی لنک بینک کی مسلسل ترقی اور ڈیجیٹل مالیاتی ایکو سسٹم پر عالمی اعتماد کی عکاس ہے ۔ موبی لنک بینک وی اون گروپ کا ذیلی ادارہ ہے ، جو دنیا بھر میں 150 ملین کنیکٹیویٹی اور 140 ملین ماہانہ ڈیجیٹل صارفین کو خدمات فراہم کر رہا ہے۔
سرمایہ کاری کا مقصد موبی لنک بینک کے ایم ایس ایم ای فنانسنگ پورٹ فولیو اور ڈیجیٹل اسلامی بینکاری کو فروغ دینا ہے ۔یہ اقدام ٹیکنالوجی پر مبنی، ڈیجیٹل نیٹو بینک کے طور پر موبی لنک بینک کے ارتقا کو مزید مضبوط بنائے گا۔خواتین، چھوٹے کاروباروں اور کم سہولت یافتہ طبقات کو ریگولیٹڈ مالی سہولیات تک رسائی فراہم کرنا اس سرمایہ کاری کا کلیدی ہدف ہے ۔وی اون گروپ کے مطابق یہ سرمایہ کاری اعلی اثر رکھنے والے ڈیجیٹل مالیاتی ایکو سسٹمز کو مضبوط بنانے کی عالمی حکمتِ عملی کا حصہ ہے۔
