بنگلہ دیش کی درخواست پر غور کرینگے ، معاملہ آسان نہیں : آئی سی سی
بنگلادیش کے ٹیم بھارت نہ بھیجنے کے اعلان پر کونسل وقت کی کمی کے باعث فوری جائزہ لے گی لیکن جلد بازی میں کوئی فیصلہ نہیں کریگی شیڈول میں تبدیلی مشکل مرحلہ ،کونسل ذرائع، بنگلادیش کو انکار سے نقصان ہو سکتا،ورلڈکپ میں شرکت کھونا پڑسکتی ہے ،بھارتی میڈیا
دبئی (سپورٹس ڈیسک)آئی سی سی نے بنگلادیش کرکٹ بورڈ کی جانب سے ٹی 20 ورلڈ کپ کے لئے قومی ٹیم بھارت نہ بھیجنے کے اعلان کے حوالے سے کہا ہے کہ بنگلادیش کی درخواست پر غور ضرور کرے گا لیکن اس کے لیے معاملہ آسان نہیں۔میڈیا رپورٹس کے مطابق انٹرنیشنل کرکٹ کونسل وقت کی کمی کے باعث فوری طور پر معاملے کا جائزہ لے گا، دو روز کے دوران آئی سی سی کے آفیشلز کا اجلاس ہوگا، آئی سی سی جلد بازی میں کوئی فیصلہ نہیں کرے گا۔ رپورٹ کے مطابق آئی سی سی کے ایک حلقے کا کہنا ہے کہ معاملہ خالصتاً بی سی بی اور بی سی سی آئی کے درمیان ہے ، اس معاملے میں آئی سی سی کو شامل کرنا کسی طور پر مناسب نہیں ہے ۔ رپورٹ میں کہا گیا ہے کہ آئی سی سی بنگلادیش کرکٹ بورڈ کو رکاوٹوں کے حوالے سے آگاہ کرے گا، اِیونٹ کا میزبان بھارتی کرکٹ بورڈ اس معاملے کے حوالے سے اپنی حکومت سے بھی بات چیت کرے گا۔
بنگلادیش کے انکار سے ایونٹ کے شیڈول میں بڑی تبدیلی کرنا پڑے گی، شیڈول میں تبدیلی اِس موقع پر آئی سی سی کے لیے ایک آسان مرحلہ نہیں ہے ۔بنگلادیش گروپ سی میں انگلینڈ، ویسٹ انڈیز، نیپال اور اٹلی کے ساتھ شامل ہے ، گروپ میچز کے علاوہ بنگلادیش کے سپر ایٹ مرحلے میں پہنچنے کی صورت میں بھی تبدیلیاں ہوں گی۔ کرکٹ فینز کو بھی اپنے پروگرام میں ردوبدل کرنا پڑے گا۔دوسری جانب بھارتی میڈیا نے ایک بار پھر بنگلادیش کو اکسانا اور پروپیگنڈا کرنا شروع کر دیا ، بھارتی میڈیا کا کہنا ہے کہ بنگلادیش پاکستان نہیں جو آئی سی سی کے لئے اتنا اہم ہو، بنگلادیش کو انکار سے نقصان ہو سکتا ہے ۔بھارتی میڈیا کے مطابق آئی سی سی بنگلادیش کی درخواست کو مسترد کر سکتا ہے ، بنگلا دیش ٹیم کو ورلڈکپ میں شرکت کھونا پڑسکتی ہے ۔
